Ico Abengi Batwishikila Ukupepa nga Kuti Kwaikatanya Abantu
“ULETEMWO munobe.” (Mateo 22:39) Ili funde lyalitashiwa sana ku nkuta shonse isha bakapepa. Nga ca kuti aba mapepo ba musango yu balasambilisha bwino abo bapepa na bo ukuti baletemwa abantu banabo, nga balikatana icine cine. Nga imwe, bushe mumona ukuti abaya ku mapepo balikatana? Bushe ukupepa kwalikatanya abantu? Nomba line, abafwailisha ifintu aba mu Germany baipwishe abantu ukuti: “Bushe ukupepa kulekatanya, nelyo kulenga fye abantu ukupusana?” Abanono fye e batile ukupepa kulekatanya abantu, lelo ukucila pali hafu batile ukupepa kulaleta amalekano kabili kulapusanya abantu. Nalimo abantu mu calo cenu na mo mwine e fyo batontonkanya.
Cinshi abengi batwishikila ukupepa nga kuti kwaikatanya abantu? Nalimo icalenga, mulandu wa fyo abaya ku mapepo bacita ukutula fye na ku kale. Ukucila ukwikatanya abantu, ukupepa ilingi line kwalilenga abantu ukupusana. Inshita shimo, abantu basangula ukupepa nga kabepekesho ka kucitilamo ifibi sana. Tontonkanyeni pali ifi ifyacitike mu myaka 100 iyapita.
Ifyacitwa na Bantu Abatila Balapepa
Mu nkondo ya calo iya cibili, kwali ukwipayana kwa baKatolika abena Croatia na ba Orthodox abena Serbia. Aba mu mabumba yonse yabili baleitunga ukuba aba kwa Yesu uwasambilishe abantu ukutemwa umunabo. Lelo, uufwailisha umo asosele ati “pa nkondo twaishiba, ilya na yo yaipeye abantu abengi icine cine.” Abantu bonse mu calo balyumfwile no mwenso ku mulandu wa bantu ubwingi abaipaiwe, abaume, abanakashi, na bana, ukucila 500,000.
Mu 1947, mu India pamo ne fyalo fya mupepi mwali abantu 400 milioni, kabili abafulilemo baHindu, abaShilamu, na baSikh. Ilyo bayakenye icalo ca India, icalo ca baShilamu ica Pakistan calipangilwe. Pali ilya nshita, ilyo kwali ukwipayana kwa bantu abatila balapepa, abengi nga nshi ababutwike muli ifi fyalo balibocele, ukubafopaula, ukubalungulusha, no kubapika imfuti.
Ukulunda pali ici cimfulumfulu, ukutendeka kwa myaka ya ba2000 kwaletele icintiinya ca kusansa kwa tupondo. Muno nshiku, ukusansa kwa tupondo kwalilenga abantu mu calo conse ukuba abasakamikwa kabili aba mwenso. E lyo abengi ababa utupondo baitunga ukuti balapepa kumo. E ico ukupepa takumonwa nge cintu icikatanya abantu. Lelo kumonwa nge cileta fye ulukakaala na malekano. E mulandu wine magazini ya FOCUS iya ku German yalandile ukuti amabumba yalumbuka aya mapepo yabi icine cine. E kutila amabumba ya baBuddha, aba mu Kristendomu, baConfucian, abaHindu, abaShilamu, abaTao, na baYuda.
Ukukansana Mulya Mwine Bapepa
Nangu line aba mapepo bamo bamo balwa na bapepa kumbi, bambi na bo bakwata ubwafya bwa kukansana fye abene mulya mwine bapepa. Ku ca kumwenako, mu myaka ya nomba line kwaliba amalekano mu macalici ya Kristendomu pa mulandu wa kupusana amasambilisho. Bashimapepo na bantu yaweyawe bonse bepusha abati: Bushe caliba fye bwino ukucilikila ubufyashi? Ngo kuponye fumo, bushe kwalisuminishiwa? Bushe abanakashi balingile ukusontwa pali bushimapepo? Bushe abapepa bafwile ukumona shani ukuupana kwa baume beka beka na banakashi beka beka? Bushe abapepa bafwile ukusuminisha inkondo? Ilyo bamona aya malekano, abengi baipusha abati, ‘Bushe ukupepa kuti kwaikatanya shani abantu ilyo kulefilwa ukwikatanya na bapepa mulya mwine?’
Kwena, mu cinkumbawile ukupepa kwalifilwa ukwikatanya abantu. Lelo bushe mu mabumba yonse fye aya bakapepa mwaliba amalekano? Bushe kwaliba ukupepa ukwaibela fye, ukwingekatanya abantu?
[Icikope pe bula 3]
Bakapokola abacenenwe ilyo kwali inkondo ya ba mapepo mu India mu 1947
[Abatusuminishe]
Abakopele ni ba Keystone/Getty Images