Ukushimikila kwa kwa Sauli Kwabalamune Mpatila

ABAYUDA abali mu Damaseke balifililwe ukwishiba icalengele ukuti umuYuda uwalecingilila intambi shabo mu kupimpa, abe umusangu. Sauli aishibikwe ngo mwaume walesansa bonse abalebomfya ishina lya kwa Yesu mu Yerusalemu. Kabili aishile ku Damaseke ku kupakasa abasambi kulya. Lelo pali iyi nshita Sauli e waleshimikilo kuti ulya Yesu wasuulilwe uo baleti ni ntalamisoka kabili uwapoopelwe pa mulandu wa miponto, e Mesia wine! Bushe Sauli alipenene?—Imilimo 9:1, 2, 20-22.

Nakalimo kwali icalengele. Abantu bamo abaendele pamo na Sauli mu lwendo lwabo ulwa kufuma ku Yerusalemu napamo e bashimike icacitike ilyo bali pa lwendo. Ilyo balepalama ku Damaseke, e lyo ulubuuto lwabalikisha lwabyatile pali bonse kabili bonse bawile pa nshi. E lyo baumfwile ishiwi. Lelo tapali uwacenenwe kano fye Sauli eka. Awe alambalele fye pa musebo. Ilyo aimine, abo ali na bo e bamutungulwile no kumwingisha mu Damaseke, pantu ali napofula.—Imilimo 9:3-8; 26:13, 14.

Umulwani wa kwa Yesu E Watendeka Ukushimikila Pali Ena

Bushe cinshi cacitike kuli Sauli ilyo ali mu musebo wa kuya ku Damaseke? Bushe nalimo kulepa kwa lwendo nelyo ukukaba kwa kasuba kalotoka e kwamulengele ukutembuka? Mu kufwaya ukusanga icalengele, abalengulula amapepo muno nshiku batila, nakalimo icalengele, bulwele bwa nsainsai, nelyo alemona ifimonwa pa mulandu wa kulwala, kabili afwile ali no lunshingwa ulubi pa mulandu wa kucushiwa kwa kampingu, nelyo fye ukupopomenwa, kabili baletunga no kuti napamo alilwele ubulwele bwa cipumputu.

Kwena icacitike ca kuti Yesu Kristu amoneke kuli Sauli mu kubalika kwa lubuuto, ukumulangilila ukuti ali e Mesia. Ifikope fimo ifya kulenga pali ci cacitike filangilila Sauli alepona pali kabalwe. Nangu ca kuti ico kuti cacitika, Baibolo yena ilanda fye ukuti ‘awile pa nshi.’ (Imilimo 22:6-11) Te mulandu ne fyo Sauli aponene, ukupona kwakwe takwalingene no kuseebana asebeene pa mulandu wa cilumba akwete ica kuba ne cifulo cikalamba. Apa nomba, e po ashininkishishe ukuti ifyo abasambi ba kwa Yesu baleshimikila, fyali fya cine. Ico Sauli alekabila fye ukucita kuilunda kuli bena. Sauli uwali umulwani wabipisha uwa bukombe bwa kwa Yesu, e wayalwike kabilisha wakamamo na menshi. Ilyo amenso yakwe yashibwilwe kabili abatishiwa, ‘Sauli atwalilile ukukosa ica kuti alesungusha abaYuda abaikele mu Damaseke ilyo alebashinina bwino ukuti uyu e Kristu.’—Imilimo 9:22.

Ipange lya Kufwaya Ukumwipaya Lyafilwa Ukubomba

Ni kwi uko Sauli, uo pa numa aleitwa Paulo, aile ilyo fye apilibwike? Pa kulemba ku bena Galatia, atile: “Naile ku Arabia, kabili nabweleele ku Damaseke.” (Abena Galatia 1:17) Ishiwi lya kuti “Arabia” kuti lyalosha ku lwendo lwa kuya ku ncende yonse mu Cofi ca Arabia. Abasoma bamo balanda abati Paulo nalimo aile mu Ciswebebe ca ku Suria nelyo ku ncende imbi mu bufumu bwa Nabataea ubwa kwa Aretas IV. Kwena, ilyo abatishiwe, Sauli afwile aile ku ncende iyaba tondolo pa kuti aye no kutontonkanya pali fimo fimo, nge fyo na Yesu aile mu matololo pa numa fye ya lubatisho lwakwe.—Luka 4:1.

Ilyo Sauli abwelele ku Damaseke “abaYuda bapangene ukumwipaya.” (Imilimo 9:23) Kateka waleimininako Imfumu Aretas mu Damaseke alelinda umusumba pa kuti ekate Sauli. (2 Abena Korinti 11:32) Lelo ilyo abalwani ba kwa Sauli balepanga ukumwipaya, abasambi ba kwa Yesu basangile inshila ya kumupusushishamo.

Pa bantu bayafwilishe Sauli ukufyuka pali na Anania e lyo na basambi bamo abali na Sauli pa numa fye ya kupilibuka kwakwe.a (Imilimo 9:17-19) Bamo abasumine ilyo Sauli aleshimikila mu Damaseke nalimo na bo balimwafwileko, pantu pa Imilimo 9:25 patila: “E ico abasambi bakwe balimubuulile ubushiku no kumupusha pa cipunda mu cibumba, ukumwikisha mu cipe.” Amashiwi ya kuti “abasambi bakwe” limbi kuti yalosha kuli balya abo Sauli alesambilisha. Ukutunguluka kwakwe mu kushimikila kufwile e kwalengele ukuti ulupato bamukwatile lukoseleko.

Ico Twingasambililako

Nga twafwailikisha ifyalengele Sauli ukwaluka no kubatishiwa tulesanga ukuti tasakamene ukucilamo pa fyo bambi bali no kulamumona kabili talekele ukushimikila pa mulandu wa kukaanya kwaluma. Icacindeme sana kuli Sauli, mulimo wa kushimikila uo apokelele.—Imilimo 22:14, 15.

Bushe ni nomba line mumwene ubucindami bwa kushimikila abantu imbila nsuma? Nga e fyo, ninshi namwishiba ukuti Abena Kristu bonse bafwile ukuba bakabilisha wa Bufumu. Tamufwile ukupapa nga ca kuti umulimo wenu uwa kushimikila inshita shimo ulelenga bamo ukukalipa. (Mateo 24:9; Luka 21:12; 1 Petro 2:20) Inshila isuma iyo Sauli ayankwile ku kukaanya e yo tufwile ukupashanya. Lesa akasenamina Abena Kristu abashipikisha amesho ukwabula ukucimba. Yesu aebele abasambi bakwe ati: “Mukaba abapatwa ku nko shonse pa mulandu we shina lyandi.” Lelo, abakoseleshe no kuti: “Mu kushipikisha kwenu e mo mukabakile myeo yenu.”—Luka 21:17-19.

[Futunoti]

[Icikope pe bula 28]

Sauli ‘awile pa nshi’ ilyo Yesu amoneke kuli wene

[Icikope pe bula 29]

Sauli alifyukile ilyo balepanga ukumwipaya mu Damaseke