Bushe Icine Ciletwale Fisabo mu Bantu Musambilisha?

ILYO umulumendo Eric aebele abafyashi bakwe ukuti talefwaya ukuba Inte ya kwa Yehova na kabili, balyumfwile ubulanda icine cine. Tabamwenepo icishibilo icili conse ica kuti Eric kuti afuma mu cine. Ilyo Eric aali umwaice, alesangwa pe sambililo lya Baibolo ilya lupwa, alesangwa na ku kulongana kwa Bwina Kristu, kabili alebombako no mulimo wa kushimikila ne cilonganino. Alemoneka ukuti aleenda mu cine. Lelo apo nomba alifumine pa ng’anda, abafyashi bakwe bailwike ukuti icine ca mu Baibolo tacali muli wene. Ilyo baishibe ci, balipeshiwe amano.

Bamo balyumfwapo fimo fine ilyo umusambi wabo ukwabula no kwenekela aleka ukusambilila Baibolo. Ica musango yu nga cacitika, abantu ilingi line balaipusha abati, ‘Cinshi nshamwenene ukuti umusambi alealuka?’ Bushe kwena, kuti cacitika ukwishiba nga ca kuti icine ciletwala ifisabo mu bantu tusambilisha ilyo ubwafya bwa ku mupashi bushilacitika? E co, kuti twashininkisha shani ukuti icine cilebomba muli ifwe na mu bantu tusambilisha? Mu mulumbe wakwe uwaishibikwa uwa kwa katanda, Yesu apeele ica kwafwa ku kwasuka aya mepusho.

Icine Cifwile Ukubafika pa Mutima

Yesu atile: “Ulubuto cebo ca kwa Lesa. Ne shaponene pa mushili usuma, ni balya aba kuti pa numa ya kuumfwe cebo ne mitima iyawama kabili iisuma, balaciikatisha no kutwala ifisabo mu kushipikisha.” (Luka 8:11, 15) E co pa kuti icine ca Bufumu citwale ifisabo mu basambi besu, kano calimba imishila mu mitima yabo iya mampalanya. Yesu atweba ati filya ulubuto lusuma luba mu mushili usuma, e fyo ne cine ca kwa Lesa ciba nga cafika pa mutima usuma, mu kwangufyanya cilabomba kabili cilatwala ne fisabo. Finshi tufwile ukwenekela?

Tufwile ukwishiba ifyaba mu mutima, te kumoneka fye kwa ku nse. Ukubombako fye imilimo ya bufumu te lyonse kusokolola ifili mu mutima wa muntu. (Yeremia 17:9, 10; Mateo 15:7-9) Tulekabila ukumona ifili mu kati. Umuntu afwile ukwaluka icine cine mu fyo afwaya ne fyo acindamika. Afwile ukulalundulula ubuntu bupya, umwabela ukufwaya kwa kwa Lesa. (Abena Efese 4:20-24) Natulangilile: Ilyo abena Tesalonika baumfwile imbila nsuma, Paulo asosele ukuti, mu kuitemenwa baipokelele nge cebo ca kwa Lesa. Lelo kwali kushipikisha kwabo, bucishinka, no kutemwa balangishe pa numa e fyalengele ukuti ashininkishe ukuti icine ‘calebombela muli [bene].’—1 Abena Tesalonika 2:13, 14; 3:6.

Kwena, icili conse icili mu mutima wa musambi, umuye nshiku cikasuka acimoneka mu micitile yakwe, nge fyo cacitike kuli Eric. (Marko 7:21, 22; Yakobo 1:14, 15) Ku ca bulanda, imisango imo iyabipa limo isa mu moneka ninshi ne fintu nafyonaika kale. Kanshi, icayafya kwishiba ubwafya bumo ilyo tabulaba ulubembu lwa konaula bumupashi bwa muntu. Tufwile ukwishiba ifya kumona mu mutima wa mampalanya. Kuti twacita shani fyo?

Sambilileni Kuli Yesu

Yesu ena, alemona fye bwino bwino ifili mu mutima wa muntu. (Mateo 12:25) Takwaba nelyo umo uwingacite fyo. Na lyo line, atulangile ukuti na ifwe bene kuti twaishiba ifyo umuntu afwaya ne fyo acindamika. Filya fine dokota wafikapo abomfya inshila shapusanapusana pa kufwaya ukwishiba icilubene ku mutima wa mulwele, e fyo na Yesu abomfeshe Icebo ca kwa Lesa ku ‘kutapulamo’ no kusansalika “amatontonkanyo na mapange ya mutima” ilyo yali yacili tayalaishibikwa ku bantu.—Amapinda 20:5; AbaHebere 4:12.

Ku ca kumwenako, pa nshita imo Yesu aafwile Petro ukwishiba ubwafya ubo bwaishileba ica kupunwisha pa numa. Yesu alishibe ukuti Petro alimutemenwe. Na kuba, Yesu e lintu fye apeele Petro “imfungulo sha bufumu.” (Mateo 16:13-19) Nangu cibe fyo, Yesu alishibe na kabili ukuti Satana alefwaisha ukusansa abatumwa. Mu nshiku shali no kukonkapo, bali no kupakaswa apakalamba ukufwaya ukubanenuna. Yesu mu kushininkisha alishibe ukuti abasambi bakwe bamo balikwete umo banakile mu citetekelo cabo. E co tashingashingile ukulanda mu kulungatika ifyo balekabila ukubombelapo. Moneni ifyo atendeke ukulanshanya.

Mateo 16:21 isosa ati: “Ukufuma lilya Yesu Kristu atendeke ukulanga abasambi bakwe ukuti aalingile . . . ukucula . . . no kwipaiwa.” Moneni ukuti Yesu tabebele fye ifyali no kumucitikila, lelo alibalangile. Afwile abomfeshe ifikomo fya mu Baibolo, pamo nga Amalumbo 22:14-18 nelyo Esaya 53:10-12, ifilangisha ukuti Mesia aali no kucula no kufwa. E ico, pa kubelenga nelyo ukwambula mu kulungatika ukufuma mu Malembo, Yesu apeele Petro na bambi ishuko lya kusosa ifya mu mitima yabo. Baali no kucita shani nga bapakaswa?

Ku ca kupapusha, te mulandu na fintu Petro aali uwashipa kabili uwapimpa, ubwangu kanwa bwakwe pali iyi nshita bwasokolwele ubwafya bukalamba ubwali mu kutontonkanya kwakwe. Atile: “Ifyo te fyo, mwe Shikulu, ico tacakamucitikile nakalya.” Inshila Petro aletontonkanishishamo yalangile fye apabuuta kuti alilufiwe, pantu nga fintu Yesu alandile, Petro ‘taletontonkanya ifya kwa Lesa, kano ifya bantu,’—ici cali cilubo cikalamba icali no kuleta ubwafya bwabipisha. Cinshi lyene Yesu acitile? Pa numa ya kumukalipila, Yesu aebele Petro na basambi bambi ukuti: “Umuntu nga alefwaya ukunkonka, aikaane umwine, asende icimuti cakwe ica kucushiwilwapo, alenkonka.” Ukulanda pa mashiwi yaba pa Amalumbo 49:8 na Amalumbo 62:12, mu cikuuku abacinkwileko kuti isubilo lyabo ilya bumi bwa muyayaya talyali na kufuma ku bantu abashali na kubapususha, lelo lyali no kufuma kuli Lesa.—Mateo 16:22-28.

Nangu cingatila pa numa Petro alyumfwile umwenso pa nshita inono no kukaana Yesu imiku itatu, ukwabula no kutwishika uku kulanshanya pamo na kumbi, kwalimwafwile ukupepemuka bwangu bwangu mu mulimo wa kwa Lesa. (Yohane 21:15-19) Pa numa fye ya nshiku 50, Petro mu kushipa aiminine pa ntanshi ya mabumba mu Yerusalemu ukupeela ubunte bwa kubuuka kwa kwa Yesu. Inshiku shakonkelepo alishipikishe ukwikatwa libili libili, ukupumwa no kubikwa mu cifungo, aimike ica kumwenako cisuma ica kuba uwa mpomfu.—Imilimo 2:14-36; 4:18-21; 5:29-32, 40-42; 12:3-5.

Cinshi tusambililako kuli Yesu? Bushe mwamona ico Yesu acitile pa kutapula no kusansalika ifyali mu mutima wa kwa Petro? Ica kubalilapo, asalile amalembo ayalekomaila pa co Petro alekabila ukupoosako amano. Icakonkapo, alipeele Petro ishuko lya kulanda ifili mu mutima. Pa kulekelesha, apeele ukufunda na kumbi ukwa mu Malembo ukwa kwafwa Petro ukulungika ukutontonkanya kwakwe ne fyo alemona ifintu. Nalimo kuti mwayumfwa ifyo te kuti musambilishe muli uyu musango. Lelo lekeni tumone ifya kukumanya fibili ifilelangilila ifyo ukuipekanya no kucetekela Yehova kwingafwa umo umo uwa ifwe ukukonka ica kumwenako ca kwa Yesu.

Ukulenga Umuntu Alanda Ifili ku Mutima

Ilyo umufyashi umwaume umo Umwina Kristu aishibe ukuti abana bakwe babili abaume uwali mu gredi 1 no wali mu gredi 2 balisendele switi pe tebulo lya kwa kafundisha, alibatekele pa nshi no kulanda na bo. Ukucila ukusuulako fye kuli cilya bacitile, ukucimona kwati tacilubene sana, no kutila mano fye ya bwaice, uyu mufyashi ashimika ukuti: “Naeseshe ukufwaya ukwishiba icali mu mitima yabo, icalengele ukuti bacite icintu cabipe fyo.”

Wishi aebele abana ukwibukisha icacitikile Akani, nga fintu calembwa muli Yoshua icipandwa 7. Apo pene fye, abana balishibe umo calolele kabili balisumine icilubo. Ninshi kale kale bakampingu babo balebacusha. E ico shibo abebele ukubelenga ilembo lya Abena Efese 4:28, ilitila : “Uwibile eiba kabili, lelo abombeshe, . . . ukuti akwate ica kupeelako uubulilwe.” Wishi alengele abana bakwe ukushita switi basendele no kubwesesha kafundisha. Ici cabalengele ukucindamika ukufunda kwa mu Malembo.

Uyu mufyashi alanda ati: “Twaleesha ukunukula imibele yalubana iili yonse ilyo fye yamoneka, no kuipyanikapo ne mibele isuma iyasanguluka pa kulanshanya na bana.” Ukupashanya Yesu, ilyo balya bafyashi baalesambilisha bana babo, mu kuya kwa nshita abana babo balikulile bwino sana. Abana bonse babili basukile baba bakabomba ba pa maofesi yakalamba aya Bethel ku Brooklyn, apo umo acili abombela na nomba imyaka 25 iyapita.

Moneni ifyo Umwina Kristu na umbi ayafwile umusambi wakwe uwa Baibolo. Umusambi alesangwa mu kulongana no kushimikila kabili alilangile kale ukuti alefwaya ukubatishiwa. Lelo, alemoneka ukuicetekela sana ukucila ukucetekela Yehova. Nte aibukisha ukuti: “Apo ali mushimbe, alikwete ubuntungwa sana ukucila ifyo aletontonkanya. Nalisakamikwe ukuti ali no kulwala nelyo ukuleka ukucita bwino mu mulimo wa kwa Lesa.”

E co Nte alicitilepo fimo ilyo alandile no musambi pali Mateo 6:33, ukumukoselesha ukwaluka mu fyo acindamike, ukubika Ubufumu intanshi, no kucetekela Yehova ukumwafwa ukutunguluka. Amwipwishe mu kulungatika ati: “Bushe limo cilamwafya ukucetekela bambi, kumo na Yehova wine pa mulandu wa kuti mwikala mweka?” Umusambi asumine ukuti ali fye mupepi no kuleka ukupepa. Lyena kasabankanya amukoseleshe ukukonka ukufunda kwaba pa Amalumbo 55:22, ukupoosa icisendo cakwe pali Yehova pantu, 1 Petro 5:7 ilaya aiti, “asakamana imwe.” Ayo mashiwi yalimufikile pa mutima. Nte alanda ati, “Umusambi alililile.”

Lekeni Icine Cilebomba Muli Imwe

Ukumona abantu tusambilisha Baibolo batendeka ukucita bwino mu milimo ya kwa Lesa kulatuletela insansa ishingi. Na lyo line, pa kuti abo tulesambilisha batendeke ukucita bwino, tufwile ukuba ifya kumwenako fisuma. (Yuda 22, 23) Ifwe bonse tulingile ‘ukubombela ipusukilo [lyesu] no mwenso no kututuma.’ (Abena Filipi 2:12) E mu kutila kufwile kwaba no kuleka ulubuuto lwa mu Malembo ukubalikila mu mitima yesu lyonse, ukubebeta imibele yesu, ifyo tufwaya, ne fyo twatemwa ifingakabila ukulungikwa.—2 Petro 1:19.

Ku ca kumwenako, bushe ukupimpa kwenu mu milimo ya Bwina Kristu kwalicepa pali nomba? Nga e fyo cili, cinshi calenga? Napamo cimo icingalenga ca kuti muleicetekela sana. Bushe kuti mwaishiba shani ukuti e fyo cili? Belengeni Hagai 1:2-11, kabili mu bufumacumi tontonkanyeni pa fyo Yehova alandile na baYuda babweshiwa. Lyene muipushe amuti: ‘Bushe nalicilamo ukupoosa amano ku kukwata indalama ishingi no kufwaya ukuba ne cuma? Bushe mu cine cine ndacetekela Yehova ukusakamana ulupwa lwandi nga ca kuti nabika ifya ku mupashi intanshi? Nelyo bushe mona ukuti mfwile ukuisakamana intanshi?’ Nga ca kuti mufwile ukwaluka mu kutontonkanya kwenu nelyo mu fyo mumona ifintu, mwishingashinga ukucite fyo. Ukufunda kwa mu Malembo, pamo ngo kusangwa pali Mateo 6:25-33, Luka 12:13-21, na 1 Timote 6:6-12, kulatulanga inshila yalinga iya kumwenamo ifikabilwa fya ku mubili ne fikwatwa, iingalenga twatwalilila ukupaalwa na Yehova.—Malaki 3:10.

Ukuiceeceeta kwa musango yu ukwa kukanapita mu mbali takwayanguka. Ukusumina ifilubo fyesu ilyo batweba mu kulungatika kuti kwatukalifya. Lelo, mu kutemwa nga mwacitapo cimo ku kwafwa umwana wenu, umusambi wenu uwa Baibolo, nelyo fye mwe bene, te mulandu na fintu uyo mulandu wingaba, ninshi mwacita ica kubalilapo ica kupususha umweo wa bambi nelyo umweo wenu.—Abena Galatia 6:1.

Lelo, ni shani nga ca kuti ukubombesha kwenu takulemoneka ukutwala ifisabo fisuma? Mwiyangufyanya ukunenuka. Ukulungika umutima ushapwililika mulimo wayafya, uukabila inshita, kabili limo limo ulakalifya no kukalifya. Lelo na kabili kuti mwafuma ifisuma.

Umulumendo Eric, uo tulandilepo pa kubala, umuye nshiku alikutulwike no kutendeka ‘ukwenda mu cine’ na kabili. (2 Yohane 4) Atila: “Nabwelele kuli Yehova ilyo natontonkenye pa fintu nalufishe.” Pa mulandu wa kwafwa kwa bafyashi bakwe, Eric nomba alebombela Lesa mu busumino. Nangu ca kuti inshita imo alipatile ukufwaisha kwa bafyashi bakwe ukwa kubebeta umutima wakwe lyonse, pali ino nshita alatasha nga nshi pa fyo babombele. Atila: “Abafyashi bandi basuma icine cine. Tabatalile abaleka ukuntemwa.”

Ukusanika ulubuuto lwa Cebo ca kwa Lesa mu mitima ya bantu tusambilisha cilangililo ca kuti tuli ba luse. (Amalumbo 141:5) Twalilileni ukubebeta umutima wa bana benu no mutima wa basambi benu aba Baibolo pa kushininkisha ukuti ubuntu bupya ubwa Bwina Kristu bulebomba muli bene icine cine. Lekeni icine citwalilile ukubombela muli bambi na muli imwe pa ‘kulungika bwino icebo ca cine.’—2 Timote 2:15.

[Icikope pe bula 29]

Amashiwi ya kwa Yesu yasokolwele ubwafya Petro akwete

[Icikope pe bula 31]

Bomfyeni Baibolo ku kwishiba ifili mu mutima