“Balishipikishe Ilyo Balecushiwa”

CALI ni mu April 1951, e lyo ubuteko bwa calo ca Soviet Union bwasanshile Inte sha kwa Yehova, Abena Kristu ababula umulandu abaikele ku masamba ya Soviet Union. Indupwa ishingi nga nshi, pamo na bana babo, banamayo abaali pa bukulu, na bakoloci, bonse fye babalongele mu matolokoshi kabili batendeke ulwendo lwabo ulwa nshiku 20 ulwa bucushi ukuya ku Siberia. Babapingwile ukuti bakekala kuli cilya cifulo cabipa nga nshi umuyayaya.

Lelo mu April 2001, ilyo papitile imyaka 50 ukufuma apo babatwalile ku Siberia, kwali ukwibukisha ili lyashi lya kale ku Moscow ilyo bafumishe vidio alanda ifyo Inte sha kwa Yehova shaculile mu calo ca Soviet Union pa myaka 50. Muli iyi vidio, mwaba abasoma ilyashi lya kale capamo na bansangwapo, abalondolola ifyo baNte bapuswike ne fyo balunduluka nangu ca kuti baliculile icabipa.

Iyi vidio itila, Faithful Under Trials—Jehovah’s Witnesses in the Soviet Union (Inte sha kwa Yehova mu Soviet Union—Balishipikishe Ilyo Balecushiwa), pali nomba yatambwa ku bantu abengi aba mu Russia, na ba mu fyalo fimbi na bo, balitamba iyi vidio. Kabili aba bekala calo capamo na basoma ilyashi lya kale balitasha sana iyi vidio. Umfweni ifyalandile abaume babili abasoma abena Russia abekala ku ncende uko batwele indupwa sha baNte ishingi:

“Nalitemenwe nga nshi ukutamba iyi filimu. Ukutula fye ku kale nalitemwa ukupepa kwenu, lelo pa numa ya kutamba uyu filimu nalitemwa sana Inte sha kwa Yehova. Ala iyi filimu yalipangwa bwino icine cine! Ico natemenwe sana, ni filya mwalangisha ifyacitike ku muntu umo umo. Nangu ca kuti mpepa ku Orthodox kabili nshilepanga ukufuma mwi calici lyandi, nalitemwa sana baNte. Kuti natemwa abantu besu na bo bakwatako iyi vidio. Ine pamo na bo momba na bo twatambishe iyi vidio ku bana be sukulu kabili twaibikile na pa fyo abana be sukulu bafwile ukusambilila.”—E fyalandile Professor Sergei Nikolayevich Rubtsov uwa pa yuniversiti ya State Pedagogical University, iya mu Irkutsk, ku Russia.

“Iyi filimu nali-itemwa nga nshi. Umuntu nga alepanga filimu ya bantu abo bacushishe, ilingi line cilafya ukutantika ilyashi mu nshila yaololoka. Lelo imwe mwalipanga filimu iisuma. Shi mukandeteleko amavidio yenu na yambi.”—E fyalandile Professor Sergei Ilyich Kuznetsov uwa pa yuniversiti ya Irkutsk State University, ku Russia.

Inte sha kwa Yehova abekala mu Siberia na bo bene balitemenwe nga nshi ukutamba ulya filimu. Umfweni na bo ifyo balandapo:

“Ilyo ifi fintu balanga muli iyi filimu fyalecitika, abengi mu calo ca Russia tabaishibe ifishinka pa Nte sha kwa Yehova. Lelo ilyo batambile filimu, balimwene ukuti icilonganino cesu cisuma sana, te cilonganino cabipa nga filya baletontonkanya kale. Bamo abatendeke nomba line ukupepa ku Nte sha kwa Yehova batile: ‘Tatwaishibe ukuti bamunyinefwe abo twaba fye na bo balishipikishe amacushi ya musango ulya!’ Ilyo Nte umo atambile ilya filimu, asalilepo ukutendeka ukubombesha sana umulimo wa kushimikila abantu ifya mu Baibolo.”—E fyalandile ba Anna Vovchuk, abatwelwe ku Siberia.

“Nalitinine nga nshi ilyo namwene bakapokola bakonkonsha ku ciibi ca kwa Nte muli iyi filimu. Naumfwile kwati ni lilya bakapokola baishile pa mwesu, kabili ncili ndebukisha na mashiwi yalandile bamayo aya kuti: ‘Nalimo kuli umulilo.’ Nalyo line, iyi filimu yancinkwileko no kuti baNte abengi baliculile ukucila ifyo naculile. Ifi fyonse filatupeela amaka no kutulenga twacincila ukubombela Yehova.”—E fyalandile ba Stepan Vovchuk, abatwelwe ku Siberia.

“Abafyashi bandi ni baNte kabili balitwelwe ku Siberia. Nalemona kwati nalishiba ifingi sana pali lilya lyashi. Ilyo natambile iyi filimu, e lyo namwene ati kanshi tapali ne fyo naishibe. Ilyo nalekutika, ifilamba fyalyengelele mu menso. Pali nomba nshimona ifyacitike ukuti malanda kanwa fye, lelo nalisumina ukuti cine cine fyalicitike. Iyi filimu nailenga bucibusa bwandi na Yehova ukukosa sana no kuipekanya ukushipikisha ubwafya bonse ubwingesa ku ntanshi.”—E fyalandile ba Vladimir Kovash aba ku Irkutsk.

“Ala iyi filimu yalimfikile pa mutima ukucila ilyashi limbi ilyo nabelengele kale pali filya fyacitike. Ilyo natambile filimu no kumfwa ifyo bamunyinefwe balelondolola, naumfwile kwati na ine naliculileko. Ica kumwenako ca kwa munyinefwe uwalembele bakalata ku bana bakwe abanono abanakashi ilyo ali mu cifungo, cilankoselesha nga nshi ukuti na ine mfwile ukwesha ukufika bana bandi pa mutima ilyo na ine ndebasambilisha icine ca mu Baibolo. Ndemutasha icine cine! Iyi filimu, yalilenga Inte sha kwa Yehova mu Russia ukumfwa ukuti na bo bene baba mu cilonganino ca kwa Yehova ica mwi sonde lyonse.”—E fyalandile ba Tatyana Kalina, aba ku Irkutsk.

“Filya batila ukumona icintu umuku umo kwawama ukucila ukumfwa fye imiku iingi ukuti e ko caba, fya cine. Iyi filimu ilakoselesha sana, ya cine cine, kabili ilanda pa bantu besu! Pa numa ya kutamba, nalekabila inshita iikalamba iya kutontonkanyapo. Filimu yanengele ukumfwa kwati na ine wine epo nali pali balya baNte batwele ku Siberia. Nomba nga nalinganya ifyo bapitilemo ku fintu mpitamo, nshisakamana sana na pa bwafya bwalekanalekana tukwata pali nomba.”—E fyalandile ba Lidia Beda, aba ku Irkutsk.

Iyi vidio ya Faithful Under Trials (Balishipikishe Ilyo Balecushiwa) yalipangwa mu ndimi 25 kabili abengi bali-itemwa nga nshi mwi sonde lyonse.a Iyi vidio bali-itambishe pa milabasa ya St. Petersburg, na Omsk e lyo ne misumba imbi ya mu Russia, pamo pene ne misumba imbi iya mu calo ca Ukraine iya Vynnytsya, Kerch, Melitopol, na ku Lviv. Nangu fye ni balya abamona amafilimu yapangwa bwino nga nshi kabili ayalumbuka mwi sonde lyonse, balitasha sana pali iyi filimu.

Icalenga ukuti iyi filimu ilefika abantu pa mutima ca kuti ilanga abantu abengi nga nshi abashipile icine cine no kukosa mu kupepa Lesa ilyo balecushiwa pa myaka iingi. Cine cine Inte sha kwa Yehova mu Soviet Union balilangile ukuti bali abakosa te mulandu ne fyo balecushiwa. Na imwe nga mulefwaya iyi vidio, Inte sha kwa Yehova kuti batemwa nga nshi ukumuletela. Mukwai ipusheni Nte uuli onse uwaba mupepi no ko mwikalila.

[Futunoti]

[Abatusuminishe Ukubomfya Icikope pe bula 8]

Stalin: Icikope ca ba U.S. Army

[Abatusuminishe Ukubomfya Icikope pe bula 9]

Stalin: Icikope ca ba U.S. Army