Amepusho Ukufuma ku Babelenga
Bushe umutumwa Paulo takeene ubuKristu ilyo alandile ku ba mu Sanhedrini ukuti: “Ine ndi muFarise”?
Pa kumfwikisha amashiwi Paulo asosele ayaba pa Imilimo 23:6, tulingile ukutontonkanya sana pa mashiwi yashingulwikeko.
Ilyo abaYuda bamwimine mu Yerusalemu, Paulo alandile kwi bumba, ati: “Nasambilishiwe [mu Yerusalemu] ku makasa ya kwa Gamaliele, nafundilwe umwabelo kukonkomesha kwa Mafunde ya fikolwe.” Nangu ca kuti balya bantu balikutike ku fyo Paulo aleisosela pa nshita inono, mu kuya kwa nshita balikalipe, kabili mushika mukalamba uwa fita uwalemushindika amusendele ku nkambi ya fita. Ilyo bashilatendeka ukumulopola ifikoti Paulo atile: “Bushe imwe mwalisuminishiwa ukufopaula umuntu uuli mwina Roma kabili uushilapingulwa?”—Imilimo 21:27–22:29.
Ubushiku bwakonkelepo mushika mukalamba asendele Paulo ku Sanhedrini, icilye cikalamba ica baYuda. Paulo alilolekeshe sana no kumono kuti abapangile icilye ca Sanhedrini baSaduke na baFarise. Lyena atile: “Mwe baume, bamunyinane, ine ndi muFarise, umwana wa baFarise. Pe subilo lya kubuushiwa kwa bafwa e po ndepingwilwa.” Ne cafuminemo ca kuti ifikansa fyalimine pa baSaduke na baFarise, ‘pantu abaSaduke baleti takwaba kubuushiwa nangu ni malaika nangu mupashi, lelo abaFarise basumine muli ifi fyonse.’ Bamo abali mu cakaniko ca baFarise baliimine balabike fikansa nga nshi, abati: “Tatusangile icibi muli uyu muntu.”—Imilimo 23:6-10.
Apo Paulo alishibikwe ukuti Mwina Kristu uwacincila, nga tashinine icilye ca Sanhedrini ukuti ali muFarise wakamamo na menshi. AbaFarise bali muli cilya cilye nga tabapokelele umuFarise onse uushasumine mu fisambilisho fyabo fyonse. E co amashiwi ya kwa Paulo aya kuti muFarise yalolele mu kuti ali nga baFarise mu fintu fimo fimo, kabili umu mwine e mo abaFarise abali mu cilye baumfwilile amashiwi yakwe.
Filya Paulo asosele ukuti alepingulwa pa mulandu we subilo lya kubuushiwa kwa bafwa, aloseshe mu kuti ali nga baFarise pantu na bo balisumine mwi subilo lya kubuushiwa kwa bafwa. E co mu kukansana pa lwa kubuushiwa kwa bafwa, ifyo Paulo asuminemo nga fyalyampene ne fyasuminemo abaFarise ukucila ifyasuminemo abaSaduke pantu bena tabasumine mu kubuushiwa.
Ifyo Paulo Umwina Kristu asuminemo tafyalepinkana ne fyo abaFarise basuminemo pa lwa kubuushiwa, bamalaika, na pa Mafunde yamo yamo. (Abena Filipi 3:5) E co muli ifi fine fisumino fimo fimo, e mo Paulo ayampenye ku baFarise, kabili ni muli iyi ine nshila e mo balya abali mu Sanhedrin baumfwilile amashiwi yakwe aya kuti ali umuFarise. Kanshi abomfeshe ubuYuda pa kuipokolola ku bali mu cilye cikalamba ica baYuda ba mpatila.
Lelo, ubushininkisho bukalamba ubulangilila ukuti Paulo takeene ubuKristu bwa kuti Yehova alitwalilile ukumusenamina. Ubushiku bwakonkelepo libe ninshi Paulo nasosa kale aya mashiwi, Yesu atile kuli wena: “Shipa! Pantu filya fine waleshimikisha ubunte ulwa ine mu Yerusalemu, e fyo ufwile no kushimika ubunte na ku Roma.” Kanshi kuti twasondwelela ukuti Paulo takeene ubuKristu bwakwe pantu Lesa alitwalilile ukumusenamina.—Imilimo 23:11.