Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Nga e fyo cali, moneni nga kuti mwayasuka amepusho yakonkapo:

• Mulandu nshi basalile December 25 ngo bushiku bwa kusefeshapo ukufyalwa kwa kwa Yesu?

Icebo ca kwa Lesa tacalanda ubushiku Yesu afyelwe. Icitabo ca Enciclopedia Hispánica citila: “Ubushiku bwa December 25 ubo basefeshapo Krisimasi te bushiku bwine bwine ubo Yesu afyalilwepo, lelo ubu, bushiku ubo abena Roma balesefeshapo imitebeto iyalebako muli ba December ilyo akasuba kataluka sana ku equator.” Akale abena Roma balesefya ukutula kwa kasuba mu mpepo kabili balecite mitebeto, ukukafye congo, no kupeeleshanya ifya bupe.—12/15, amabula 4-5.

• Ukulingana ne Imilimo 7:59, bushe Stefani apepele kuli Yesu?

Iyo. Baibolo itila amapepo yalingile ukulungatikwa fye kuli Yehova Lesa. Apo Stefani alimwene Yesu mu cimonwa, afwile ayumfwile umuntungwa ukupaapaata kuli wena ukuti: “Mwe Shikulu Yesu, pokeleleni umupashi wandi.” Stefani alishibe ukuti Yesu alipeelwe amaka ya kubuusha abafwa. (Yohane 5:27-29) E ico aipwishe Yesu, nelyo ukumupaapaata, ukuti abakilile umupashi wakwe mpaka akabuushiwe.—1/1, ibula 31.

• Twaishiba shani ukuti inshita ya ku ntanshi iya muntu tayalingilwa kabela?

Lesa alipeela abantu ubuntungwa bwa kuisalila, kanshi teti inshita yabo iya ku ntanshi ilingilwe kabela. Teti tutile Yehova ni Lesa wa kutemwa kabili uwa bupingushi nga ca kuti alilingile kabela ifyo tukacita ilyo tushilafyalwa e lyo aisatulubulwisha pa mulandu wa kucita ifyo fine alingile kabela. (Amalango 32:4; 1 Yohane 4:8)—1/15, amabula 4-5.

• Cinshi cishabelamo amano ukusoso kuti ifipesha amano taficitika?

Basayantisiti bamo baliiluka ukuti baishibapo fye ifinono pa fipesha amano ifyaba mu bubumbo bwa kwa Lesa. Ne ci calenga basumine ukuti tababa na maka ya kusoso kuti ifintu fimo teti ficitike nangu cibe shani. Abengi batemwa ukusosa ukuti limbi teti cicitike.—2/15, amabula 5-6.

• Mulandu nshi Samsone Umupingushi aebele abafyashi bakwe ukuti alefwaya ukuupa umwanakashi umuPelishiti? (Abapingushi 14:2)

Ifunde lya kwa Lesa lyalibindile ukuupa umwanakashi umusenshi. (Ukufuma 34:11-16) Na lyo line, umwanakashi umuPelishiti ‘aliweme’ mu menso ya kwa Samsone. Samsone “alefwaya umwa kulwila na baPelishiti,” kabili umwanakashi alilingile ukubomfiwa nga pa kutendekela. Lesa aletungilila Samsone pa kumupeela umupashi Wakwe.(Abapingushi 13:25; 14:3, 4, 6)—3/15, ibula 26.

• Bushe Umwina Kristu kuti apeela umubomfi wa buteko indalama nangu ica bupe pa kuti amucitile fimo?

Calilubana ukupeela amafisakanwa ku mulashi, nangu ukumupeela ifya bupe ifyaumo mutengo pa kuti afufunkanye milandu nangu pa kuti ucilile abanobe mu mulongo nelyo ukuti bakucitile fimo bwangu bwangu ilyo bambi bashala balelolela. Lelo te mafisakanwa ukupeela ubupe nangu indalama ku mulashi nga ca kuti abomba bwino umulimo nelyo nga mulefwaya ukulembesha fimo mwi funde nangu nga mulefwaya ukuti belamucusha.—4/1, ibula 29.