Ilyashi Lya Bakabilisha Ba Bufumu

Abantu ba Bufumacumi Balacindika Yehova

ISONDE fye lyonse, Inte sha kwa Yehova—abaice kumo na bakalamba—baishibikwa ukuti ba bufumacumi. Moneni ifya kumwenako ukufuma mu fyalo fitatu ifyabela ku ncende shatalukana.

Olusola, umwina Nigeria uuli ne myaka 17, bushiku bumo atoolele icikwama ilyo alefuma ku sukulu pa kuya ku ng’anda. Atwele icikwama ku mukalamba wa pa sukulu, uwapendele indalama no kusanga ukuti shali mupepi na K216,000. Umukalamba we sukulu abweseeshe kafundisha icikwama cakwe icalubile. Uyu kafundisha atashishe Olusola kabili amupeele K33,600 no kumweba ukuti akalipile ku sukulu. Ilyo abana be sukulu bambi baumfwile ifyo Olusola acitile, batendeke ukumupumya. Pa numa ya milungu imo, umwana we sukulu umo balimwibile indalama kabili aebele bakafundisha. Lyene bakafundisha baebelwe ukupikita abana be sukulu bonse. Kafundisha umo aebele Olusola ati: “Iwe iminina apa. Ninjishiba te kuti wibe, pantu uli Nte ya kwa Yehova.” Basangile indalama ku balumendo babili balya bene balepumya Olusola, kabili balikandilwe icabipa. Olusola alembele ati: “Ndi ne nsansa sana pantu nalishibikwa ukuti ndi Nte ya kwa Yehova, kabili nshakatale njiba, ne ci cilaletela Yehova ubukata.”

Bushiku bumo, ilyo ba Marcelo, abena Argentina, balefuma pa ng’anda, basangile icola lwa mupepi na ku numa ya ng’anda yabo. Basendele icola mu ng’anda, kabili baiswile icola pamo na bena mwabo. Calibapapwishe sana ukusangamo indalama ishingi, utu makardi twa kukongwelapo ifintu e lyo na macheke ayo basainepo, imo cheke yafikile kuli 1.5 bilioni kwacha. Basangilemo na invoisi apali inambala ya foni. Batumiine umwine wa cola foni kabili bamwebele ukuyasenda icola cakwe na fyonse ifyalimo ku ncito kwa ba Marcelo. Ilyo umwine wa cola afikile, alemoneka uwasakamana. Umukalamba wa ncito aebele uyu mwaume ukukanasakamana, pa mulandu wa kuti ba Marcelo baali ni Nte ya kwa Yehova. Pa kulambula ba Marcelo pa kubatolela icola, umwine wa cola abapeele fye K24,000. Ici calikalifye umukalamba wa ncito pantu alitemenwe sana pa bufumacumi bwa ba Marcelo. Ici capeele ba Marcelo ishuko lya kulondolola ukuti, apo ni Nte ya kwa Yehova, lyonse fye bafwaya ukuba abafumacumi.

Ku Kyrgyzstan na ko kwalicitike cimo. Rinat, kalume wa myaka 6, asangile icikwama ca bena mupalamano babo, abanakashi. Mu cikwama, mwali indalama mupepi na K120,000. Ilyo Rinat abweseshe icikwama calubile kuli aba banakashi, bapendele indalama kabili baebele banyina kwa Rinat ukuti napabulila K24,000. Rinat atile tasendele indalama. Lyene bonse batatu baile mu kufwaya indalama shabuliile kabili bashisangile mupepi na po Rinat atolele icikwama. Aba banakashi balisungwike. Batashishe Rinat na banyina. Babatashishe pa kubwesha indalama e lyo na pa kuti banyina kwa Rinat balamusambilisha imikalile ya Bwina Kristu.