Kuti Twashipikisha Ubwesho Ubuli Bonse!
BUSHE muleeshiwa? Bushe mulayumfwa abafuupulwa sana ica kuti mwafilwa ukushipikisho bwesho? Bushe inshita shimo mulayumfwo kuti ubwafya bwenu bwaliibela kabili takuli inshila bwingapwilamo? Nge fyo muyumfwa mwisakamikwa! Te mulandu na mesho twingakwata, Baibolo itukoselesha ukuti Lesa kuti atwafwa ukushipikisha.
Baibolo isoso kuti ababomfi ba kwa Lesa ‘bakaponenwa ne fya kwesha ifyalekanalekana.’ (Yakobo 1:2) Moneni shiwi lyabomfiwa pano ilya kuti ‘ifyalekanalekana’ (iciGriki poi·kiʹlos). Ukulingana ne fyo balelibomfya kale, ili shiwi lya ciGriki lyalola mu kuti “ifingi” atemwa “ifyapusanapusana” kabili likomaila pa “fya kwesha ifya misango misango.” Kanshi “amesho yalekanalekana” yaleshila mu misango iyapusanapusana. Na lyo line, Yehova alatwafwa ukushipikisha ubwesho bumo na bumo. Mulandu nshi uwa kukanatwishikila ukuti Yehova kuti atwafwa?
‘Icikuuku ca Bupe Fye Ica kwa Lesa Ica Misango Misango’
Umutumwa Petro atila Abena Kristu ‘balalengwa ubulanda ku fya kwesha fyalekanalekana.’ (1 Petro 1:6) Pa numa muli kalata wakwe uwapuutwamo alandile ukuti, ‘icikuuku ca bupe fye ica kwa Lesa’ ca “misango misango.” (1 Petro 4:10) Ishiwi lya kuti “ica misango misango” lipilibula icintu cimo cine ne shiwi lya ciGriki ilyapilibulwa ukuti “ifyalekanalekana.” Ukulanda pali ili shiwi, uwasoma ifya Baibolo umo atile: “Ili tontonkanyo . . . lya kuti uluse lwa kwa Lesa, [nelyo icikuuku ca bupe fye] poikilos lyalicindama sana, takuli ico ulu luse lwingafilwa ukucimfya.” Kabili atwalilila ukusosa ukuti: “Takuli ubwafya ubwingesa pa bantu ubo uluse lwa kwa Lesa lushingacimfya. Ili shiwi lya ciGriki poikilos litwibukisha uluse lwa kwa Lesa ulwa misango misango ulwakumanina ku kutwafwa ukushipikisha amesho yonse.”
Icikuuku ca kwa Lesa Citwafwa Ukushipikisha Amesho
Ukulingana na Petro, inshila imo iyo Lesa abomfeshamo icikuuku cakwe kupitila mu bantu bapusanapusana mu cilonganino ca Bwina Kristu. (1 Petro 4:11) Umubomfi wa kwa Lesa umo na umo alikwata ifya bupe fya ku mupashi, nelyo ukulamuka, ifingabomfiwa ku kukoselesha abaleeshiwa. (Abena Roma 12:6-8) Ku ca kumwenako, bamo mu cilonganino ni bakasambilisha ba Baibolo abasuma nga nshi. Ifyebo fyabo ifya mano filakosha no kucincisha bambi ukushipikisha. (Nehemia 8:1-4; 8, 12) Bambi na bo balatandalila abalekabila ukwafwa. Ukutandala kwa musango yo kulaba ukwa kukoselesha no ‘kusansamusha imitima.’ (Abena Kolose 2:2) Ilyo bakangalila bacita ubucemi bwa kukosha icitetekelo muli uyo musango, balapeela ifya bupe fya ku mupashi. (Yohane 21:16) Kwaliba na bambi mu cilonganino ababa abayangukililwa, aba nkumbu, kabili abanakilila ilyo baleafwa abasumina banabo ababa mu bulanda pa mulandu wa mesho. (Imilimo 4:36; Abena Roma 12:10; Abena Kolose 3:10) Ukulangulukilako no kucitapo cimo ku kwafwa abaleeshiwa uko aba bamunyinefwe ne nkashi bacita e nshila ikalamba iyo Lesa alangilamo icikuuku ca bupe fye.—Amapinda 12:25; 17:17.
“Lesa wa Cisansamushi Conse”
Icacilanapo ca kuti Yehova alatusansamusha. Ni “Lesa wa cisansamushi conse, uutusansamusha mu bucushi bwesu bonse.” (2 Abena Korinti 1:3, 4) Amano ayaba mu Cebo ca kwa Lesa icapuutwamo no bukose ukufuma ku mupashi wa mushilo fyaba ni nshila ikalamba iyo Yehova asukilamo amapepo yesu ku kutwafwa. (Esaya 30:18, 21; Luka 11:13; Yohane 14:16) Kuti twakoseleshiwa na malayo yapuutwamo ayo umutumwa Paulo alandilepo ilyo atile: “Wa cishinka Lesa, kabili takamuleke ukweshiwa ukucila pa fyo mwingashipikisha, lelo pamo ne ca kwesha akacita na pa kufuminamo ukuti mube na maka ya kucishipikisha.”—1 Abena Korinti 10:13.
Ca cine, te mulandu no musango wa bwesho, lyonse kwakulaba inshila iyo icikuuku ca bupe fye ica kwa Lesa cakulatwafwilamo ukushipikisha. (Yakobo 1:17) Ukwafwa uko Yehova apeela ababomfi bakwe pa nshita yalinga te mulandu no kulekanalekana kwa mesho nelyo amatunko kwaba bushinino bumo ubwa ‘mano ya misango misango nga nshi, aya kwa Lesa.’ (Abena Efese 3:10) Mufwile na imwe mulesuminishako kuli ayo mashiwi.
[Ifikope pe bula 31]
Yehova alatwafwa ukushipikisha amesho ayapusanapusana