“Ukunjafwa Kufuma Kuli Yehova”

Abashimbe Lelo Aba Nsansa mu Mulimo wa kwa Yehova

UMWANAKASHI Umwina Kristu uwa ku Spain atile: “Fwe bengi twaliba aba nsansa nangu ca kuti tatwaupwa.” Mulandu nshi abela uwa nsansa? Atwalilila ukusoso kuti: “Tulasansamuka pantu twalilubukako ku mafya ya mu cupo ayengi pa kuti tulebombela sana Lesa wesu, Yehova.”

Ukuyumfwa umusango yu kulomfwana sana ne fyo Icebo ca kwa Lesa cilanda pa bushimbe. Ilyo umutumwa Paulo alandile pa milandu ya mu cupo, apeele uku kufunda kwapuutwamo, atile: “Ndeeba abashimbe na bamukamfwilwa, ndetila, cisuma kuli bene nga baikala ifyo na ine naba.” Paulo umwine wine ali mushimbe. Nomba mulandu nshi atashishe ubushimbe? Atile uwaba mu cupo alatangalikwa, lelo umushimbe “asakamana ifya kwa Shikulu.” (1 Abena Korinti 7:8, 32-34) Ukubombela Yehova e cikalamba sana icilenga umushimbe ukuba uwa nsansa kabili uwaikushiwa.

Ukubo Mushimbe pa Mulandu wa Kufwaya Ukuipeelesha

Amashiwi ya kwa Paulo kuti yapapusha sana abasumina mu ntambi ishacindamika icupo no kukwata abana. Na lyo line, Yesu Kristu, uushaupile lelo uwali uwa nsansa kabili uwaikushiwa, alandile pa cintu cimo icacindamisha ku Bena Kristu abashimbe. Atile: “Kwaba bamutungwi abaicitile abene bamutungwi pa mulandu wa bufumu bwa mu muulu. Uwingacipokelela acipokelele.”—Mateo 19:12.

Nge fyo aya mashiwi yasosa, abengi basanga ukuti ubushimbe bulabalenga ukubombela Yehova ukwabulo kupumfyanishiwa na mafya yaba mu cupo. (1 Abena Korinti 7:35) Abena Kristu abengi nga nshi balapepa Yehova mu nsansa ukwabula umunabo wa mu cupo, kabili balasekelela apakalamba ico balabombesha mu kwafwa abantu bambi.a

Abena Kristu abengi abashimbe balishiba ukuti te baupana fye beka ababa ne nsansa no kuti te bashimbe bonse ababa no bulanda. Bonse abaupana na bashimbe balaba ne nsansa limo limo e lyo inshita shimbi na sho balaba no bulanda. Na kabushe, Baibolo ukwabulo kupita na mu mbali isoso kuti icupo cilaleto “bucushi mu mubili.”—1 Abena Korinti 7:28.

Ukuba Umushimbe pa Milandu Imo Imo

Abengi tabaitemenwa ukuba abashimbe, kwalibako fimo ifyalenga. Kuti bakumbwa bucibusa ne citemwishi ifiba mu cupo. Nomba kuli bambi, ukubulishe ndalama nelyo ifintu fimbi kuti fyabalesha ukuupa pali nomba. Abena Kristu bamo, sana sana bankashi yesu abatemwikwa, bashimbe pantu basalapo ukumfwila ukufunda kwa mu Baibolo ukwa ‘kuupilwa fye muli Shikulu.’ (1 Abena Korinti 7:39) Ba cishinka ica kuti bafwaya fye ukuupwa ku muntu uupepa Yehova uwaipeela kabili uwabatishiwa.

Limo limo, abashimbe bamo balatalalilwa. Umwina Kristu umushimbe alandile ukuti alatalalilwa kabili atwalilile ukusosa ukuti: “Twalishiba ifunde lya kwa Yehova kabili tatufwaya ukumufulwisha mu nshila iili yonse. Kuti twatemwa ukukwata umwina mwesu, lelo te mulandu ne fyo abashipepa bengesha ukutufwaila uwa kuupwako, tusalapo kuba abashimbe. Tatufwaya fye no kuba ifibusa fya baume na banakashi abashasumina.” Abena Kristu ba musango yo balinga ukutashiwa pa fyo bomfwila ukufunda kwa mu Baibolo no kusungilila ifipimo fya kwa Yehova pa kuti fye bamuteemune te mulandu ne fyo basakamikwa.

Yehova Alabaafwa Apakalamba

Yehova wa cishinka ku baba ne cishinka kuli wena mu milandu pamo ngo yu wine uwa kukanaupwa ku bantu abashimubombela. Davidi uwaimwenene ifyo Yehova aba atile: “Ku wa cishinka [mwe Yehova] mukaba ne cishinka.” (Amalumbo 18:25) Kabili Lesa alaya aba busumino kuli wena ukuti: “Nshakakushe nakalya nangu kukulekelesha nakalya.” (AbaHebere 13:5) Nga tulapashanya Yehova, twakulatasha Abena Kristu abashimbe bonse abomfwila Icebo ca kwa Lesa. Na kabili twakulabapepelako ukuti Yehova alebakosha pa kuti balecimfya amafya balolenkana na yo.—Abapingushi 11:30-40.

Abena Kristu abashimbe abengi basanga ukuti ukulabombesha mu mulimo wa kusambilisha abantu Baibolo kulabasansamusha nga nshi. Ku ca kumwenako, natulande pali baPatricia, abashimbe abali ne myaka ukucila pali 30 kabili ni bapainiya wa nshita yonse. BaPatricia batila: “Nangu ca kuti kulaba ukweshiwa sana ilyo uli umushimbe, lelo ukubo mushimbe kwalilenga ukuti imbe painiya wa nshita yonse. Apo ndi mushimbe, kuti nayalula ifyo ndefwaya ukucita inshita iili yonse, ici calilenga ukuti ndebelenga sana. Kabili nalisambilila ukushintilila sana pali Yehova, sana sana ilyo nde-eshiwa.”

Ifyebo fya musango yo filomfwana sana no bulayo bwa mu Baibolo ubutila: “Konkomwena pali Yehova inshila yobe, kabili mutetekele, na o akacita.” (Amalumbo 37:5) Na kabushe, bonse abapepa Yehova mu cishinka, abaupana nelyo abashimbe, kuti basansamushiwa no kukoshiwa nga babelenga aya mashiwi yapuutwamo ayatila: “Ukunjafwa kufuma kuli Yehova.”—Amalumbo 121:2.

[Futunoti]

[Amashiwi pe bula 9]

“Uushaupa asakamana ifya kwa Shikulu, umo engateemwina Shikulu.”—1 ABENA KORINTI 7:32

[Akabokoshi pe bula 8]

IFYO UMO ENGACITA PA KUSANGA INSANSA MU BUSHIMBE

Yesu uushatalile opa atile: “Ica kulya candi kucito kufwaya kwa wantumine no kupwisho mulimo wakwe.”—Yohane 4:34.

Abana banakashi bane aba kwa Filipi abashimbe balipimpile mu mulimo wa ‘kusesema.’—Imilimo 21:8, 9.

Bankashi abashimbe baba lubali lwa ‘mulalo ukalamba uwa banakashi ababila imbila nsuma.’—Amalumbo 68:11.