Bushe Yesu ni Lesa Nelyo Muntu?

“N INE lubuuto lwa pano calo. Uukonka ine takende mu mfifi nakalya, lelo akaba no lubuuto lwa bumi.” (Yohane 8:12) Uwalandile aya mashiwi ni Yesu Kristu. Umwaume wasambilila uwa mu mwanda wa myaka uwa ukubalilapo alembele pali Yesu ukuti: “Ifyafiswa bwino bwino muli wene fyuma fyonse ifya mano no kwishiba.” (Abena Kolose 2:3) Kabili, Baibolo itila: “Awe ubu e bumi bwa muyayaya, ukuti baleishiba imwe, mwe Lesa wa cine mweka, no yo mwatumine, Yesu Kristu.” (Yohane 17:3) Ukwishiba Yesu bwino bwino kwalicindama pa kuti twingekusha ukufwaisha twakwata ukwa ku mupashi.

Abantu abengi balishiba ilyashi lya kwa Yesu Kristu. Ukwabula no kutwishika ifyo acitile fyalyambukila abantu abengi. Na kuba Kalenda abantu abengi babomfya mu fyalo ifingi yashipwa pa bushiku batunganya ukuti e bo Yesu afyalilwepo. Ne citabo ca The World Book Encyclopedia calondolola ukuti: “Abantu abengi balosha ku nshiku shali pa ntanshi ya mwaka wa kufyalwa kwa kwa Yesu ukuti ni B.C., e lyo na A.D., nelyo anno Domini (mu mwaka wa kwa Shikulu), ukulosha ku nshiku pa numa ya ulya mwaka.”

Na lyo line, abantu abengi tabaishiba bwino untu Yesu aba nomba. Abantu bamo baishiba ukuti Yesu ali fye muntu nga ifwe bene ni co ena alishibikwe sana. Bambi na bo balamupepa nga Lesa Uwa maka yonse. AbaHindu bapashanya Yesu Kristu kuli Krishna lesa wa baHindu, uo abengi batila alafyalwa cipya cipya. Bushe Yesu ali muntu fye, nelyo alilingile ukumupepa? Bushe Yesu mu cine cine ali nani? Ni kwi afumine? Ali muntu wa musango nshi? Ni kwi Yesu aba nomba? Nga fintu twalamona mu cipande cikonkelepo, icitabo icilanda sana pali Yesu calapeela amasuko ya cine cine kuli aya mepusho.