“Ubu Bushiku Bwaliweme Sana Kuli Ine”

AKABUNGWE kamo aka buteko ku Australia akafwilisha abakungumana imitima katile: “Ukukungumana umutima nakuseeka icine cine kabili e bwafya bulecusha sana abalumendo na bakashana.” Ukufwailisha kulanga ukuti abalumendo na bakashana abena Australia napamo 100,000 balakungumana umutima cila mwaka.

Abena Kristu bacaice na bo bene balakungumana umutima. Na lyo line, ukutetekela Yehova kwalyafwa abalumendo na bakashana abengi ukucimfya ukukungumana umutima no kutunguluka ilyo bali abaice. Nomba, bambi nga bamone fyo, balafwaya ukwishiba icilenga ukuti Abena Kristu bena bacimfye ubu bwafya. Bushe bacimfya shani?

Tontonkanyeni pa cacitike kuli Claire, uwa myaka 18. Claire na banyina baba mu cilonganino ca Nte sha kwa Yehova ku Melbourne. Ilyo bawishi babutwike abakashi na bana, Claire alikungumene umutima. Lelo icitetekelo cakwe muli Wishi wa ku muulu, Yehova, cali fye icakosa. Bushiku bumo, dokota, uwe shina lya Lydia, aile ku mwabo Claire mu kupempula banyina kwa Claire, abalelwala. Pa numa ya kubapempula, alisendeleko Claire muli motoka wakwe ukuya ku matuuka. Ilyo baleya, dokota aipwishe Claire nga ca kuti alikwata umulumendo uo enda nankwe. Claire alondolwele ukuti apo ni Nte ya kwa Yehova, takwata umwaume wa kwenda nankwe. Ici calipapwishe ulya dokota. Claire alondolwele ifyo Baibolo yamwafwa ukupingula bwino pa fintu. Lyene, Claire alaile ukutwalila dokota icitabo camwafwile sana icilanda ifya mu Baibolo. Ici citabo citila, Ifipusho Abacaice Bepusha Ifyasuko Fibomba.

Ilyo papitile inshiku shitatu pa numa ya kupokelela icitabo, baLydia batumine lamya kuli banyina kwa Claire ukubeba ukuti baliipakishe ukubelenga icitabo. Balombele ifitabo na fimbi 6 ifya kupeela abo balebomba na bo. Ilyo Claire atwele ifitabo kuli baLydia, batile balitemenwe sana pa citetekelo Claire akwete. Claire aipwishe uyu dokota nga kuti atemwa ukulasambilila nankwe Baibolo, na o alisumiine.

Pa myeshi iingi, Claire alesambilila Baibolo no yu dokota ku ncito pa nshita ya kutuusha. Lyene baLydia baipwishe Claire nga kuti atemwa ukulanda pa lyashi lya kukungumana umutima ku balumendo na bakashana ilyo kwali no kuba ukukumana no kulanshanya pa kukungumana umutima. Nangula ali no mwenso, Claire alisumiine. Abantu ukucila pali 60 e basangilwe kuli uku kukumana. Abakalamba bane, abasambilila sana ifya bongobongo wa muntu, e batungulwile muli uku kulanshanya. Lyena, yali ni nshita ya kwa Claire iya kulanda. Akomaile pa fyo cacindama ku balumendo na bakashana ukupanga icibusa na Lesa. Alondolwele ukuti Yehova Lesa alasakamana sana abaice kabili alafwa bonse abafwaya ukwafwiwa no kusansamushiwa. Kabinge, alandile na pa fyo asuminamo ukuti nomba line Yehova akafumyapo ukulwala konse fye no kukungumana umutima. (Esaya 33:24) Cinshi cacitike pa numa ya kushimika ubunte bwawame fi?

Claire atila: “Abengi banjebele ukuti balitemenwe sana ukumfwa umukashana alelanda pali Lesa. Nashalike ifitabo 23 ifya Abacaice. Abakashana batatu abakutikeko bampeele amanambala yabo aya lamya. Umo pali aba bakashana nomba alasambilila Baibolo. Ala ubu bushiku bwaliweme sana kuli ine.”