“Ukunjafwa Kufuma Kuli Yehova”
Yehova Alapaala Abaipeelesha
UMWAUME mu calo ca Cameroon acofa incinga ukupita mu mutengo umwaba imiti iyatitikana. Pa maawala ayengi, apita mu misebo iyaisulamo amenshi kabili umwaba amatipa, abika umweo wakwe mu busanso pa kuti fye akoseleshe bambi. Bamunyinefwe babili mu Zimbabwe benda amakilomita 15 pa makasa ukwabuka imimana iyapoosa. Kabili basenda ifya kufwala ne nsapato pa mutwe pa kuti fibomba ku menshi. Kumbi nako, namayo ema lucelocelo ukuya mu kutungulula isambililo lya Baibolo kuli nasi uufwaya fye ukulasambilila ulucelo pantu e lyo akwata inshita.
Bushe ifi fya kumwenako fitatu fipalene shani? Bonse batatu ni bakabomba ba nshita yonse aba Nte sha kwa Yehova abasambilisha bambi icine ca mu Baibolo. Bakabomba ba nshita yonse, ni bapainiya ba nshita yonse na bapainiya baibela, bamishonari, ukusanshako fye na bengi abalebomba pa maofesi ya musambo mu calo conse. Aba beshibikilwa ku kuipeelesha kwabo.a
Icilenga Ukuti Baleipeelesha
Inte sha kwa Yehova bomfwila ukukonkomesha kwa mutumwa Paulo kuli Timote ukwa kuti: “Uibikilisheko ukuipeela kuli Lesa ngo wasuminishiwa, umubomfi uushingaba na ca kukwatilapo insoni, uulungika bwino icebo ca cine.” (2 Timote 2:15) Cinshi cilenga baNte abengi ukubomba umulimo wa nshita yonse?
Lintu bakabomba ba nshita yonse babepusha icalenga ukuti balebombesha mu mulimo wa kwa Yehova, batila kutemwa Yehova na bantu ba nabo e kwalenga ukuti balebombesha. (Mateo 22:37-39) Uku kutemwa kwalicindama, pantu nangu umuntu e ngabomba shani nga takwete ukutemwa te kuti cimwafwe nakalya.—1 Abena Korinti 13:1-3.
Umulimo Wa Kuipeelesha
Abena Kristu baipeela bonse balipokelela ubwite bwa kwa Yesu ubwa kuti: “Umuntu nga alefwaya ukunkonka, aikaane umwine, asende icimuti cakwe ica kucushiwilwapo, alenkonka.” (Mateo 16:24) Ukuikaanya cipilibula ukuipeela mu kuitemenwa kuli Yehova Lesa na Yesu Kristu pa kuti baletutungulula. Ici, calenga abengi ukuipeelesha no kutendeka ukubomba umulimo wa nshita yonse.
BaNte abengi balabombesha ukulundulula umulimo wabo kuli Yehova. Umfweni ifyalanda baJúlia abali ne myaka 56, bapainiya wa nshita yonse abekala mu São Paulo, mu Brazil. Bashimika ukuti: “Munyinane umwina China antumine lamya ukunjipusha nga kuti natemwa ukusambilila iciChinese. Apo nali umukalamba, nshaletontonkanya ukutila kuti nasambilila ululimi ulupya. Lelo lintu papitile inshiku shinono, nalisumine ukusambilila nangu ca kuti tacayangwike. Pali ino nshita, ndashimikila Icebo ca kwa Lesa mu ciChinese.”
Lipoti ukufuma kwi Ofesi lya musambo mu Peru yatila: “Mu myaka ya nomba line, bapainiya wa nshita yonse abengi baleshimikila mu fifulo ifishapeelwa ukushimikilwamo. Balishipa kabili bali-ipeelesha. Bakuukila ku fifulo ifyabela ukutali, ukushaba ifyo abantu bafwaya mu mikalile kabili uko cayafya ukusanga incito. Aba bamunyinefwe na bankashi bali-itemenwa ukwangusha imikalile yabo pa kuti fye batwalilile ukushimikila. Nangu kube amafya yonse aya, icacindama sana, fisuma ifilefuma mu mulimo wabo uwa kushimikila. Lipoti ukufuma kuli bakangalila benda yalanda ukuti, pa mulandu wa kubombesha kwa aba bapainiya baipeelesha aba nshita yonse, kuliko amabumba ayapya ayapangilwe aya Nte sha kwa Yehova.”
Abena Kristu bamo babika umweo wabo mu busanso pa kuti bafwilishe abasumina banabo. (Abena Roma 16:3, 4) Kangalila wa muputule uwalebombela mu cifulo umwali inkondo mu Afrika alanda ukuti: “Lintu nshilafika pa ncende ya kulekelesha apo bacilike umusebo, pa kati ka ncende yalimo abasangukile ubuteko e lyo ne ncende yaletungululwa no buteko, abakalamba ba bashilika bane na balebalinda bashingulwike ine no mukashi wandi, no kutwipusha uko twafumine. Lintu balebebeta amakardi yesu aya kwishibikilwapo, bamwene ukuti twafumine ku ncende yaletungululwa no buteko, batendeke ukututunganya. Bampeele umulandu wa kuti ndi nengu. E ico, bapingwile ukumpoosa mu cilindi. Nabebele ukuti tuli Nte sha kwa Yehova, kabili balitulekele twapita.” Bamunyinefwe mu filonganino batandalile balitashishe pa fyo ulu lupwa lwaipeeleshe pa kubatandalila!
Nangu ca kuti mulaba amafya mu kubomba uyu mulimo, impendwa ya bakashimikila ba nshita yonse iya mwi sonde lyonse ilekula. (Esaya 6:8) Aba babomfi aba mukoosha balicindamika ishuko bakwata ilya kubombela Yehova. Pa mulandu wa kuipeelesha kwabo, abantu abengi balelumbanya Yehova. Yehova na o, alebapaala nga nshi. (Amapinda 10:22) Ukucetekela ukuti Yehova akatwalilila ukubapaala kabili no kubafwilisha, kwalilenga aba bakabomba bakosa ukumfwa nga filya kemba wa malumbo aumfwile lintu aimbile ukuti: “Ukunjafwa kufuma kuli Yehova.”—Amalumbo 121:2.
[Futunoti]
a Moneni Kalenda wa Nte sha kwa Yehova uwa mu 2005, pa myeshi ya November na December.
[Amashiwi pe bula 9]
“Abantu bobe bakaipeela abene mu bushiku ukemya umulalo wa fita fyobe.”—AMALUMBO 110:3, NW.
[Akabokoshi pe bula 8]
YEHOVA ALATEESA ABABOMFI BAKWE ABAIPEELA
“Beni abashangila, abashitelententa, abacincila pe mu mulimo wa kwa Shikulu, pa kwishibo kuti ukucucutika kwenu te kwa fye muli Shikulu.”—1 Abena Korinti 15:58.
“Lesa tali uushalungama uwa kuti alabe umulimo wenu no kutemwa uko mwalangile kwi shina lyakwe.”—AbaHebere 6:10.