Bamalaika—Bushe Ni Bani?

IMFUMU ya calo cakwatisha amaka tayisumine ifyo ilemona. Abaume batatu abo bapingwilile ukwipaya mwi lungu lya mulilo babapususha! Nani abapususha? Imfumu yasosa ku bapuswike ukuti: “Acindikwe [Lesa wenu], uutumine malaika wakwe, no kutuula ababomfi bakwe abamutetekela.” (Daniele 3:28) Napapita imyaka iingi sana apo uyu kateka wa Babiloni aimwenene na menso yakwe ilyo malaika apuswishe abalumendo. Kale abantu abengi balisumine muli bamalaika. Pali lelo, abengi tabasumina fye ukuti bamalaika e ko baba, lelo bayumfwa no kuti bamalaika e babatungulula. Bushe bamalaika ni bani, kabili baishilebako shani?

Baibolo itila bamalaika mipashi, filya fine Lesa na o aba Umupashi. (Amalumbo 104:4; Yohane 4:24) Bamalaika baba amamilioni ayengi nga nshi. (Ukusokolola 5:11) Bonse ni “mpalume sha maka.” (Amalumbo 103:20) Nangu cingatila bamalaika baba kwati bantunse apantu balikwata imibele na amaka ya kuisalila, lelo bena tababumbilwe nga fintu abantunse babumbilwe. Na kuba, Lesa abumbile bamalaika kale sana ilyo ashilabumba abantu ne sonde. Baibolo itila ilyo Lesa ‘ashimpile icalo intanda sha lucelo [bamalaika] shayawilile utupundu pamo, na bana baume bonse aba kwa Lesa baliweleshe.’ (Yobo 38:4, 7) Apo Lesa e wabumbile bamalaika, betwa ukuti abana baume ba kwa Lesa.

Mulandu nshi Lesa abumbile bamalaika? Finshi bamalaika bacitila abantunse? Bushe bamalaika balatwafwa lelo? Apo bamalaika balikwata amaka ya kuisalila ifyo balefwaya ukucita, bushe kwalibako bamo abakonka inshila ya kwa Satana Kaseebanya no kuba abalwani ba kwa Lesa? Baibolo ilasuka bwino aya mepusho.