Amepusho Ukufuma ku Babelenga

Bushe mu cipao ca cipingo mwali fye ifipapatu fya mabwe fibili, nangu balisungilemo ifintu na fimbi?

Lintu balepeela itempele ilyakuulile Solomone mu 1026 B.C.E., “tamwali kantu mu cipao, kano ifipapatu fibili ifyo Mose abikilemo mu Horebu, ilyo Yehova apingene icipingo na bena Israele pa kufuma kwabo mu Egupti.” (2 Imilandu 5:10) Nomba te fipapatu fye balesungilamo.

“Mu mweshi uwalenga itatu ku kufuma kwa bana ba kwa Israele mu calo ca Egupti,” bafikile mu matololo ya Sinai. (Ukufuma 19:1, 2) Lyena, Mose aninine Ulupili lwa Sinai kabili apokele ifipapatu fya mabwe fibili apalembelwe Amafunde. Ashimika ukuti: “Awe nalyalwike no kutentemuko lupili no kubika amabwe yapaapaatala mu cipao ico napangile, ukuti yabelelele mulya, nga filya fine Yehova anjebele.” (Amalango 10:5, NW) Ici cipao ico Yehova aebele Mose ukupanga no kubikamo ifipapatu fya mabwe apalembelwe Amafunde cali fye ca pa nshita inono. (Amalango 10:1) Pali ilya nshita ninshi tabalapwisha ukupanga icipao ca cipingo. Bapwishishe ukupanga mu 1513 B.C.E.

Lintu fye abena Israele babalubwile mu Egupti, batendeke ukung’winta pa fya kulya. E co Yehova abapeele mana. (Ukufuma 12:17, 18; 16:1-5) Lyena Mose aebele Aarone ukuti: “Buula mulongwe umo, bikamo na Mana umwisulo wa lupe, no kumubika ku cinso ca kwa Yehova, ku kubakililwa ku nkulo shenu.” Ici calembwa citila: “Ifyo Yehova aebele Mose, e fyo Aarone amubikile ku cinso ca Cishimiko [umo balesungila ifintu ifyacindama], ku kubakililwa.” (Ukufuma 16:33, 34) Lilya line Aarone alibulile umulongwe no kubikamo mana, lelo taubikile ku cinso ca Cishimiko mpaka Mose apwile ukupanga Icipao no kubikamo ifipapatu fya mabwe.

Nge fyo tumwene, bapangile icipao ca cipingo ku kupwa kwa mwaka wa 1513 B.C.E. Ilyo papitile inshita, inkonto ya kwa Aarone nayo baibikile mu Cipao pa numa lintu Kora na banankwe bapondweke. Umutumwa Paulo alandile pa “mbokoshi ya cipingo . . . , umwali inongo ya golde iyabamo mana ne nkonto ya kwa Aarone iyabalwile amaluba, ne fipaapaatu fya cipingo.”—AbaHebere 9:4.

Mana yali ca kulya ico Lesa apeele abena Israele pa myaka 40 iyo baendawike mu matololo. Ilyo batendeke ukulya “ifisabo fya mu calo” ico babalaile, Lesa alilekele ukubapeela mana. (Yoshua 5:11, 12) Umulandu inkonto ya kwa Aarone baibikile mu cipao ca cipingo wa kuti yali cishibilo nelyo ubushininkisho bwa kuti bali ni nkulo ya bucipondoka. Ici nalimo cilolele mu kuti inkonto yatwalilile ukuba ku cinso ca Cishimiko pa nshita yonse iyo abena Israele bale-endauka mu matololo. Kanshi kuti twasondwelela ukuti pa numa abena Israele baingile mu Calo ca Bulayo kabili lintu inshita ya kupeela itempele Solomone akuulile ishilafika, inkonto ya kwa Aarone no mutondo waiswilemo mana balififumishe mu cipao ca cipingo.