Balitemwa Ukucita Ukufwaya kwa kwa Lesa
YESU alangile Abena Kristu bonse icilangililo cisuma lintu apepele kuli Wishi ati: “Lelo ukufwaya kwenu, te kwandi, e ko kucitwe.” (Luka 22:42) Ababomfi ba kwa Yehova abengi nga nshi pali nomba, aba cumfwila na bo bene bali-ipeelesha ukucita ukufwaya kwa kwa Lesa. Pa babomfi ba kwa Lesa abaipeelesha ukucita ukufwaya kwakwe, paba na bali 52 abapwishishe Isukulu lya Baibolo Ilya Gileadi Ilya Watchtower ilyalenga 120. Pa March 11, 2006, abapwishishe isukulu balitemenwe nga nshi lintu bapeelwe umulimo wa kubombela Lesa mu fyalo fyalekanalekana, nangu ca kuti uko bakaya bakulakwata na mafya yapusanapusana.
Cinshi calenga ukuti aba bapwishishe isukulu babike ubufwayo bwa kwa Yehova intanshi mu mikalile yabo? Ba Chris na bena mwabo ba Leslie, babatumine ukuyabomba umulimo wa bumishonari ku Bolivia. Balondolola icalengele ukubomba uyo mulimo ilyo batila: “Apo twali-ikaana, tulafwaya ukubomba umulimo uuli onse uwa mu kuteyanya kwa kwa Yehova.” (Marko 8:34) Nangu fye ni ba Jason na bena mwabo ba Chere, abo batumine ku Albania, batile: “Umulimo onse uo twabombapo mu kuteyanya kwa kwa Yehova walikwata amafya ya uko. Lelo ifwe twacetekela fye Yehova epela.”
Babakoselesha Ukulakonka Ifyo Yehova Afwaya
Ba George Smith, ababombela pa maofesi ya Nte sha kwa Yehova kabili ababombela ku dipatimenti uko balenga no kukopa ifikope fya mu mpapulo, e bapepele ipepo lya kwiswila programu. Lyena, ba Stephen Lett, ababa mwi Bumba Litungulula ilya Nte sha kwa Yehova, e baali ba ceyamani, kabili basengeele bonse abasangilweko. Abasangilweko bafumine mu fyalo 23, kabili baile ku Watchtower Educational Center iyabela ku Patterson, mu New York, pa kuti bakayeipakisha iyi programu ishaiwamina. Munyina Lett aebele abapwishishe isukulu ukuti bali no kubomba “umulimo uwa maka nga nshi.” Alandile no kuti bakaba na maka ya “kuwisha amalinga ayakosa”—pamo nga ifisambilisho fya bufi ifyo bamishonari bali no kuwisha ukubomfya Amalembo. (2 Abena Korinti 10:4, 5) Na mu kulekelesha batile: “Ala mwandini mukaba ne nsansa sana ilyo Yehova akulamubomfya ukwalula abantu ba mitima iifwaya ukwishiba icine lelo abakwata ifisumino fya bufi abo mukasanga uko mukaya mu kubomba umulimo wenu!”
Ba Harold Jackson, ababomba pa maofesi yakalamba aya Nte sha kwa Yehova, balandile ilyashi lyaleti “Ifintu Fimo Ifyo Mulingile Ukulaibukisha.” Ba Jackson balandile ukuti aba bamishonari bapya tabafwile ukulaba ukuti balingile ‘intanshi ukufwaya ubufumu no bulungami bwa kwa Lesa.’ (Mateo 6:33) Balingile ukulaibukisha ukuti “ukutemwa kulakuula” kabili e kukalenga no kuti bakabombe bwino umulimo wabo. (1 Abena Korinti 8:1) Balandile no kuti: “Lekeni ukutemwa kulemutungulula ilyo mulebomba na bantu bambi.”
Abakonkelepo ni ba Geoffrey Jackson, ababa mwi Bumba Litungulula ilya Nte sha kwa Yehova kabili ababombele bumishonari ukutendeka mu 1979 ukushinta mu 2003, kabili baipwishe abali mwi isukulu abati: “Bushe Mulabomba Umulimo Wenu?” Balandile ukuti bamishonari balingile ukutekanya mu mikalile yabo e lyo na lintu balebomba umulimo wa kushimikila abantu icebo. Kwena Abena Kristu balingile ukubombesha mu mulimo wabo uwa kubyala no kutapilila imbuto sha cebo ca kwa Lesa. Lelo, uulenga umuntu ukumfwikisha Icebo ca kwa Lesa, ni Yehova umwine pantu na kuba ni ‘Lesa e umesha.’ (1 Abena Korinti 3:6-9) Munyinefwe Jackson alandile no kuti: “Yehova aishiba ukuti ni mwe mulingile ukubombesha pa kuti mukose mu kupepa. Nomba cinshi icacindama ico mufwile ukucita? Mulingile ukutemwa Yehova no kutemwa abantu abo mwakulashimikila.”
Ba Lawrence Bowen bakafundisha we sukulu lya Gileadi balandile ilyashi lyaleti “Ishibeni Ifyo Mufwile Ukucita.” Bacinkwileko abasambi ukuti ilyo abena Israele bali mu matololo, Yehova mu cipesha amano alebatungulula no kubacingilila. (Ukufuma 13:21, 22) Nangu fye ni muli shino nshiku, alatutungulula no kutucingilila ukubomfya icilonganino ca Bena Kristu abasubwa no mupashi ababa “luceshi kabili ishintililo lya cine.” (1 Timote 3:14, 15) Bamishonari bapya balingile ukushintilila sana pa cine caba muli Baibolo, pantu e citungulula no kucingilila abantu ba mitima isuma.
Ba Wallace Liverance ababomba umulimo wa bukafundisha mwi sukulu lya Gileadi, na bo bakoseleshe abapwishishe isukulu ukuti tabafwile ukulaba ku cebo ca kwa Lesa icifuma ku “numa” yabo. Kuti twatila icebo ca kwa Lesa cifuma ku numa pantu Baibolo yalembelwe mu myaka ya ku numa sana. E ico filya kacema uuli ku numa eta impaanga, Yehova na o aba ku numa ya bantu bakwe, kabili alabeba ifya kucita ukupitila mu “musha wa cishinka kabili uwashilimuka.” (Esaya 30:21; Mateo 24:45-47) Ukupita mwi sukulu lya Gileadi kwalengele balya abapwishishe isukulu ukulatasha sana pa kukwata umusha wa cishinka. Uyu “umusha” alitupeela na Baibolo wa New World Translation of the Holy Scriptures. Ba Liverance bakoseleshe abapwishishe isukulu abati: “Sendeni ifyebo ifi ifyaba nge cipao, kabili mulesambilisha bambi.”—Mateo 13:52.
Ukucita Ifyo Yehova Afwaya Ilyo Baleshimikila
Mu lyashi lyaleti “Mulefwaisha Ukubila Imbila Nsuma, “ ba Mark Noumair bakafundisha ba mwi sukulu lya Gileadi balondolwele fimo fimo ifyo abali mwi sukulu bapitilemo lintu baleshimikila abantu balesanga pali ilya ine nshita bali mwi sukulu. (Abena Roma 1:15) Lintu baleipusha abali mwi sukulu, ifyo baleasuka fyalangilile fye ukuti cine cine balefwaisha ukubila imbila nsuma inshita yonse.
Abaali mwi sukulu, na kabili balikoseleshiwe ku lyashi lya ba Kenneth Flodin abaipwishe bakangalila batatu abatandalila ifilonganino mu United States. Ba Richard Keller ababombeele kale ku South America, e lyo na ba Alejandro Lacayo, ababombeele ku Central America, balondolwele ifyo bashipikishe amesho yalekanalekana, kabili balandile na pa fisuma fimo ifyo basangile ilyo balebomba umulimo wa bumishonari. Ba Moacir Felisbino balandile pa fintu fisuma nga nshi ifyo basambilile ilyo balebombela capamo na bamishonari bali ku calo bakuliile ica Brazil.
Ba David Schafer baipwishe bamishonari batatu ababomba uyu mulimo pa myaka iingi. Baipwishe ba Robert Jones, Woodworth Mills, na ba Christopher Slay. Aba bamunyinefwe batatu balondolwele ifyo basambilila ukucetekela Yehova lintu bali na mafya. Bakoseleshe abalepwisha isukulu ukuti ifyo basambilile mu kuteyanya kwa kwa Yehova nafibapangasha ukubomba bwino umulimo wa bumishonari. Munyina Mills mu kulekelesha alandile ati: “Icangafwilishe sana mu mulimo wandi, te filya nasambilile mwi sukulu pa fyo twasuminamo, lelo ni filya nasambilile ifya kuba uwaiceefya no kuba ne citemwiko.”
Ba Guy Pierce ababa mwi Bumba Litungulula, e balandile ilyashi likalamba ilyaleti “Yehova Takatale Afilwa.” Adamu alifililwe ukukonka ifunde, lelo bushe ico calangilile ukuti Lesa e wafililwe ukupanga umuntu wa cumfwila? Bushe cine cine Lesa alifililwe ukupanga Adamu uwapwililika nge fyo abantu bamo balanda? Awe mukwai, pantu ‘Lesa alengele abantunse abatambalala.’ (Lukala Milandu 7:29) Kalanda atile ukushipikisha kwa kwa Yesu lintu ali na mesho ayakosesha pano isonde, kwalangilile fye ukuti “Adamu takwete no mwakubepesha lintu abembwike.” Na kuba, ubwesho Adamu akwete ilyo ali mwi bala lya Edene, ubwa kwishibilako nga ca kuti ali ne cumfwila nelyo iyo, tabwakosele nga filya amesho Yesu akwete yakosele kabili ayo acimfishe. Na lyo line, Adamu alifililwe. Nomba, Yehova wena takatale afilwa. Ifyo afwaya ukuti fikacitike, fikacitika. (Esaya 55:11) Munyina Pierce aebele bamishonari bapya ukuti: “Ukuipeelesha kwenu kukalenga mukabe ne shuko lya kucindika Yehova. Shi Yehova lyonse naletwalilila ukuba nenu ukuli konse uko mukayabombela umulimo wenu uwa bumishonari.”
Ilyo Munyina Lett uwali ceyamani apwishishe ukubelenga imitende yafumine ku maofesi ya Nte sha kwa Yehova aya mu fyalo fyalekanalekana, atendeke ukupeela abapwishishe isukulu amadipuloma (e kutila amapepala ayalangilila ukuti balipita mwi sukulu lya Gileadi) e lyo no kubeba uko bali no kuya mu kubombela. Lyena ba Vernon Wisegarver, ababombela pa Bethel pa nshita ntali, bapepele ipepo lya kwisalila programu.
Bonse abasangilweko kuli iyi programu, abali 6,872 bamwene ukuti cine cine iyi programu yabacincisha mu kubomba umulimo wa kwa Lesa. (Amalumbo 40:8) Ba Andrew na ba Anna abaali pa bapwishishe isukulu batile: “Twaliipeele kuli Yehova. Twalaile Yehova ukuti tukacita conse ico akatweba ukucita. Nomba ino nshita, Yehova atweba ukuya ku Cameroon, ku Afrika.” Aba bantu capamo na bambi abapwishishe isukulu balefwaisha ukubomba umulimo uukabalenga ukuba ne nsansa nga nshi. Cine cine, balitemwa ukucita ukufwaya kwa kwa Lesa.
[Akabokoshi pe bula 17]
UKULONGANIKA IFIPENDO FYA BALI MU KALASI
Bafumine mu fyalo: 6
Bakayabombela mu fyalo: 20
Abasambi bonse pamo bali: 52
Imyaka ya kufyalwa nga kwakanya pali umo: 35.7
Imyaka baba mu cine nga kwakanya pali umo: 18.3
Imyaka babomba mu mulimo wa nshita yonse nga kwakanya pali umo: 14.5
[Icikope pe bula 18]
Ikalasi Lyalenga 120 Lyapwisha Isukulu lya Baibolo Ilya Gileadi Ilya Watchtower
Mu mutande uli pe samba, ukupenda kutampile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.
(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.