Ababelenga Ino Magazini Balepusha Ukuti

Bushe Ubufumu bwa kwa Lesa Bwaba mu Mutima Wenu?

Abengi muno calo basumina ukuti bwaba mu mutima. Ne citabo ca kuti The Catholic Encyclopedia e fyo cilanda. Citila: “Ubufumu bwa kwa Lesa . . . ni filya Lesa ateka mu mitima yesu.” Bashimapepo abengi e fyo basambilisha. Bushe Baibolo ca cine isambilisha ukuti Ubufumu bwa kwa Lesa bwaba mu mitima ya bantu?

Bamo batila Yesu e wabalilepo ukulanda ukuti Ubufumu bwa kwa Lesa bwaba mu mitima ya bantu. Ca cine Yesu alisosele ukuti: “Moneni! Ubufumu bwa kwa Lesa buli mu kati ka imwe.” (Luka 17:21) AmaBaibolo yamo pali ili lembo yatila: “Ubufumu bwa kwa Lesa buli muli imwe” nangu ati “buli mu kati kenu.” Bushe ifi aya maBaibolo yalanda e fyo Yesu alepilibula? Bushe kwena alelanda ukutila Ubufumu bwa kwa Lesa bwaba mu mitima ya bantu?

Intanshi, natulande pa fyo umutima wa muntu waba. Baibolo nga yalanda pa mutima wa mampalanya ninshi ilelanda pa fyo umuntu aaba, pa kutontonkanya kwakwe, imibele yakwe, ne fyo amona ifintu. Cilomfwika bwino ukulanda ukuti Ubufumu bwa kwa Lesa ubwacindama sana pa mulandu wa kuti bulaalula abantu baba abasuma, bulaba mu mutima wa muntu, nomba bushe ico kuti cacitika?

Baibolo itweba ukuti: “Umutima wa kufutika ukucile fintu fyonse, kabili walilwalisha; nani engawishiba.” (Yeremia 17:9) Na Yesu umwine atile: “Mu kati, mu mutima wa bantunse, e mufuma amatontonkanyo yabipa: ubulalelale, ubupuupu, ukwipaya, ubucende, ulunkumbwa, ububifi.” (Marko 7:20-22) Tontonkanyeni pali ici: Bushe tamulesumina ukuti ifyabipa ifingi ificitika muno calo fifuma mitima ya bantunse abashapwililika? Nomba Ubufumu bwa kwa Lesa ubwapwililika kuti bwaba shani mu mitima ya bantu iyabe fi? Kanshi Ubufumu bwa kwa Lesa te kuti bube mu mitima ya bantunse nga filya fine icimuti ca myunga cishingatwala amakunyu.—Mateo 7:16.

Ica bubili, tontonkanyeni pa bo Yesu alelandako amashiwi yaba pali Luka 17:21. Pa cikomo 20 patila: ‘Lintu abaFarise bamwipwishe ilyo ubufumu bwa kwa Lesa bwali no kwisa, alibaswike.’ (Luka 17:20) AbaFarise bali balwani ba kwa Yesu. Yesu atile balya baFarise ba bumbimunda tabali na kwingila mu Bufumu bwa kwa Lesa. (Mateo 23:13) Nomba abaFarise nga tabaali na kwingila mu Bufumu bwa kwa Lesa, bushe Ubufumu kuti bwaba mu mitima yabo? Te kuti cicitike! Nomba cinshi Yesu alelandapo?

AmaBaibolo ayengi umo amashiwi ya kwa Yesu yapilibulwa bwino, ifyo yalanda fyalilingana ne fyaba muli Baibolo ya Amalembo ya Calo Cipya. Yamo yatila Ubufumu “buli pa kati kenu” nelyo ati “muli na bo.” Bushe Ubufumu bwa kwa Lesa bwali shani pa kati ka bantu baliko ilya nshita kumo na baFarise? Twalishiba ukuti Yesu e o Yehova Lesa asala ukuba Imfumu ya Bufumu bwakwe. Yesu uwasalilwe ukwisaba Imfumu aali na balya bene bantu alelandako. Alebasambilisha pa Bufumu bwa kwa Lesa kabili alecita ne fisungusho ifyalelangilila ifyo akacita mu Bufumu bwa kwa Lesa. Kanshi filya aali na bo, cimo no kuti Ubufumu bwa kwa Lesa bwali pa kati kabo.

Nga fintu twamona, Amalembo tayalanda ukuti Ubufumu bwa kwa Lesa bwaba mu mitima ya bantu. Lelo Ubufumu bwa kwa Lesa buteko bwa cine ubukawamya ifintu fyonse pano calo nga filya fine bakasesema basobele.—Esaya 9:6, 7; Daniele 2:44.