Icilye Catila Abasanshilwe Tabakwete Mulandu
PA 3 May mu 2007, icilye cikalamba icilolekesha pa nsambu sha bantu ku Bulaya icabela ku France mu musumba wa Strasbourg, catile, abapumine Inte sha kwa Yehova mu calo ca Georgia balilufyenye sana. Icilye casangile ukuti baNte balibacushishe no kubapoka insambu no buntungwa bwabo ubwa kupepa. Icilye kabili capeele abaleteka mu Georgia ilya nshita umulandu wa kutila tabalubulwishe no kukanda abapumine baNte. Cinshi calengele icilye ukupingula ifi?
Pa 17 October, mu 1999, abantu 120 ababa mu cilonganino ca Nte sha kwa Yehova ica Gldani, mu musumba wa Tbilisi, balilongene mu mutende ku kupepa. Awe bamwene fye kwaisa abantu abengi, no walebatungulula ni Vasili Mkalavishvili, uwali kale shimapepo wa ku calici lya Orthodox. Aba bantu baingile umo baNte balongene ninshi nabakwata inkoli ne fyela no kutendeka ukupuma abalongene no kubacena. Na kuba bamo balibacenene sana. Umwanakashi umo balimonawile ilinso ilyo bamumine ne cela. Abantu 16 nelyo ukucilapo balibapumine ica kutila baya na ku cipatala. Ilyo baNte bamo baile ku kapokola ukuti babafwe, basangile umukalamba wa bakapokola uwabebele ati aba ni o, nga acibapuma ukucishapo! Pa balebapuma pali no walekopa na vidio ifyalecitika, kabili aba ku mulabasa balilangishe pa TV ifyacitike e lyo na balepuma baNte balimoneke no kwishibikwa bwino bwino fye.a
BaNte abo bapumine baliile-ilishanya ku buteko, lelo tapali ifyo aba buteko bacitile. Kapokola uo baebele ukulolekesha pa mulandu atile, na o wine apepa kwi calici lya Orthodox, kanshi talefwaya ukuibikamo pantu kuti afyenga abashilufyenye. Filya ubuteko bushakandile balya aba mapepo abakaluka, calengele bapama no kubwekeshapo ukusansa baNte ukucila pa miku 100.
Kanshi pa 29 June mu 2001, Inte sha kwa Yehova balitwele umulandu ku cilye cikalamba icilolekesha pa nsambu sha bantu ku Bulaya.b Icilye capingwile umulandu onse pa 3 May, mu 2007, no kupita mu muli fyonse ifyo balya bantu bacitile baNte. Ici cilye capeele aba buteko umulandu pali filya bashacitilepo nangu fimo pali uyu mulandu. Icilye catile: ‘Wali mulimo wa buteko ukumfwa no kufwailisha bwangu bwangu ifishinka’ pa fyacitike. Ubupingushi bwa cilye bwali bwa kuti: “Ubuteko nga buletekelesha ifya musango yu, abantu kuti basuula amafunde ya calo ukuti tamwaba mulinganya kabili te kuti baleyakonka.”
Mu kulekelesha icilye catile: “Pa mulandu wa kutila ilyo baNte batwele umulandu ku buteko pa 17 October 1999, ubuteko tabwafwailishe ifishinka no kukanda abasanshile baNte, calengele ukuti aba mapepo abakaluka bakonkanyepo ukusansa baNte mu Georgia.”
E ico, icilye catile baNte abo basanshile tabakwete mulandu, kabili capingwile ukuti ubuteko bwa Georgia bulipile baNte ba mu cilonganino ca Gldani pa mpumo babapumine e lyo no kubabwesesha indalama babomfeshe pa kutwala umulandu ku cilye. Inte sha kwa Yehova mu Georgia balitemwa ifi aba mapepo baleka ukubasansa no kubapuma, e lyo ne cacilapo ukuwama balomfwa bwino ukutila ifyo Icilye capingwile fyalilanga ukuti baNte balikwata insambu sha kulongana mu mutende ku kupepa Lesa. Kanshi baNte balatasha sana Shibo, Yehova Lesa, uubatungulula no kubacingilila ilyo balebacusha.—Amalumbo 23:4.
[Amafutunoti]
a Nga mulefwaya ifyebo na fimbi, moneni Awake! ya January 22, 2002, pa mabula 18-24, iyalembwa ne Nte sha kwa Yehova.
b Icilye cikalamba icilolekesha pa nsambu sha bantu ku Bulaya citwa ati The European Court of Human Rights. Ici cilye cicingilila abantu mu fyalo fyaba ku Bulaya pa kuti ubuteko tabunyantile pa nsambu shabo no buntungwa bakwata. Icalo ca Georgia caingile muli ici cipangano pa 20 May 1999, kabili ico calangile ukuti na bena Georgia bene basumina ukulakonka ifyaba mu cipangano.