Imilimo Aba mwi Bumba Litungulula Babomba

ABABA mwi Bumba Litungulula ilya Nte sha kwa Yehova baume baipeela, ababomfi ba kwa Lesa abasubwa no mupashi wa mushilo. Bemininako umusha wa cishinka kabili uwashilimuka, uututungulula, ukutupeela ifya kulya fya ku mupashi, no kutucincisha ukulashimikila imbila nsuma ya Bufumu mu calo conse.—Mat. 24:14, 45-47.

Aba mwi Bumba Litungulula balakumana cila mulungu, ilingi line pali Citatu. Ukukumana cila mulungu kulalenga aba mwi Bumba Litungulula ukwikatana no kulabombela pamo. (Amalu. 133:1) Ababa muli ili bumba baliba na mu makomiti ayalekanalekana. Nge fyo amaparagarafu yakonkapo yalelangilila, komiti imo imo yalikwata imilimo ilolekeshapo iitungilila umulimo wa kushimikila imbila nsuma ya Bufumu.

◼ KOMITI YA BAKAMPANYA: Abapanga iyi komiti ni bakampanya ba makomiti yonse aye Bumba Litungulula e lyo na kalemba. Kalemba na o wine aba mwi Bumba Litungulula. Komiti ya bakampanya yakwata umulimo wa kushininkisha ukuti amakomiti yonse yalebomba bwino. Kabili ilolekesha na pa mafya yakalamba ayesa mu kupumikisha fye, pamo nga ukupakaswa, utuyofi, ne milandu imbi iya mu kampampa iikuma Inte sha kwa Yehova mu calo conse.

◼ KOMITI ISAKAMANA ABABOMBA PA BETHEL: Bamunyinefwe ababa muli iyi komiti e bakwata umulimo wa kusakamana abekala pa maofeshi ya misambo, ukubafwa ukukosha bucibusa bwabo na Yehova, no kubafwa muli fimbi ifyo bakabila mu bumi. Iyi komiti eisala no kwita ababombela pa Bethel kabili e yasuka ifipusho ifikumine umulimo babomba pa Bethel.

◼ KOMITI YA KUSABANKANYA: Iyi komiti e yangalila umulimo wa kupulinta, ukusabankanya, no kutwala impapulo shilanda pali Baibolo ku ncende shalekanalekana mu calo conse. E ilolekesha pali bamashini ba kupulintilako impapulo, ifikuulwa, ne fipe fimbi ifyo utubungwe twalekanalekana utwa Nte sha kwa Yehova tubomfya. Iyi komiti e ishininkisha ukuti indalama shisangulwa isha kwafwilisha umulimo wa mwi sonde lyonse shilebomfiwa bwino.

◼ KOMITI YA MULIMO: Ababa muli iyi komiti e bangalila umulimo wa kushimikila ne milandu iikumine ifilonganino, bapainiya, baeluda, na bakangalila benda. Iyi komiti e ipekanya Ubutumikishi Bwesu Ubwa Bufumu no kwita abasangwa kwi Sukulu lya Gileadi na kwi Sukulu lya Kukansha ilya Butumikishi e lyo na pa numa ukubatuma ukwa kuya mu kubombela.

◼ KOMITI YA KUSAMBILISHA: Iyi komiti e ipekanya amalyashi tukwata pa kulongana kwa muputule, ukwa citungu, na mu filonganino. E ipekanya na masambililo ya ku mupashi aya babombela pa Bethel kabili ilangalila na masukulu yalekanalekana, pamo nga Isukulu lya Gileadi ne Sukulu lya Bapainiya, ukusanshako fye no kufumya amatepu na mavidio ayalanda pali Baibolo.

◼ KOMITI YA KULEMBA: Umulimo wa iyi komiti kumona ukuti impapulo shilanda pali Baibolo shapangwa no kutumwa kuli bamunyina na bankashi e lyo na ku bantu bonse. Iyi komiti e yasuka ifipusho abantu babelenga Baibolo bepusha kabili e ipituluka mu filangililo na mu maautulaini ya malyashi ukumona nga fili fye bwino. Na kabili ilangalila no mulimo wa kupilibula impapulo shilanda pali Baibolo mu calo conse.

Umutumwa Paulo apalenye icilonganino ca Bena Kristu basubwa ku mubili wa muntu kabili akomaile na pa milimo yacindama iyo bonse babomba pamo pene ne fyo bafwana, ifyo batemwana, ne fyo babombela pamo umulimo Lesa abapeela. (Rom. 12:4, 5; 1 Kor. 12:12-31) Yesu Kristu, Umutwe wa cilonganino, e upekanishisha abasubwa ifyo bakabila pa kuti bekatane, balebombela pamo, kabili e ubapekanishisha amasambililo ya mu Baibolo. (Efes. 4:15, 16; Kol. 2:19) Iyi e milimo iyo aba mwi Bumba Litungulula babomba pa kutungulula abantu ba kwa Lesa ukulingana ne fyo Yehova abeba ukupitila mu mupashi wa mushilo.