Twalilileni no ‘Kutemwa uko Mwakwete pa Kubala’
“Utwalilile ukwikatisha ico ukwete.”—UKUS. 3:11.
1, 2. Bushe mwaumfwile shani ilyo mwailwike ukuti ifyo mwalesambilila pali Yehova fyali e cine?
BUSHE muleibukisha ifyo mwaumfwile ilyo mwaishibe ifisuma ifyo Yehova alaya abantu abamumfwila? Nga ca kuti mwalepepa kumbi, bushe mwaumfwile shani ilyo bamulondolwelele ukufwaya kwa kwa Lesa ukulingana ne fyo Baibolo yalanda, nelyo lintu bamulondolwelele amasambilisho yamo ayo mwafililwe ukwishiba kale? Napamo mwaishilekutuluka ukuti uko mwalepepa tabalemusambilisha icine pali Lesa. Ukwabula no kutwishika ino nshita mulomfwa bwino sana pantu mwalishiba icine! Nga ca kutila abafyashi benu Bena Kristu, bushe muleibukisha ifyo mwaumfwile ilyo mwashininkishe ukuti ifyo mwalesambilila pali Yehova fyali e cine ica kuti mwapingulapo no kulacita ifyo fine mwalesambilila?—Rom. 12:2.
2 Aba bwananyina abengi mu cilonganino kuti bamweba ukuti ilyo baishibe icine balitemenwe sana, balipaleme kuli Yehova, kabili balitashishe ukuti alibakulile mu cilonganino cakwe. (Yoh. 6:44) Insansa bakwete shalengele ukuti batendeke ukulabombako imilimo yalekanalekana iya Bwina Kristu. Balitemenwe sana ica kuti balefwaisha ukulaebako bambi ifyo balesambilila. Bushe na imwe e fyo mwaumfwile ilyo mwasambilile icine?
3. Bushe ifintu fyali shani mu cilonganino ca mu Efese ilyo Yesu abalembele kalata?
3 Ilyo Yesu alelanda ku Bena Kristu bali mu cilonganino ca mu Efese, alandile pa ‘kutemwa uko bakwete pa kubala.’ Abena Efese bali ne mibele iisuma iingi, lelo tabatemwe Yehova nge fyo bamutemenwe pa kubala. E ico Yesu abebele ukuti: “Nalishiba imilimo yobe, no kucucutika kobe no kushipikisha kobe, no kuti tawingatekelesha ababi, no kuti waeseshe abatila batumwa, lelo tabali iyo, kabili wabasangile ukuti ba bufi. Kabili ulashipikisha, no kushishimisha pa mulandu we shina lyandi no kufunshika iyo. Lelo, ndi ne ci ica kukushinina, ukuti nuleka ukutemwa uko wakwete pa kubala.”—Ukus. 2:2-4.
4. Mulandu nshi amashiwi Yesu aebele abena Efese yacindamina muno nshiku?
4 Amashiwi Yesu aebele icilonganino ca mu Efese ne filonganino fimbi ayaba mwi buuku lya Ukusokolola yalicindama sana pa mulandu wa fyacitikile Abena Kristu basubwa pa nshita imo ukutendeka mu 1914. (Ukus. 1:10) Na pali ino ine nshita, ukutemwa uko Abena Kristu bamo batemenwe Yehova ne cine kuti kwacepa. Kanshi lekeni tumone ifyo ukulaibukisha no kutontonkanya pa fyo twapitamo ukutula apo twabela Abena Kristu kwingatwafwa ukutwalilila ukutemwa Lesa nga filya fine twamutemenwe pa kubala ne fyo kwingatwafwa ukukosha ukutemwa kwesu no kuba abacincila nga filya twali ilyo twasambilile icine.
Cinshi Calengele Mushininkishe Ukuti ico Mwalesambilila E Cine?
5, 6. (a) Cinshi Umwina Kristu onse afwile ukushininkisha umwine? (b) Cinshi calengele mushininkishe ukuti Inte sha kwa Yehova basambilisha icine? (c) Cinshi cingafwa umo ukuba no kutemwa uko akwete pa kubala?
5 Umuntu onse uuipeela kuli Yehova alatala ‘ashininkisha’ umwine icabo “kufwaya kwa kwa Lesa icisuma kabili icapokelelwa kabili icapwililika.” (Rom. 12:1, 2) Cimo ico afwile ukucita pa kushininkisha umwine icabo kufwaya kwa kwa Lesa kusambilila icine ca mu Baibolo. Ifilenga abantu ukushininkisha ukuti Inte sha kwa Yehova balasambilisha icine filapusanapusana. Bamo bebukisha ukuti ilyo babelengele ishina lya kwa Lesa muli Baibolo nelyo lintu baishibe ificitika ku muntu nga afwa e lyo bayalwike. (Amalu. 83:18; Luk. Mil. 9:5, 10) Bambi bayalwike lintu bamwene ifyo abantu ba kwa Yehova batemwana. (Yoh. 13:34, 35) E lyo bambi nabo balitemenwe ukwishiba umwalola ukukanaba aba pano calo. Baishileishiba ukuti Abena Kristu ba cine tabafwile ukuba mu fikansa fya mitekele ya pano calo nelyo ukulwako inkondo.—Esa. 2:4; Yoh. 6:15; 17:14-16.
6 Ukwishiba amasambilisho twalandapo mu paragrafu 5 e lyo na fimbi ifyo Baibolo isambilisha e kwalengele abengi ukutemwa Lesa. Muletontonkanya pa calengele mushininkishe ukuti ico mwalesambilila e cine. Fwe bantu twalipusanapusana ne fyo tupitamo fyalilekanalekana, kanshi icingalenga imwe ukutemwa Yehova no kucetekela amalayo yakwe nalimo te cingalenga bambi ukucite fyo. Limbi ifyalengele ukuti mutemwe Yehova no kucetekela amalayo yakwe ilyo mwalesambilila Baibolo kuti fyalenga mwaumfwa cimo cine na pali ino nshita. Icine tacayaluka. E ico, ukulatontonkanya pa fyalengele ukuti mutemwe Yehova no kumucetekela e lyo no kulaibukisha ifyo mwaumfwile ilyo mwasambilile icine kuti kwalenga mwatemwa Yehova nga filya fine mwamutemenwe pa kubala.—Belengeni Amalumbo 119:151, 152; 143:5.
Kosheni ‘Ukutemwa uko Mwakwete pa Kubala’
7. Mulandu nshi tulingile ukukosesha ukutemwa uko twakwete pa kubala, kabili kuti twakukosha shani?
7 Mufwile mwalyaluka sana ukutula apo mwaipeelela kuli Yehova. Calicindeme ukuti mwalitemenwe icine pa kubala, lelo ilyo imyaka yaleya ilepita, mwalekabila ukukosha ukutemwa kwenu pa kuti muleshipikisha ilyo muleeshiwa. Yehova alimwafwile ukukosha ukutemwa kwenu. (1 Kor. 10:13) E ico, ifyo mwapitamo imyaka yonse iyi na fyo fine fyalicindama kuli imwe. Fyalimwafwa ukukosha ukutemwa uko mwakwete pa kubala, kabili fyalilenga mwashininkisha mwe bene icabo kufwaya kwa kwa Lesa icisuma kabili icapokelelwa.—Yosh. 23:14; Amalu. 34:8.
8. Bushe Yehova ailondolwele shani kuli Mose, kabili abena Israele baishileishiba shani Lesa bwino?
8 Ica kumwenako fye, tontonkanyeni pa fyo cali ku bena Israele ilyo Yehova abebele ukuti akabafumya mu busha mu Egupti. Lesa aebele Mose ukuti: “Nkaba uo Nkaba.” (Ukufu. 3:7, 8, 13, 14, NW) Yehova alepilibula ukutila ali no kuba untu engaba pa kuti fye alubule abantu bakwe. Ifyo Yehova acitiile abena Israele pa numa, fyalengele bamwishiba ukuti Wa maka yonse, ni Kapingula, ni Ntungulushi, ni Kapususha, ni Mpalume, no kuti e walebapeela fyonse ifyo balekabila.—Ukufu. 12:12; 13:21; 14:24-31; 16:4; Nehe. 9:9-15.
9, 10. Cinshi cingalenga umo ukuti eshibe Lesa, kabili mulandu nshi cawamina ukulatontonkanya pa fyamucitikila ukutula apo mwabela Abena Kristu?
9 Ifyo mupitamo fyalipusana ne fyapitilemo abena Israele. Nangu ca kutila ifyo mupitamo fyalipusana ne fyo abena Israele bapitilemo, nalimo kwaliba fimo ifyamucitikile ifyalengele mushininkishe ukuti Lesa alamusakamana, kabili icitetekelo cenu calikosele. Napamo ifyamucitikile fyalengele mwishibe ukuti Yehova alamupeela fyonse ifyo mukabila, alamusansamusha, nelyo ukuti e umusambilisha. (Belengeni Esaya 30:20b, 21.) Nelyo limbi mwalilwike ukuti Yehova nayasuka ipepo lyenu. Nalimo ilyo mwali no bwafya uwa bwananyina alimwafwilishe. Nangu ilyo mwalebelenga Baibolo mwalisangile amalembo ayamwafwile ukupwisha ubwafya mwakwete.
10 Nga mwashimikilako bambi ifi fyamucitikile, nalimo bamo te kuti fibafike pa mutima nge fyo fyamufika pa mutima. Pantu na kuba ifyamucitikile tafyali cipesha mano. Lelo fyalicindama sana kuli imwe. Cine cine, Yehova ali ifyo alekabila ukuba pa kuti fye amwafwe. Tontonkanyeni pa myaka mwaikala mu cine. Bushe kuti mwaibukisha ifyamucitikile ifyalangile ukuti Yehova alamusakamana? Ukulatontonkanya pali filya fyamucitikile na pa fyo mwaumfwile kuti kwalenga mwatemwa Yehova nga filya fine mwamutemenwe ilyo mwamwene ukuti Yehova alamusakamana. Muletasha pali ifi fyacitike kabili muletontonkanyapo lyonse. Ifyamucitikila filanga fye ukuti Yehova alimutemwa, kabili takuli nangu umo uwingalenga ukuti muleke ukucetekela ukuti Yehova alimutemwa.
Ibebeteni mwe Bene
11, 12. Nga ca kuti Umwina Kristu naleka ukutemwa icine nge fyo acitemenwe, cinshi nalimo cingalenga, kabili finshi Yesu afundile abatumwa bakwe?
11 Nga ca kuti ukutemwa uko mwatemenwe Lesa ne cine nakucepa pali ino nshita, te kutila ninshi Lesa alyaluka. Yehova taaluka. (Mal. 3:6; Yako. 1:17) Na ino ine nshita acili alimutemwa nga filya fine amutemenwe kale. E ico, nga ca kuti bucibusa bwenu na Yehova tabwaba nge fyo bwali kale, bushe cinshi calenga? Bushe nalimo mulandu wa kuti mulesakamikwa sana ne mikalile? Napamo kale mwalepepa lyonse, mwalebelenga sana, kabili mwaletontonkanya sana pa fyo mwalebelenga. Bushe kale mwali abacincila sana mu mulimo wa kushimikila kabili mwalelongana lyonse ukucila ino nshita?—2 Kor. 13:5.
12 Nga mwaibebeta mwe bene, napamo teti mumone ukuti pali ino nshita bucibusa bwenu na Lesa tabwaba nge fyo bwali kale. Lelo nga mwamona ukuti bwalibwelela pa nshi, bushe cinshi calenga? Bushe nalimo mwabika amano ku kupekanishisha ulupwa lwenu ifyo lukabila, ukusakamana ubumi bwenu, na fimbipo, ica kuti mwaleka no kulamona ukuti ubushiku bwa kwa Yehova nabupalama? Kwena caliba fye bwino ukubika amano kuli ifi fintu, lelo Yesu aebele abatumwa bakwe ukuti: “Muyangwe mwe bene epali imitima yenu yafinininwa ku buliili no kukolwakolwa na masakamika ya mikalile, no bushiku bulya bwaisa pali imwe no kupumikisha kwati citeyo. Pantu bukesa pali bonse abaikala pano isonde ponse. E ico, mulelola, inshita yonse ukulapaapaata pa kuti mukapusuke kuli fyonse ifikacitika.”—Luka 21:34-36.
13. Bushe Yakobo apashenye Icebo ca kwa Lesa kuli cinshi?
13 Yakobo, uwapuutilwemo ukulemba ibuuku limo ilya mu Baibolo acincishe Abena Kristu banankwe ukuibebeta ukubomfya Icebo ca kwa Lesa. Atile: “Mube bakacita wa cebo, te bakomfwa fye iyo, e kuibeepa fye. Pantu umuntu nga ni komfwa wa cebo, kabili te kacita, wene aba ngo muntu uulolesha icinso cakwe ica cifyalilwa mu cilola. Pantu alailolesha, no kufumapo, na po pene alabako umusango wa muntu aba. Lelo uulengela mu mafunde yapwililika aya buntungwa no kwikalililamo, uyu muntu, pantu te komfwa wa cilafi, lelo ni kacita wa mulimo, akaba uwa nsansa mu kucita wene.”—Yako. 1:22-25.
14, 15. (a) Bushe Baibolo kuti yamwafwa shani ukulundulula bucibusa bwenu na Yehova? (b) Mepusho nshi nalimo mwingetetulapo?
14 Umuntu nga alefwaya ukushininkisha ukuti alemoneka bwino, alalolesha mu cilola. Ica kumwenako fye, umwaume nga alolesha mu cilola e lyo amona ukuti tai taikele bwino, alaibika bwino. Umwanakashi na o nga asanga ukuti umushishi tauli bwino, alauwamya. E fyo na Malembo yaba, yalatwafwa ukuibebeta. Nga twalinganya imibele yesu ku fyo Baibolo itweba ukuti e fyo tufwile ukuba, ninshi tulebomfya Baibolo kwati cilola. Lelo bushe, mulandu nshi uwa kulolesesha mu cilola nga ca kuti ilyo twaloleshamo twasanga ukuti fimo tafili bwino e lyo twasuulako fye? Nga twalolesha mu “mafunde yapwililika” aya kwa Lesa no kucita ifyo twasanga, e kutila nga twaba “bakacita” wa cebo ninshi tuli ba mano. E ico kanshi, uuli onse uwasanga ukuti ukutemwa Yehova ne cine uko akwete pa kubala nakucepa, kuti cawama ukuipusha aya mepusho yaleti: ‘Mafya nshi ayo ndepitamo, kabili finshi ndecita pa kupwisha aya mafya? Bushe kale nalecita shani nga nakwata amafya ya musango yu? Bushe ifyo nalecita kale nga nakwata amafya fyalipusana ne fyo ncita pali ino nshita?’ Nga ca kuti mwasanga ukuti muli umo mulekabila ukuwamya, mwisuulako fye. Te kwesha ukwikata na ku cani, bombelenipo ilyo line.—Heb. 12:12, 13.
15 Ukwetetula kwa musango yu kuti kwamwafwa ukubika ubuyo ubo mwingafikilisha pa kuti mulunduluke. Umutumwa Paulo afundile Umwina Kristu munankwe Timote ifyo engacita pa kuti alebomba bwino umulimo wakwe. Paulo acincishe Timote uwacaice ukuti: “Etetula pali fi fintu; obelwa kuli fyene, ukuti ukulunduluka kobe kumoneke kuli bonse.” Na ifwe bene tufwile ukulatontonkanya pa fyaba mu Cebo ca kwa Lesa pa kuti twishibe ifyo twingacita pa kuti tulelunduluka.—1 Tim. 4:15.
16. Finshi mufwile ukucenjelako ilyo muleibebeta ukubomfya Amalembo?
16 Ishibeni ukuti nga mwaibebeta bwino bwino, mukasanga ukuti mwalikwatako ubunake bumo. Nalimo nga mwasanga ukuti mwalikwata ubunake kuti mwafuupuka, nomba te kwesha ukufuupuka. Pantu na kuba, ico muleibebetela kufwaya ukuti mumone umo mulekabila ukuwamyako. Kwena, Satana afwaya Abena Kristu ukulamona kwati tabalinga ukulapepa Lesa pa mulandu wa kuti tabapwililika. Na kuba, Satana atila Lesa tasekelamo mu fyo abantu bamubombela. (Yobo 15:15, 16; 22:3) Ubu e bufi ubo Yesu asuushishe; Lesa amona ifwe bonse ukuti twalicindama sana. (Belengeni Mateo 10:29-31.) Lelo ukwishiba ukuti tamwapwililika kufwile ukulenga ukuti mulefwaisha ukulabomba bwino, kabili Yehova akulamwafwa. (2 Kor. 12:7-10) Nga ca kutila mulalwalilila nelyo muli bakoloci kabili tamubombesha mu mulimo wa kwa Lesa, lyena bikeni ubuyo ubo mwingafishapo, lelo mwinenuka nelyo ukuleka ukutemwa kwenu ukucepa.
Fingi Ifyo Tulingile Ukutashishapo Lesa
17, 18. Busuma nshi bwaba mu kukosha ukutemwa uko mwakwete pa kutendeka?
17 Ukutemwa kwenu nga kulekulilako, mukapaalwa nga nshi. Mukeshiba Lesa bwino kabili mukalamutasha pa fyo amutungulula cikuuku cikuuku. (Belengeni Amapinda 2:1-9; 3:5, 6.) Kemba wa malumbo atile: “Mu kufibaka [ifya bupingushi fya kwa Yehova] e mukonke cilambu icikalamba.” “Ukushimika kwa kwa Yehova kwa cishinka, kulengo wapelwa amano ukubo wa mano.” Na kabili, “balishuka ababa ba mpomfu mu mibele yabo, abenda mu malango ya kwa Yehova!”—Amalu. 19:7, 11; 119:1.
18 Na imwe bene mwalasumina ukuti Lesa alitucitila ifingi ifyo tulingile ukumutashishapo. Mwalishiba icalenga ifintu ukubipa muno calo. Mulamwenamo muli fyonse ifyo Lesa apeela abantu bakwe muno nshiku pa kuti babe abakosa mu kumupepa. Ukwabula no kutwishika, mulomfwa bwino ukuti Yehova alimukulila mu cilonganino cakwe ica mwi sonde lyonse na pe shuko amupeela ilya kuba Inte shakwe. Muletasha pa fisuma ifyo Lesa amucitila! Nga ca kutila mwali no kulemba fyonse ifyo Yehova amucitila, fingi ifyo mwingalemba. Ukulatontonkanya lyonse pa fisuma ifyo Lesa amucitila kukamwafwa ukukonka ukufunda ukutila: “Utwalilile ukwikatisha ico ukwete.”—Ukus. 3:11.
19. Ukulunda pa kwetetula pali bucibusa bwenu na Lesa, finshi fimbi ifyacindama ifyo mufwile ukulacita pa kuti mutwalilile ukuba ifibusa fya kwa Lesa?
19 Cimo icingamwafwa ukwikatisha ico mwakwata, kulatontonkanya pa fyo icitetekelo cenu cakula mu kupita kwa nshita. Libili libili luno lupapulo lulalanda pa fintu fimbi ifyacindama ifingatwafwa ukutwalilila ukuba ifibusa fya kwa Lesa. Pali ifi paba ipepo, ukulalongana lyonse no kulayasukapo, no kuba abacincila mu mulimo wa kushimikila imbila nsuma. Ifi fintu kuti fyamwafwa ukukosha ukutemwa kwenu no kutwalilila ukutemwa Lesa nga filya fine mwamutemenwe pa kubala.—Efes. 5:10; 1 Pet. 3:15; Yuda 20, 21.
Kuti Mwayasuka Shani?
• Bushe ifyalengele ukuti mutemwe Yehova kuti filemukosha shani pali ino nshita?
• Ukulatontonkanya pa fintu mwapitamo kuti kwalenga mwashininkisha cinshi?
• Mulandu nshi mufwile ukulabebeta pa fyo mwatemwa Lesa?
[Icikope pe bula 23]
Cinshi calengele ukuti mutemwe ifyo mwalesambilila no kushininkisha ukuti e cine?
[Icikope pe bula 25]
Bushe kuliko fimo ifyo mulemona ukuti mufwile ukuwamyako mu mikalile yenu?