Nomba Line Icalo Cikaba Paradaise!

“We Shifwe wa mu mulu, ishina lyobe licindikwe, Ubufumu bobe bwise, ubufwayo bobe bulecitika, pano calo nga mu mulu.”—Mateo 6:9, 10, Baibolo ya Ishiwi Lyakwa Lesa—Icipangano Cipya.

ILI pepo, ilyaishibikwa sana, ilyo abengi baishiba ati, Ipepo lya We Shifwe lilalenga abantu ukucetekela ukuti ifintu fikawama ku ntanshi. Mu nshila nshi?

Nga fintu ipepo lya We Shifwe lilanda, Ubufumu bwa kwa Lesa bukalenga ukufwaya kwa kwa Lesa ukucitika pano calo nge fyo caba mu muulu. Na kabili Lesa afwaya ukubwesha Paradaise. (Ukusokolola 21:1-5) Nomba bushe, Ubufumu bwa kwa Lesa cinshi, kabili bukalenga shani icalo ukuba Paradaise na kabili?

Buteko bwa Cine Cine

Ubufumu bwa kwa Lesa buteko bwa cine cine. Pa kuti ubuteko ubuli bonse bulebomba, kufwile ukuba bakateka, amafunde, na batekwa. Bushe Ubufumu bwa kwa Lesa bwalikwata fyonse ifi? Umfweni ifyo Baibolo yala-asuka amepusho yakonkapo yatatu:

Bushe abakalateka mu Bufumu bwa kwa Lesa ni bani? (Esaya 33:22) Yehova Lesa alisonta Umwana wakwe Yesu Kristu, ukulatungulula Ubufumu bwakwe. (Mateo 28:18) Kabili Yehova alipeela Yesu amaka ya kusala abantu abanono “ukufuma mu mitundu yonse ne ndimi na bantu ne nko,” abakaba ‘bashamfumu abakalateka isonde pamo na wena.’—Ukusokolola 5:9, 10.

Mafunde nshi ayo Ubufumu bwa kwa Lesa bwapeela abatekwa ukulakonka? Amafunde yamo ne fipope yafwaya ukuti abatekwa balecitapo fimo. Yesu alandile ukutila amafunde ayacindama sana pa mafunde yonse ni yalya ayatila: “‘Uletemwa Yehova Lesa obe no mutima obe onse, no mweo obe onse, no kutontonkanya kobe konse.’ Ili e funde ilikalamba kabili e lya ntanshi. Ilya cibili, ilyapalana ne li, litila, ‘Uletemwa umunobe nge fyo waitemwa we mwine.’”—Mateo 22:37-39.

Amafunde yambi yalakaanya abatekwa ba Bufumu bwa kwa Lesa ukucita ifintu fimo. Ku ca kumwenako, Baibolo ilalanda bwino bwino sana ukuti: ‘Mwilaibepa, bacilende, nangu abapepa utulubi, nangu abantu ababembuka, nangu abacita ubucende na baume banabo, nangu abapupu, nangu aba lunkumbwa lwa fyuma, nangu bacakolwa, nangu aba musaalula, nangu abacenjesha abanabo, tabakapyane Ubufumu bwa kwa Lesa.’—1 Abena Korinti 6:9, 10, Baibolo ya Ishiwi Lyakwa Lesa—Icipangano Cipya.

Abatekwa ba Bufumu bwa kwa Lesa ni bani? Yesu apalenye abatekwa ba Bufumu bwa kwa Lesa ku mpaanga. Atile: “Shikomfwa ishiwi lyandi, e lyo kukaba umukuni umo, na kacema umo.” (Yohane 10:16) Pa kuba umutekwa wa Bufumu bwa kwa Lesa umuntu tafwile ukulasosa fye ukuti alakonka Umucemi Musuma, Yesu, lelo afwile no kulacita ifyo Yesu amweba. Yesu atile: “Te onse uutila kuli ine, “Shikulu, Shikulu akengila mu bufumu bwa mu muulu, kano uucita ukufwaya kwa kwa Tata uwaba mu muulu e ukengilamo.”—Mateo 7:21.

E mulandu wine kanshi abatekwa ba Bufumu bwa kwa Lesa babomfesha e lyo no kucindika ishina lya kwa Lesa, Yehova, nga filya fine Yesu acitile. (Yohane 17:26) Abatekwa ba Bufumu bwa kwa Lesa balakonka ifyo Yesu abeba, ukulasambilisha bambi “imbila nsuma iyi iya bufumu.” (Mateo 24:14; 28:19, 20) Kabili balitemwana nga nshi.—Yohane 13:35.

Ukonaula “Abaleonaula Isonde”

Ifilecitika pe sonde lelo filelangilila ukuti nomba line fye Ubufumu bwa kwa Lesa buli no kucitapo fimo ku kwalula ifintu pe sonde. Twaishiba shani ukuti e fyo cikaba? Napapita imyaka 2,000, ukutula apo Yesu alondolwele icishibilo icabamo ifintu ifingi icali no kulenga abantu beshibe ukuti “ubufumu bwa kwa Lesa buli mupepi.” (Luka 21:31) Nge fyo twacimona mu cipande cifumineko, abantu mu calo conse baleimwena na menso uko ifintu ifingi ifyaba muli cilya cishibilo filecitika.

Nomba finshi fikakonkapo? Yesu ayaswike ukutila: “Lilya kukaba ubucushi ubukalamba ubushatala abubako ukutula pa ntendekelo ya ba pano calo ukufika nomba, kabili tabwakabale ababubako na kabili.” (Mateo 24:21) Ubu bucushi, te bantu bakabuleta. Lelo ni Lesa, e “ukonaula abaleonaula isonde.” (Ukusokolola 11:18) Abantu ababipa abaleonaula isonde pa mulandu wa milimo yabo iya bukaitemwe, bali no ‘kulofiwa mu calo.’ Lelo aba kaele ababombela Lesa ‘e bakashalamo.’—Amapinda 2:21, 22.

Yehova Lesa alikwata insambu sha kucitile fyo. Mulandu nshi? Tontonkanyeni pali ici cilangililo: Tutile mwalikwata ing’anda umwaba ifipinda ifingi iyo musonkesha. Bamo abasonkelamo balacita ifyo mufwaya kabili balalipila indalama sha ng’anda, no kusunga bwino umo bekala. Lelo bambi, tabacita ifyo mwabeba, bali-itemwa, tabasonkela umo bekala kabili balonaula ne ng’anda. Nangu ca kutila mwalibasoka imiku iingi, bena batwalilila fye ukucita ifyo fine. Finshi mwingacita? Apo muli bene ba ng’anda kuti mwafumya mu ng’anda abo bantu abashicita ifyo mufwaya.

Yehova Lesa na o wine pamo nga Kalenga wa calo na fyonse ifyabapo alikwata insambu sha kusala abantu abo alefwaya ukuti bakekale pe sonde. (Ukusokolola 4:11) Yehova alilanda ukuti akafumya pa calo, abantu ababipa abashikonka ifyo afwaya kabili abafyenga abantu banabo.—Amalumbo 37:9-11.

Paradaise Ikabako na Kabili

Nomba line fye Ubufumu bwa kwa Lesa ubo Yesu Kristu e mfumu, bukateka isonde. Yesu aitile iyi nshita ilyo ifintu fikalengwa ifipya pe sonde ukutila, ni nshita ya ‘kwalula fyonse cipya cipya.’ (Mateo 19:28, Ishiwi Lyakwa Lesa—Icipangano Cipya) Bushe ifintu fikaba shani? Moneni fimo fimo ifyo Baibolo yalaya:

Amalumbo 46:9. “Aputulo bulwi ukufika ku mpela ya calo.”

Esaya 35:1 “Fisekelele amatololo ne mpanga iyaumisha, ifiswebebe fyange no kupuuka nga cananika.”

Esaya 65:21-23. “Ne milimo ya minwe yabo abasalwa bandi bakasekelamo pa myaka iingi; tabakacucutikile ibusha, nangu kufyalila abana itentula.”

Yohane 5:28, 29. ‘Inshita ileisa ilyo bonse ababa mu nshiishi bakebukishiwa kabili bakomfwa ishiwi lyakwe [Yesu] no kufumamo.’

Ukusokolola 21:4. “[Lesa] akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo.”

Ico Twacetekelela Amalayo Yaba Muli Baibolo

Bushe mwalicetekela ifyo Baibolo yalaya? Baibolo yalandile kale ukutila abengi tabakacetekele ifyo ilanda. Itila: “Mu nshiku sha kulekelesha kukaba bakapumya . . . abenda umwabela ifya lunkumbwa fyabo fine no kusosa abati: ‘Kuli kwi ukubapo kwakwe ukwalaiwa? Pantu, ukufuma pa bushiku ifikolwe fyesu fyaponene mu tulo twa mfwa, ifintu fyonse filetwalilila filya fine fye fyali ukufuma pa kutendeka kwa bubumbo.’” (2 Petro 3:3, 4) Pa kulanda aya mashiwi, bakapumya baibepa fye. Natulande nomba pa milandu ine iingalenga ukuti mucetekele ifyo Baibolo ilanda:

(1) Kale Lesa talekelepo fye pa fyalecita abantu babipa. Ica kumwenako fye cimo icaishibikwa sana, Lyeshi lya kwa Noa.—2 Petro 3:5-7.

(2) Icebo ca kwa Lesa calisobele bwino bwino ifilecitika mu calo ilelo.

(3) Ifintu fyonse tafyaba “filya fine fye fyali ukufuma apo icalo capangiilwe.” Ino nshita abantu balecula mu mikalile, ne mibele naibipilako kabili ne sonde line nalyonaika ukucila ifyo cali kale.

(4) “Imbila nsuma iyi iya bufumu” ilebilwa mwi sonde lyonse ukulangilila ukuti “impela ileisa,” nomba line.—Mateo 24:14.

Inte sha kwa Yehova kuti batemwa ukusambilila na imwe Icebo ca kwa Lesa, Baibolo, pa kutila mwingeshiba ifingi pe subilo lya kwisaikala umuyayaya mu Bufumu bwa kwa Lesa. (Yohane 17:3) Ukwabula no kutwishika uku ku ntanshi tuleya abantunse bakaipakisha icine cine. Inshita iisuma nga nshi ili no kwisa nomba line! Bushe mukabako ilyo ifintu fikawama?

[Amashiwi pe bula 7]

Bonse abatila ifintu fikaba fye filya fine fyali na kale baibepa fye

[Icikope pe bula 8]

Bushe mukabako ilyo ifintu fikawama?