Ifyo Tusambilila Kuli Yesu

Pa fyo Tulingile Ukulaikala na Banensu

Mulandu nshi tulingile ukubela ne cikuuku?

Bushe mulaba ne cikuuku na ku abantu abamupata? Nga tulefwaya ukulapashanya Yesu, tulingile ukuba ne cikuuku na ku bantu fye abatupata. Yesu atile: “Nga mwatemwa abamutemwa, kutashiwa nshi kuli imwe? Pantu na babembu batemwa ababatemwa. . . . Lelo, muletemwa abalwani benu . . . , kabili mukaba abana ba Wapulamo, pantu wa cikuuku ku bashitasha na ku babifi.”—Luka 6:32-36; 10:25-37.

Mulandu nshi tulingile ukulaelela?

Nga twalufyanya tulafwaya Lesa atwelela. Yesu asambilishe ukuti tulingile ukulapepela ukuti Lesa aletwelela. (Mateo 6:12) Lelo na kabili Yesu atile, Lesa kuti atwelela fye nga ca kuti na ifwe tuleelela abanensu. Atile: “Nga mwalekelela abantu amampuulu yabo, Shinwe wa mu muulu na o akamulekelela; lelo nga tamulekelela abantu amampuulu yabo, na Shinwe wa mu muulu takamulekelele amampuulu yenu.”—Mateo 6:14, 15.

Bushe aba mu ng’anda kuti bacita shani pa kuti bengaba ne nsansa?

Kwena nangu ca kuti Yesu taupilepo, kuti twasambililako ifingi kuli ena pa fya kulenga ulupwa ukuba ulwa nsansa. Mu milandile na mu ncitilo alitwimikile ica kumwenako ico tulingile ukukonka. Moneni ifishinka fitatu ifyalakonkana:

1. Umulume alingile ukutemwa umukashi wakwe ngo mubili wakwe. Yesu alangile abaume abaupa ifya kucita. Umfweni ifyo alandile ku basambi bakwe: “Ndemupeela ifunde lipya, ilya kuti muletemwana.” Bali no kutemwana shani? Atile, “Ifyo namutemenwe.” (Yohane 13:34) Ifunde lya mu Baibolo pa baume baupa, litila: “Mwe balume, twalilileni ukutemwa abakashi benu, filya na Kristu atemenwe icilonganino no kuipeela pali cene. . . . E fyo na balume bafwile ukulatemwa abakashi babo nge mibili yabo iine. Uwatemwa umukashi wakwe ali-itemwa umwine, pantu takwaba umuntu nangu umo uwatala apata umubili wakwe wine; lelo alauliisha no ku-utentemba, filya Kristu na o aliisha no kutentemba icilonganino.”—Abena Efese 5:25, 28, 29.

2. Abaupana balingile ukuba ne cishinka ku bena mwabo. Ukulaala no muntu umbi uushili mwina mwenu lubembu kuli Lesa kabili cilalenga amafya mu ng’anda. Yesu atile: “Bushe tamwabelenga . . . ‘E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo’? E ico tabali babili kabili iyo, lelo bali umubili umo. Kanshi, ico Lesa alundenye umuntu elundulula. . . . Ndemweba nati, onse uwaleka umukashi wakwe, kano pa mulandu wa bulalelale, no kuupa umbi, acita ubucende.”—Mateo 19:4-9.

3. Abana balingile ukulaumfwila abafyashi babo. Nangu ca kutila Yesu ena aali uwapwililika e lyo abafyashi bakwe bena tabali abapwililika, lelo apo ali mwana alebomfwila. Umfweni ifyo Baibolo ilanda pali Yesu ilyo aali ne myaka 12: “Aile na bo [abafyashi bakwe] no kufika ku Nasarete, kabili alebanakila.”—Luka 2:51; Abena Efese 6:1-3.

Mulandu nshi uo tulingile ukukonkela ifi fishinte?

Yesu alandile pa masambililo asambilishe abasambi bakwe, atile: “Nga mwaishibe fi fintu, mukaba ne nsansa nga muleficita.” (Yohane 13:17) Pa kuti twingaba Abena Kristu ba cine, tulingile ukulakonka ifyo Yesu atufundile pa fya kwikala na bantu banensu. Atile: “Muli ici e mo bonse bakeshibilo kuti muli basambi bandi, nga mwaba no kutemwana.”—Yohane 13:35.

Nga mulefwaya ifyebo na fimbi, moneni icipandwa 14 mu citabo ca kuti Bushe Cinshi Baibolo Isambilisha?a

[Futunoti]

[Icikope pe bula 16, 17]

Umulumbe wa kwa Yesu pa mwana wa bonaushi utusambilisha pa busuma bwa kuba ne cikuuku e lyo no kwelela.—Luka 15:11-32

[Icikope pe bula 17]

Abaupana balingile ukuba ne cishinka ku bena mwabo