Baibolo Ilaalula Abantu

Cinshi cingalenga ukuti umo uwaba mwi bumba lya balumendo bacipondoka (Junior Satans) aba ku calo ca Mexico aaluke ukuba umufumacumi kabili impalume mu bwikashi? Mulandu nshi umwanakashi umwina Japan uwakwata amakwebo ayenda bwino sana engalekela ukufwaisha ukunonka icuma, e lyo kabili omfwa shani pa fyo acita? Cinshi cingalenga ukuti umwina Russia aleke ubukwebo ubushili bwa mwi funde ubwa kushitisha ifyanso lelo ubwa cibwesha nga nshi? Baleni tontonkanyeni pa fyo aba bantu balandile.

UO TULELANDAPO

ISHINA: ADRIAN PEREZ

IMYAKA: 30

ICALO: MEXICO

IFYO AALI: ALI MWI BUMBA LYA BALUMENDO BACIPONDOKA

IFYO NALECITA KALE: Ilyo nali ne myaka nalimo 13, ulupwa lwesu lwakukiile ku Ecatepec de Morelos, ku musumba wa Mexico. Pali iyi nshita, muli uyu musumba mwali sana abana intalamisoka, baleonaula sana ifintu, e lyo balepeepa no kunwa sana imiti ikola. Tapapitile na nshita na ine wine natampile ukulanwa ubwalwa icinwenwenwe, ukulaonaula ifintu, e lyo nalitampile ne fimfulunganya.

E lyo pa numa, twabweleele ku musumba nafyalilwe ku San Vincente. Lelo na ko kwine, abaice abengi balepeepa no kunwa sana imiti ikola. Cali icaseeka ukusanga uwacaice nafwa mu musebo. Na ine wine naingile mwi bumba lya bacipondoka ilyaleitwa ati Junior Satans. Twaleiba no kupeepa no kunwa imiti ikola, ilingi line twalepeepa umuti uukali uo basungulwilako penti nelyo glu. Imiku fye iingi, nshaleishiba ifyo naleya ku ng’anda, e lyo limo nalefwa fye icipuupu mu musebo. Abanandi bamo balibakakile mu cifungo pa mulandu wa kwiba no kwipaya abantu.

Nangu nalecita ifyabipa fyonse ifi, na lyo line nalisumine muli Lesa. Nomba pa kuti fye ningalaumfwako bwino pa fibi ifyo nalecita, Umulungu wa Nshikunkulu nga wafika e kutila ukukonka Inshila ya Musalaba, naleya ku mapepo no kuya mu kulafukama no kusefya, nga twafika ponse apali umusalaba ne filubi twalefukama no kusaalika. Nomba twaleti fye nga twapwisha ukusefya, bonse fye ukubikako no waleimininako Kristu pa kusefya, twalesefesha pamo kabili pa kulangilila ukuti natusekelela twalenwa no kukolwa sana.

IFYO BAIBOLO YANJALWILE: Ilyo nali mupepi no kukumanya imyaka 20, natampile ukusambilila Baibolo ne Nte sha kwa Yehova. Nalishibe ukuti ifyo nalecita tapali uko fikantwala kabili nga nshilekele imisango yabipa ninshi nshakabe umuntu wine wine. Icamfikile sana pa mutima cishinka icaba pa Abena Galatia 6:8, apatila: “Uulebyala ku mubili akalobolola ukubola ku mubili wakwe, lelo uulebyala ku mupashi, ku mupashi wine akalobolola ubumi bwa muyayaya.” Ili lembo lyanengele ukwiluka ukuti nga ndefwaya ukuti nkekale bwino ku ntanshi, pa kucita ifintu ningile ukulatontonkanya na pa fyo cingesaba ku ntanshi.

Ilyo nalesambilila Baibolo, natampile ukulaumfwikisha ukuti Yehova Lesa e ko aba no kuti na ine wine alintemwa, nalishibe no kuti kanshi kuti anjeleela pa fyabipa ifyo nacita ku numa. E lyo nalisambilile ukuti kanshi alomfwa no kwasuka amapepo.

Ala kwena calyafishe pa kuti fye ndeke imisango yandi. Calyafishe ukufumamo mwi bumba lya bacipondoka. Nangu ca kutila nshali na kabili mwi bumba lya bacipondoka, mu ncende shimo isho bababindile nshalepitamo. Limo limo, pa kuti abanandi beishiba uko ndi nalebelama, pantu naletiina ukuti nga bansanga kuti banjikata no kumpatikisha ukubwelela mwi bumba lyabo no kutampa ukulacita ifyabipa na kabili.

Ilyo natampile ukulaya ku Ng’anda ya Bufumu mu kulongana pamo ne Nte sha kwa Yehova, nasangile ukuti icilonganino cali fye icaibela kwi bumba nalimo pantu mu cilonganino mwena mwali ukutemwana no kusekelelana. Ala calimfikile pa mutima pa kumona ukuti aba bantu bali ne citetekelo icine cine kabili ifyo balesambilisha e fyo balecita. Icilonganino ca kwa Lesa cena cali fye icaibela kwi bumba nalimo kale.

IFYO NANONKELAMO: Apo nabatishiwilwa nomba ukuba Inte ya kwa Yehova napapita ne myaka 10. Ndesha na maka ukukonka ifyo Baibolo isambilisha. Nomba, no lupwa lwandi lwalitampa ukuncindika. Pali ino nshita nomba banjishiba ukuti ndabombesha, ica kuti no kubafwa ndabafwako nga tabakwete indalama. Bamayo balitampile ukusambilila Baibolo, no kubatishiwa nomba balibatishiwa ni Nte ya kwa Yehova. Batata na bo nomba balitampa ukwalula imisango yabo. Pa lupwa lwesu, abengi te baNte sha kwa Yehoba, lelo pa kumona ifyo nayaluka, balasumina ukuti kanshi Baibolo kuti yaafwa umuntu ukwaluka.

UO TULELANDAPO

ISHINA: YAYOI NAGATANI

IMYAKA: 50

ICALO: JAPAN

IFYO AALI: NI NAMAKWEBO WATUNGULUKA

IFYO NALI KALE: Nakuliile mu musumba uunono umo abantu abengi ba nsansa nga nshi. Batata balikwete ituuka mu musumba, umwalebomba abantu 10. Ing’anda yesu yakonkene fye ne tuuka, kanshi Bamayo na Batata nga tabalipo nshaleumfwa icitendwe.

Nine mukalamba pali bankashi nandi batatu, e lyo ukufuma fye ku mushinku unono, balensambilisha ifya kwensha ubukwebo bwa lupwa. Naupilwe ninshi ndi fye umwaice. Umwina mwandi alilekele incito ku banki no kwisa mu kulatwafwako incito mu bukwebo bwa lupwa. Twalikonkenye ukukwata abana batatu ukwabula ukubatamwina. Bamayo e balendelela abana ilyo balebomba utumilimo twa pa ng’anda, pantu nalebomba mwi tuuka ukutula akacelo mpaka fye no bushiku. Nangu twalebomba ifi, twalekwatako inshita ya kuba pamo no lupwa.

Nomba icacitike ca kuti mu musumba onse fye amakwebo yalilekele ukwenda bwino, no bukwebo bwesu na bo bwine bwalitampile ukuwayawaya. Kanshi pa kuti tupwishe ubu bwafya, twasalilepo ukutampa umulimo wa kushitisha ifisolobelo fya kuwamisha amayanda e lyo kabili twakuulile ili tuuka mupepi no musebo ukalamba. Ilyo kwashele fye ubushiku bumo ubwa kulongana kwa kulanshanya pa fyo ubukuule bwe tuuka bwali no kuba, batata, abaali abakalamba ba kampani, baliketwe no bulwele bwa ku bongo ica kuti bwalibapumine na pa nshi. Ilyo bapupuutwike ishiwi lyalile baletamantama fye pa kulanda, kanshi incito yonse iya kumona pe tuuka lipya yalinshaliile. Abena mwandi bena bashele balebombela kwi tuuka lya kale. Ala kanshi tatwaleikala na pa nshi, incito yalitukuliile.

Ubukwebo mwi tuuka lipya bwale-enda bwino nga nshi. Ala naleumfwa bwino nga nshi pa fyo nale-ensha ili ituuka, ica kuti nalefufya no tulo pa kuti fye ningatwalilila ukulabomba bwino. Nangu ca kutila nalitemenwe abana bandi, nomba ico naletontonkanyapo fye lyonse ni ncito. Nshalekwata inshita nangu fye panono iya kulanda na bena mwandi, kanshi twaleti fye nga twakwatako akashita ka kwikala pamo no kulalanshanya, mukwai ninshi kwikalila fye ukulaumana. Pa kuti fye nindaba na bulanda, libili libili twaleya mu kunwa na banandi ukubikako na bo twalebombela pamo na bo mu makwebo. Kanshi ifyo napooseleko amano sana ni ncito, ukunwa, no kulaala. Nalikwete sana indalama, nomba nshaishiibe icalengele ukuti lyonse ndeba fye no bulanda.

IFYO BAIBOLO YANJALWILE: Ilyo natampile ukusambilila Baibolo ne Nte sha kwa Yehova, ifipande fitatu ifyo twasambilile fyalimfikile sana pa mutima. Nalililile ilyo naishibe umwalola amashiwi yaba pali Mateo 5:3 ayatila “Ba nsansa abaibukila ukuti balakabila ifya ku mupashi, pantu ubufumu bwa mu muulu bwabo.” Ici icikomo calinengele ukwishiba icalengele ukuti nindaba ne nsansa nangu ca kutila nalikwete sana indalama ica kuti na bo twalebombela pamo na bo mu makwebo balekumbwa. Nomba nalishibe ukuti kanshi kamo fye we muntu nga nawishiba ukuti ulingile ukwishiba Icebo ca kwa Lesa no kulapepa e lyo wingaba ne nsansa icine cine.

Ilyo ubunonshi bwa calo ca Japan bwabwelele pa nshi sana, nalimwene ifyo abo twalebombela pamo na bo amakwebo batampile ukucita, e lyo nashininkishe ukuti kanshi amashiwi yaba pali 1 Timote 6:9 ya cine, pantu yatila: “Abafwaisha ukuba ne fyuma bawila mwi tunko kabili mu citeyo kabili mu lunkumbwa ulwingi ulwa kutumpa kabili ulwa kucena, ifyo fiibisha abantu mu bonaushi kabili mu kupomonwa.” Nailwike ukuti amashiwi yalembwa pali Mateo 6:24, aya kuti “te kuti mubombele Lesa ne Fyuma,” yalinkumine sana, e calengele ntontonkanye ukuti kanshi ningile ukwaluka.

Nalikutulwike ukuti nalilekelesha abafyashi bandi, abena mwandi, e lyo na bana bandi kumo. E lyo kabili calimoneke fye apabuuta tuutu ukuti nalyambwile imibele yabipa. Nali ne cilumba. Nshali uwatekanya. E lyo kabili nalefulwa bwangu. Kale, naletontonkanya ukuti te kuti njaluke Umwina Kristu. Nomba kwena, nalitemenwe sana abana bandi e lyo nalimwene no kuti nga nakonka ifyo Baibolo ifunda pa fya kwikala no lupwa lwandi, abana bandi baleumfwa bwino sana. Natampile ukulapoosa na bo inshita iikalamba no kulaya na bo mu kulongana.

IFYO NANONKELAMO: Ukwishiba ico fwe bantu twabelako e lyo no kuba na maka ya kulabombela Lesa, no kulaikala ukulingana ne fyo afwaya, kwalinenga ukuba ne nsansa shine shine no kulaumfwa bwino. Nomba nabika sana amano ku ba mu ng’anda yandi ukucila ukubika amano ku ncito, ica kuti balitampa na kabili ukuncindika.

Bamayo na bo pa kumona ifyo nayalwike no kuba umuntu umusuma, calibafikile pa mutima ica kuti na bo balitendeke ukusambilila Baibolo no kuba Abena Kristu. Icawamishapo ca kuti, nangu fye ni batata nangu abena mwandi tabatulwisha pa fyo twasala ukulabombela Lesa. Pali ino nshita nomba tulomfwana sana na bana bandi, kabili ndaipakisha ukulabombela pamo no lupwa lwandi.

UO TULELANDAPO

ISHINA: MIKHAIL ZUYEV

IMYAKA: 51

ICALO: RUSSIA

IFYO AALI: ALESHITISHA IFYANSO UKWABULA INSAMBU

IFYO NALI KALE: Naleikala mu musumba wa Krasnogorsk, impanga ya uyu musumba ilamoneka bwino sana. Umumana wa kuti Moscow waya mu kapinda ka ku kulyo. Amayanda ayabela ku masamba na ku kapinda ka ku kuso ku mbali ya musumba yashingulukwa fye ne miti ica kuti no kumoneka tayamoneka sana.

Ilyo nali umwaice nalitemenwe sana ulubuli lwa fifunshi no kulayangasha ifyanso. Nalepoosa inshita iikalamba sana ukusambilila ifya kulwa. E lyo kabili nalepanga ne fyanso, ifipolopoolo, ne myele ukwabula insambu. Mu kupita kwa nshiku, iyi iine e ncito natampile ukulaibombela ne mwine. Nalishibe ifya kubomba iyi ncito bwino e lyo kabili yale-enda bwino, nshakwete no bwafya bwa kushitisha ifyo nalepanga ku fipondo.

IFYO BAIBOLO YANJALWILE: Mu kubangilila kwa ba 1990, baNte sha kwa Yehova balishile. Pa kubalilapo fye nshabacetekele, pantu balenjipusha ifipusho ifingi sana.

Bushiku bumo, umo pali aba alimbelengeele Abena Roma 14:12 apatila: “Ifwe bonse umo umo pa lwesu tukalubulula kuli Lesa.” Nshaishibe ifyo ningalanda kuli Lesa nga alandubulwisha. Ili ilembo lyancinciishe ukusambilila ifyo Lesa afwaya kuli ine.

Nalibombeeshe sana ukukonka ukufunda kwa muli Baibolo ukwaba pa Abena Kolose 3:5-10, apatila: “Mulenge fifwe ifilundwa fyenu ifya mubili ifya pano isonde ukukuma ku bulalelale, ukukowela, insuuna, ulunkumbwa lubi, no mufimbila, e kupepo tulubi. Ni pa mulandu wa ifyo fintu ubukali bwa kwa Lesa buleishila. . . . Pooseni fyonse, ubukali, icipyu, ububi, imiponto, kabili fumyeni ilyashi lya nsoni mu kanwa kenu. Mwilabepana. Fuuleni ubuntu bwa kale pamo ne micitile ya buko, kabili fwaleni ubuntu bupya.”

Ala kwena calinjafishe ukwaluka, pantu abo naleshitishako ifyanso lyonse fye balefifwaya, balenjeba ne ndalama balampeela, e lyo kabili calenkosela sana ukutekanya nga ca kuti umuntu ansaalula. Lelo kwena nangu cayafishe ifi, ifyanso fye fyonse ifyo nakwete ifya mutengo nga nshi nalifyonawile. Ilyo nasambilile pa fyo Lesa na Kristu bantemwa, na ine wine nalibatemenwe. Nabikilepo fye ukulasambilila Baibolo pa lwandi, naleya lyonse mu kulongana, kabili nalepepela no kuti shi Lesa mukulu enganjafwa.

IFYO NANONKELAMO: Mukwai nga filya batila tafimbwa lubilo, kanshi na ine wine panono panono nalebombesha nga nshi, e lyo na bamunyinane ba Bwina Kristu na bo balingafwa, nomba nalisuka nalyaluka no kuba ne mibele isuma. Kanshi ukwishiba ukuti Yehova Lesa alatusakamana bonse, ukubikako fye na bantu abafwa, kulanenga ukusansamuka nga nshi. (Imilimo 24:15) Nalicindika sana ubufumacumi na bucishinka ubo namona mu Nte sha kwa Yehova. E lyo kabili no kutasha ndatasha pa fyo bananga ukutemwa kwa cine na pali bucishinka bwabo kuli Lesa.

Ilyo fye natendeke ukusambilila, balupwa bandi bamo na banandi tabatemenwe ifyo nalesambilila. Lelo abene balitemenwe pantu bamwene ukuti cawamapo ukuti ndepepa ukucila ukuba icipondo. Ala nalitemwa icine cine pa mulandu wa kuti nomba nshishitisha ifyanso fya nkondo lelo mpoosa inshita yandi iikalamba ku kwafwa abantu ukusambilila pali Lesa wa mutende.

[Icikope pe bula 27]

Naleya mu kusangwako ku minsa na ku masaali ya baKatolika pa kuti fye umutima wingalaikalako

[Icikope pe bula 28]

Nalikwete sana indalama nomba nshali ne nsansa