Beni ne ‘Mitima Iifwaisha’ Ukwishibilako Lesa Bwino Bwino

ABABOMFI ba kwa Yehova bonse bafwaya ukuti abatemwe. Apo ifi e fyo tufwaya, tulesha na maka ukukosha icitetekelo cesu no kuba abapimpa mu mulimo wa kwa Lesa. Lelo umutumwa Paulo alandile pa bwafya bwingabako, ubo na baYuda bamo mu nshiku shakwe bakweteko. Atile: “Ukupimpa kwa kubombela Lesa kwena balikwata; lelo te kupimpa ukwalingana no kwishiba kwine kwine.” (Rom. 10:2) Kanshi, ukwishiba bwino bwino Yehova, Kabumba wesu, no kufwaya kwakwe e cifwaikwa pa kukwata icitetekelo no kulamupepa, te kwiminwa fye iyo.

Mu makalata yambi ayo Paulo alembele, atile pa kuti tukwate imibele iyo Lesa atemwa kano twabikako amano ku kwishiba ifya kwa Lesa. Apepele ukuti abasambi ba kwa Kristu bakwate amano ya “kwishiba bwino bwino” ukufwaya kwa kwa Lesa “pa kuti [bale-enda] ukulingana ne fyo Yehova afwaya pa kuti [balecita] lyonse ifya kumusekesha” ilyo ‘baleya baletwala ifisabo mu mulimo onse uusuma kabili ilyo baleya baleishibilako Lesa bwino bwino.’ (Kol. 1:9, 10) Mulandu nshi ukubikako amano ku “kwishiba bwino bwino” ifya kwa Lesa kwacindamina? Kabili mulandu nshi tufwile ukulaishibilapo na fimbi ifya kwa Lesa?

Kulalenga Twakwata Icitetekelo

Ukwishiba bwino bwino Lesa no kufwaya kwakwe ifyo Baibolo yalandapo, e filenga twakwata icitetekelo. Ukwabula uko kwishiba, icitetekelo cesu muli Yehova kuti caba icanaka, icingapwa fye inshita iili yonse. Paulo atukoselesha ukubombela Lesa na “maka [yesu] aya kupelulula” no ‘kwalula amatontonkanyo yesu.’ (Rom. 12:1, 2) Ukusambilila Baibolo lyonse kuti kwatwafwa ukucita ifyo.

BaEva, bapainiya ba nshita yonse aba ku Poland, balasumina abati: “Nga nshilesambilila Icebo ca kwa Lesa lyonse, teti ndeishibilapo na fimbi pali Yehova. Ubwina Kristu bwandi kuti bwabwela pa nshi bwangu bwangu, ne citetekelo candi kuti canaka, ne ci kuti calenga bucibusa bwandi na Lesa ukupwa.” Ico ciikatala acitucitikila! Natulande pa muntu uwaishibilepo na fimbi pali Yehova icalengele no kuti Lesa amutemwe.

“Amafunde Yenu Naliyatemwa Icine Cine!”

Ulwimbo lwaba mu Amalumbo 119 mu maBaibolo yesu lulanda pa fyo kemba wa malumbo aleumfwa pa mafunde ya kwa Yehova, pa fyo Lesa atwibukishako, pa fipope fyakwe, na pa bupingushi bwakwe. Kemba wa malumbo alembele ati: “Ifipope fyenu e fyo nkatemwisha. . . . Ifyebo ifyo mutwibukishako nalifitemwisha.” Alembele no kuti: “Amafunde yenu naliyatemwa icine cine! Akasuba konse e yo ntontonkanyapo.”—Amalu. 119:16, 24, 47, 48, 77, 97.

Ishiwi lya kuti ‘ukutemwisha’ na mashiwi ya kuti “e yo ntontonkanyapo,” yapilibula ukutontonkanya sana pa Cebo ca kwa Lesa, na kuba, yapilibula ukumfwa bwino ukulatontonkanyapo. Ayo mashiwi yalanda sana pa fyo kemba wa malumbo atemenwe ukusambilila amafunde ya kwa Lesa. Kemba wa malumbo taleiminwa fye ukuti abe no ku kutemwa. Lelo alefwaya sana ‘ukubika amano’ ku mafunde, no kumfwikisha amashiwi ya kwa Yehova. Imibele yakwe ilanga apabuuta ukuti alefwaya ukwishiba bwino bwino Lesa no kufwaya kwakwe.

Nacimoneka fye ukuti uku kutemwa uko kemba wa malumbo atemenwe Icebo ca kwa Lesa kwalefuma pa nshi ya mutima wakwe. Kuti twaipusha atuti: ‘Bushe na ine e fyo naba? Bushe ndomfwa bwino ukubelenga Baibolo cila bushiku no kufwaya ukwishiba umo ifyo nabelenga filolele? Bushe ndaibikilishako ukubelenga Icebo ca kwa Lesa no kupepa ilyo nshilabelenga?’ Nga ca kutila e fyo tucita, ninshi nalimo ‘tuleishibilako Lesa bwino bwino.’

BaEva batila: “Lyonse ndafwaya inshila sha kuti ndenonkelamo sana ilyo ndesambilila pa lwandi. Ukutula apo napokelele broshuwa ya kuti ‘Moneni Icalo Cisuma,’ ndaibomfya ilingi line ilyo ndesambilila. Ndesha ilingi ukufwailisha mu fitabo fya Insight on the Scriptures ne fitabo fimbi ifingangafwa.”

Natulande na pa ficita baVoichek na baMaugozhata, ababa no lupwa ulukalamba. Bushe bacita shani pa kuti balekwata inshita ya kusambililako Baibolo? Batila: “Umo umo alasangako inshita ya kubelenga Icebo ca kwa Lesa. E lyo pe sambililo lya lupwa, nangu ilyo tulelanda amalyashi yambi, tulalanda na pa fyo twatemenwemo mu fyo twalebelenga.” Ukubelenga sana Baibolo pa lwabo kulabaletela insansa no kubafwa ‘ukwishibilako na fimbi bwino bwino.’

Ilyo Mulebelenga Mulesambililapo Fimo

Fwe Bena Kristu twasumina ukuti Lesa afwaya ukuti “abantu balekanalekana bakapusuke no kwishiba bwino bwino icine.” (1 Tim. 2:3, 4) Ici cilelanga ukuti calicindama sana ukubelenga Baibolo no kwesha na maka “ukwiluka” ifyo tulebelenga. (Mat. 15:10) Nga tulefwaya ukucita ifyo, ninshi ilyo tulebelenga tufwile ukulasambililapo fimo. E fyalecita abena Berea ilyo Paulo abashimikileko imbila nsuma. Baibolo itila: “Imitima yabo yafwaishe nga nshi ukupokelela amashiwi ya kwa Lesa. Balefwailisha mu Malembo cila bushiku pa kuti bashininkishe nga ca kutila ifi fintu fya cine.”—Imil. 17:11.

Bushe na imwe mucita ifyalecita abena Berea, e kutila ukufwaya nga nshi ukusambilila no kukanatontonkanya pa fingamupumfyanya ilyo mulesambilila Baibolo? Umwina Kristu kuti aesha ukucita ifyalecita abena Berea nangu ca kuti kale tatemenwe ukusambilila. Kabili, abantu bamo ilyo baleya balekota balanashako ukusambilila no kubelenga, lelo te fyo cifwile ukuba ku Bena Kristu. Te mulandu no mushinku wenu, kuti mwaleka ukutontonkanya pa fingamupumfyanya. Kabili ilyo mulebelenga, mulefwayako ifyebo ifyo mwingashimikilako bambi. Ku ca kumwenako, nalimo kuti mule-ebako abena mwenu nangu Umwina Kristu munenu ifyo mwasambilile ilyo mwalebelenga. Nga mulecita ifyo, ninshi teti mulabe ifyo mwasambilila kabili na bo mwashimikilako bakamwenamo.

Pa kusambilila, kuti mulecita filya Esra, umubomfi wa kwa Lesa uwa ku kale alecita. ‘Aleteyanya umutima wakwe pa kuti eshibe amafunde ya kwa Yehova.’ (Esra 7:10) Kuti mwacita shani ifyo? Kuti mwapekanya ifya kubomfya e lyo no kuya ukuli umutalalila. E lyo kuti mwaikala no kupepa kuli Yehova pa kuti amutungulule no kumupeela amano. (Yako. 1:5) Ipusheni amuti, ‘Finshi ndefwaya ukusangamo muli ili isambililo?’ Ilyo mulebelenga, mulefwaya ukwishiba ifyo balelandapo. Kuti mwafilemba nangu ukushila fimo ifyo mulefwaya sana ukulaibukisha. Tontonkanyeni pa fyo mwingabomfya ifyo fyebo ilyo muleshimikila, ilyo mulefwaya ukupingula pali fimo, nangu ku kukoselesha abasumina banenu. Ilyo mulelola ku mpela ye sambililo lyenu, pitulukeni panono mu fyo musambilile. Ico cikamwafwa ukulaibukisha ifyo mwasambilila.

BaEva balanda ifyo bena bacita abati: “Ilyo ndebelenga Baibolo, ndalolesha mu mukululo wa malembo yambi ayalandako pali fyo, ndafwailisha muli Watch Tower Publications Index, na pali Watchtower Library iya pa kompyuta. Ndalemba ifyebo fimo fimo pa kuti nkalefibomfya ilyo ndeshimikila.”

Bamo pa myaka iingi balibelenga ifilanda pa fya kwa Lesa kabili balatemwa sana ukucita ifyo. (Amapi. 2:1-5) Na lyo line, balikwata ifya kucita ifingi kabili cilabakosela ukusanga inshita ya kusambilila pa lwabo. Nga e fyo caba kuli imwe, finshi mwingaalula pa kuti mulebelengako ifya kwa Lesa?

Kuti Nacita Shani pa Kuti Nsangeko Inshita?

Mufwile mulesumina na imwe ukuti calyanguka ukusanga inshita ya kucita ifyo mwatemwa. Bamo balisanga ukuti icibafwa sana ukutemwa ukubelenga kukwata ubuyo. Kuti babika ubuyo bwa kubelenga Baibolo yonse. Kwena kuti camoneka ukwafya sana ukubelenga filya filanda pa nkulo sha bantu, ifilondolola pa fyo itempele lyapangilwe, nangu ukusesema kwa-afya ukumoneka kwati twakwakuma ku filecitika lelo. Citeniko fimo ifingamwafwa ukufika pa buyo bwenu. Ku ca kumwenako, ilyo tamulabelenga pali fimo mu Baibolo ifimoneka nge fyakosa, nalimo kuti mwabelenga ifyebo na fimbi pali fyo fintu nangu ukubelenga pa fyo ifyo fyebo fingamwafwa. Ifyebo fya musango yo kuti mwafisanga mu citabo citila “Amalembo Yonse Yantu Yapuutwamo Kuli Lesa Kabili ya Kunonsha.” Ici citabo e ko caba mu ndimi nalimo 50.

Cilafwa sana ukwelenganya ilyo mulebelenga Baibolo. Ici kuti camwafwa ukulamona abantu mulebelengapo e lyo ne fyalecitika. Nga mulecite fi, muli no kulaipakisha ukubelenga kabili mukasambilila ifingi. Ne co cikalenga mukalekosapo ukusanga inshita ya kubelenga. Mukasuka mukabelele ukubelenga Baibolo cila bushiku.

Ifi twalandapo kuti fyatwafwa umo umo, nomba bushe ababa mu lupwa, abakwata ne fya kucita ifingi bena kuti bacita shani? Kuti mwaikala pamo na ba mu ng’anda yenu no kulanshanya pa busuma bwaba mu kubelengela Baibolo capamo. Ilyo mwalanshanya, kuti mwasangako inshila sha kubelengelamo Baibolo cila bushiku. Nalimo kuti mwasalapo ukulashibukako ulucelocelo cila bushiku nangu pa nshiku shimo pa kuti mubelenge Baibolo. Nangu kuti mwasanga ukuti mufwile ukwalula fimo fimo pa kuti mulesangako inshita ya kubelenga. Ku ca kumwenako, indupwa shimo basanga ukuti cilabafwa sana ukulanshanya ilembo lya bushiku nangu ukubelengako Baibolo ilyo bapwa ukulya. Ilyo tabalatampa ukuteula imbale nelyo ukuya mu kucita fimbi, balatala balanshanya pa Malembo nelyo ukubelenga Baibolo capamo pa mamineti 10 nangu 15. Pa kubala, ici kuti cakosa, lelo bwangu bwangu cilabelela kabili ulupwa lonse lulaipakisha.

BaVoichek na baMaugozhata balanda pa ca-afwile ulupwa lwabo abati: “Kale, twalepoosa inshita ku fintu fishacindama. Twalyumfwene ukuti tuli no kuputulako inshita tubomfya ku kulemba amakalata ya pa kompyuta. Twaliputulako ne nshita twalepoosa mu kucita ifya kuleseshamo icitendwe kabili twalyumfwana inshita no bushiku ubwa kusambilila sana ifya kwa Lesa.” Ulu lupwa tabomfwa ububi pali fyo bacita, na imwe nga mwaeshako mukasanga ukuti muleipakisha.

Ukulaishibilapo na Fimbi Kulanonsha!

Ukusambilila sana Icebo ca kwa Lesa ‘kulatwala ifisabo mu mulimo onse uusuma.’ (Kol. 1:10) Ilyo muletwala ifisabo mu bumi bwenu, bonse bakamona ukulunduluka kwenu. Mukalatungululwa no mupashi kabili mukalaumfwikisha bwino icine caba mu Baibolo. Mukalapingula bwino kabili mukalapanda bambi amano yasuma, tamwakalecita filya abashaishiba bacita. Kabili muli no kupalama kuli Yehova. Mukeshiba bwino sana imibele yakwe, kabili ici cikalamoneka ilyo mule-ebako bambi pali Lesa.—1 Tim. 4:15; Yako. 4:8.

Te mulandu no mushinku wenu nangu ifyo mwapitamo mu bumi, bombesheni na maka yonse pa kuti mutemwe Icebo ca kwa Lesa no kulacibelenga sana e lyo no kusambililapo fimo ilyo mulebelenga. Mwishibe ukuti Yehova takalabe ukubombesha kwenu. (Heb. 6:10) Akamupaala nga nshi.

[Akabokoshi pe bula 13]

ILYO ‘TULEISHIBILAKO LESA BWINO BWINO’. . .

Tukakosha icitetekelo cesu muli Lesa no kwenda ukulingana ne fyo Yehova afwaya.—Kol. 1:9, 10

Tulashilimuka, tuleshiba ifya kubomfya umucetekanya no kupingula mano mano.—Amalu. 119:99

Tulatemwa sana ukwafwa bambi ukupalama kuli Yehova.—Mat. 28:19, 20

[Ifikope pe bula 14]

Kuti ca-afya ukusanga ukwa kubelengela ukuli umutalalila, lelo cisuma ukubelengela ukuli umutalalila

[Icikope pe bula 15]

Indupwa shimo babelenga Baibolo pa numa ya kulya