Cinshi Cicitika Umuntu nga Afwa?

“Imyeo yonse, ukubikako fye ne ya mbifi, taifwa . . . Apo ilakandwa umuyayaya mu mulilo uushishima, kabili taifwa, ubucushi bwa iko te kuti bupwe nakalya.”—Ifi e fyasosele Clement wa ku Alexandria, kalemba uwaliko mu ma 200 na 300.

ABASAMBILISHA pa mulilo wa pe batila umweo wa muntu taufwa, nga fintu Clement na o asosele. Bushe na Baibolo e fyo isambilisha? Moneni ifyo Icebo ca kwa Lesa casuka amepusho yakonkapo.

Bushe umuntu wa kubalilapo, Adamu, alikwete umweo uushifwa? Baibolo ya mu 1956, iyapilibulwa na ba Bible Society, itila: “E lyo Yehova Lesa abumbile umuntu ku lukungu lwa mushili, na mu myona yakwe apuutilemo umupu wa mweo; no yo muntu abe cibumbwa ca mweo.” (Ukutendeka 2:7) Nga mwamona, ili ilembo talitila Adamu balimupeele umweo.

Ilyo Adamu abembwike, cinshi camucitikile ilyo papitile imyaka iingi? Lesa pa kumukanda tatile ali no kulapya umuyayaya mu mulilo wa pe awe. Lelo, Baibolo ya Diocese of Mbala, iyapilibulwa na baKatolika, ilondolola ifyo Lesa amupingwile ukuti: “Amabe yakulakupukila pa mpumi, ukalya ica kulya cobe mu kupiba amabe mpaka ukabwelele ku mushili uko wafumine; pantu uli lukungu, kabili ku lukungu eko ukabwelela.” (Ifilembo fipindeme ni fwe twafipindamika, te fyo fyalembwa muli iyi Baibolo; Ukutendeka 3:19) Tapali nangu cimo mu mashiwi ya kwa Lesa icilelanga ukuti Adamu nga afwa pali icali no kupusuka. Ilyo Adamu afwile, umweo wakwe walifwile.

Bushe kwaliba umuntu uwakwata umweo uushifwa? Lesa aebele kasesema Esekiele ati: “Umweo uwabifya e ukafwa.” (Esekiele 18:4, Diocese of Mbala) Umutumwa Paulo alembele ati: “Ulubembu lwaingilile mu muntu umo [Adamu] pano isonde, ne mfwa yaingilile mu lubembu; e fyo ne mfwa yayambukile ku bantu bonse, pantu bonse balibembwike.” (Abena Roma 5:12, Baibolo ya Cibemba iya mu 1956) Nga ca kuti abantunse bonse balabembuka, ninshi kanshi kuti twatila imyeo yonse ilafwa.

Bushe umweo uwafwa paliba ico waishiba nangu ico umfwa? Icebo ca kwa Lesa citila: “Abomi balishiba ukuti bakafwa, lelo abafwa bena tabeshibapo kantu.” (Lukala Milandu 9:5, Baibolo ya Cibemba iya mu 1983) Baibolo ilalondolola icicitika umuntu nga afwa. Itila: “Abwelela ku mushili wakwe, ubushiku bulya bwine yaloba amatontonkanyo yakwe.” (Amalumbo 146:4, Baibolo ya Cibemba iya mu 1956) Nga ca kuti ‘abafwa tabeshibapo kantu’ kabili ‘amatontonkanyo yabo yalaloba,’ kuti bacula shani mu mulilo wa pe?

Yesu Kristu apashenye imfwa ku kulaala, te ku kulola iyo.a (Yohane 11:11-14) Bamo nalimo kuti bakaana abati Yesu alesambilisha ukuti kwaliba umulilo wa pe no kuti ababembu bakapooswa mu mulilo wa pe. Nomba natulande pa fyo Yesu alandile pa mulilo wa pe.

[Futunoti]