Bushe Ukusambilila Icine pa Mulilo wa pe Kuti Kwamwafwa Shani?
ABANTU abasambilisha ukuti mu mulilo wa pe e mo abantu baculila, balenga Yehova Lesa ukulamoneka kwati mubi kabili aba ne mibele yabipa. Kwena, ca cine ukuti Baibolo ilatweba ati Lesa akonaula abantu ababipa. (2 Abena Tesalonika 1:6-9) Lelo ubukali bwalinga ubo Lesa akwata te mibele yakwe iyapulamo.
Lesa te munkalwe nelyo uwatemwa ukulandula. Umwine aipwishe ati: “Bushe ine kuti natemwa imfwa ya mubi?” (Esekiele 18:23, Diocese of Mbala) Nga ca kuti Lesa tatemwa umubi nga afwa, bushe kuti atemwa shani ukulatamba aba bene ababi balecula umuyayaya?
Imibele yapulamo iya kwa Lesa kutemwa. (1 Yohane 4:8) Ca cine, Lesa ‘musuma kuli bonse, alikwatisha ne cikuuku ku fibumbwa fyakwe fyonse.’ (Amalumbo 145:9, Diocese of Mbala) Lesa afwaya na ifwe ukumutemwa ukufuma pa nshi ya mutima.—Mateo 22:35-38.
Bushe Cinshi Cimulenga Ukucita Ifisuma—Ukutiina Umulilo wa pe Nangu Ukutemwa Lesa?
Icisambilisho ca kuti umweo ulacula mu mulilo wa pe cilenga abantu ukulatiina Lesa. Lelo, umuntu uwasambilila icine pali Lesa no kumutemwa akaba na katiina kuli Lesa. Amalumbo 111:10 yatila: “Ukukwatila Imfumu akatiina, e nshila fye iya kutoolelamo amano; na bantu abakwata akatiina, e bakula na mano.” (Baibolo ya Cibemba iya mu 1983) Ukuba na katiina kuli Lesa te kuba no mwenso wa kumutiina awe, lelo kuba no mucinshi ukalamba kuli Kalenga. Akatiina katulenga ukulatiina ukumukalifya.
Moneni ifyo ukusambilila icine pa mulilo wa pe kwa-afwile Kathleen, uuli ne myaka 32 kabili uwalebomfya imiti ikola kale. Kale alitemenwe sana ukusangwa ku maparte no kucita ulubuli, kabili ali-ipatile umwine e lyo tali ne mibele iisuma. Umwine atila: “Nalelolesha umwana wandi umwanakashi uwali no mwaka umo kabili naleti, ‘Ifyo ndecita kuli uyu mwana tafiweme. Nkayapya mu mulilo wa pe pa fyo ndecita.’” Kathleen alyeseshe ukuleka ukubomfya imiti ikola, lelo alifililwe. Atile: “Nalefwaya ukulacita ifisuma, lelo fyonse ifyo nalecita tafyaweme nakalya. Nshalemona umulandu wa kubela umuntu umusuma.”
Nomba Kathleen alanshenye ne Nte sha kwa Yehova. Kathleen atila: “Nasambilile ukuti takwaba umulilo wa pe. Mu fyo Amalembo yalelondolola mwali amano. Ukwishiba ukuti nshali no kupya mu mulilo wa pe, kwanengele ukumfwa bwino nga nshi.” Lelo alisambilile na pa bulayo bwa kwa Lesa ubwa kuti abantunse bali no kwikala umuyayaya pe sonde apashakabe ububifi. (Amalumbo 37:10, 11, 29; Luka 23:43) Kabili atila: “Nomba nalikwata isubilo lya cine cine ilya kwikala umuyayaya mu Paradaise!”
Bushe Kathleen ali no kuleka ukubomfya imiti ikola apo nomba alishibe ukuti takayepya mu mulilo wa pe? Atila: “Nga ca kuti nafwaisha ukubomfya imiti ikola, nalepepa, ukulomba Yehova Lesa ukuti angafwe. Naletontonkanya pa fyo amona ifibelesho fyabipa ifya musango yu, kabili nshalefwaya ukumukalifya. Aleasuka amapepo yandi.” (2 Abena Korinti 7:1) Ukutiina ukukalifya Lesa kwa-afwile Kathleen ukuleka ifibi ifyo alecita.
Ca cine, icingatwafwa ukucita ukufwaya kwa kwa Lesa pa kuti tukabe ne nsansa sha muyayaya, kutemwa Lesa no kuba na katiina kuli ena, te kulatiina ukuyapya mu mulilo wa pe. Uwaimbile amalumbo alembele ati: “Balishuka ababa na katiina ku Mfumu Lesa, abakonka amafunde yakwe!”—Amalumbo 128:1, Baibolo ya Cibemba iya mu 1983.
[Akabokoshi ne Fikope pe bula 9]
NI BANI BAKALUBULWA MU MULILO WA PE?
AmaBaibolo yamo yalafulunganya abantu pantu yapilibula amashiwi ya ciGriki yabili ayapusana, Geʹen·na na Haiʹdes, ati “umulilo wa pe.” Mu Baibolo, ishiwi lya kuti Geʹen·na lipilibula ukonaula nakalya nakalya, ukwabula isubilo lya kubuuka ku bafwa. Lelo, ababa mu Haiʹdes, nelyo mu Nshiishi, balikwata isubilo lya kubuuka.
E ico, ilyo Yesu afwile no kubuuka, umutumwa Petro aebele abalemukutika ati Yesu “tabamushile mu mulilo wa pe.” (Imilimo 2:27, 31, 32; Amalumbo 16:10, King James Version) Ishiwi ilyo bapilibula ati “umulilo wa pe” muli ici cikomo lishiwi lya ciGriki Haiʹdes. Yesu taile ku ncende imo ukwaba umulilo awe. Nga kukonka ishiwi lya ciGriki, Yesu aile ku nshiishi te ku “mulilo wa pe.” Lelo te Yesu fye eka Lesa alubula ku Nshiishi.
Ilyo ilanda pa kubuuka kwa bafwa, Baibolo itila: “Imfwa no mulilo wa pe fyafumishe abafwa abalimo.” (Ukusokolola 20:13, 14, KJ) Ukufumya abantu “mu mulilo wa pe” cikapilibula ukubuusha abantu abo Lesa amona ukuti nabalinga ukubuuka. (Yohane 5:28, 29; Imilimo 24:15) Ala twalikwata isubilo ilisuma sana ilya kwisamona abantu twatemwa babuuka ukufuma ku nshiishi! Yehova, Lesa uwakwata sana ukutemwa, akacita ici.