Bushe Inte sha kwa Yehova Balapwisha Ifyupo?
ABANTU abengi batila: “Umo pa baupana nga ayamba ukupepa kumbi, icupo cilapwa.” Limo abantu balanda aya mashiwi ya kusoka ku muntu uwaupa nelyo ukupwa nga ca kuti aba Inte ya kwa Yehova. Lelo bushe ifi balanda e ficitika lyonse?
Kwena umo pa baupana nga atemwa imipepele imo nelyo nga alefwaya ukwalula ifyo asuminamo pa nshita ntali, kuti cabipila umwina mwakwe. Kuti calenga asakamana, ukumfwa ububi, no kufulwa.
Ilingi line umukashi e ubalilapo ukufwaya ukwamba ukupepa kumbi. Bushe nga ca kuti abakashi benu balesambilila Baibolo ne Nte sha kwa Yehova, kuti icupo cenu caba shani? Nga mwalyupwa e lyo mulasambilila na Baibolo ne Nte sha kwa Yehova, kuti mwacita shani pa kuti tamusakamike abena mwenu?
Ifyo Abalume Benekela
Ba Mark, abekala ku calo ca Australia, baikele imyaka 12 mu cupo ilyo abakashi babo batendeke ukusambilila Baibolo ne Nte sha kwa Yehova. Ba Mark batile: “Nali ne nsansa mu cupo candi kabili nalebomba incito iisuma kabili twaleikala bwino nga nshi. Nomba umukashi wandi atampile ukusambilila Baibolo ne Nte sha kwa Yehova. Apo pene fye na-ambile ukumfwa kwati imikalile yandi yalabipa. Pa kubala ilyo umukashi wandi alesambilila Baibolo nalelanguluka fye, nomba ilyo anjebele ukuti alefwaya ukubatishiwa no kuba Inte ya kwa Yehova, calengele nsakamane sana.”
Ba Mark batampile ukulalanguluka ukuti nalimo icupo cabo cali no kupwa pa mulandu wa kuti abakashi babo bayamba ukupepa kumbi. Batontonkenye pa kukaanya abakashi babo ukulasambilila Baibolo no kubabinda ukulaaba na ba Nte. Lelo ba Mark tabakenye abakashi babo, baliloleleleko panono. Cinshi cacitike ku cupo cabo?
Ba Mark batila: “Icawama ca kuti icupo cesu calikoselako ukucila ifyo cali kale. Ukutula apo umukashi wandi abatishiwilwe no kuba Inte ya kwa Yehova imyaka 15 iya fumako, icupo cesu ciya cilewaminako fye.” Cinshi calengele icupo ukuwama? Ba Mark batila: “Icalengele maka maka ni co umukashi wandi alecita ifintu ifisuma ifyaba muli Baibolo. Lyonse fye alancindika.”
Ifyo Abakashi Aba-afwile Abalume Babo Balandapo
Bushe nga mwalyupwa e lyo mulasambilila Baibolo ne Nte sha kwa Yehova, cinshi mwingacita no kulanda ku bena mwenu pa kuti tabalesakamana? Kutikeni ku fyo abanakashi ba mu fyalo fyalekanalekana balandile.
Ba Sakiko aba ku Japan batile: “Apo naupilwa napapita imyaka 31 kabili nalikwata na bana batatu. Papita imyaka 22 ukutula apo nabela Inte ya kwa Yehova. Ukwikala no mwaume uushasumina mu fyo nasuminamo limo cilakosa. Lelo ndabombesha ukukonka ifyo Baibolo isambilisha ukuba ‘uwayanguka ukumfwa, uukokola ukulanda, uukokola ukukalipa.’ (Yakobo 1:19) Ndesha ukuba ne cikuuku ku balume bandi no kukonka ifyo balefwaya nga ca kuti tafilepusana na mafunde ya mu Baibolo. Ici, calilenga icupo cesu ukuba bwino.”
Ba Nadezhda aba ku Russia batile: “Napapita imyaka 28 apo naupilwa kabili apo nabela Nte papita imyaka 16. Ilyo nshilasambilila Baibolo nshaishibe ukuti abalume bandi e balingile ukuba umutwe wa ng’anda. Nalecita fye ifyo ne mwine nalefwaya ukwabula no kwipushako abalume bandi. Lelo mu kuya kwa nshita, naishilemona ukuti ukukonka ifyaba mu Baibolo kwalilengele ukuti mu lupwa lwesu mube umutende ne nsansa. (1 Abena Korinti 11:3) Panono panono natampile ukulanakila abalume bandi, kabili nabo bene balimona ifyo nayaluka.”
Ba Marli aba ku Brazil batile: “Nakwata abana babili kabili naikala imyaka 21 mu cupo. Papita imyaka 16 ukutula apo nabatishiwilwe ukuba Inte ya kwa Yehova. Nasambilile ukuti Yehova Lesa afwaya ukuti abaupana baikala pamo ukwabula ukulekana. Kanshi ndafwaisha ukuba umukashi musuma, kabili mfwaya ukulanda no kucita ifintu bwino pa kuti Yehova na balume bandi bengatemwa.”
Ba Larisa aba ku Russia batile: “Ilyo naishileba Inte ya kwa Yehova imyaka 19 iyapita, namwene ukuti icintu cacindamishe ico nali no kucita kwalula ubumi bwandi. Abalume bandi balimona ifyo Baibolo yanenga ukuba umukashi musuma, yalingafwa ukwishiba ukuti umulume wandi musuma. Kale twalekwata amafya pa fya kufunda abana, nomba ino nshita ubu bwafya bwalipwa. Abalume bandi balansuminisha ukusenda abana ku mapepo pantu balishiba ukuti ifyo baya mu kufundwa kuti fyabafwa.”
Ba Valquíria aba ku Brazil batile: “Papita imyaka 19 apo naupilwa kabili nalikwata no mwana. Napapita imyaka 13 apo nabela Inte ya kwa Yehova. Pa kubala, abalume bandi tabalefwaya ukuti ndeshimikila abantu Icebo ca kwa Lesa. Nomba nalebasuka bwino no kulenga beshibe ukuti Baibolo yalengafwa ukuba umuntu musuma. Abalume bandi basukile baishiba ifyo ukushimikila abantu Icebo ca kwa Lesa kwacindeme kuli ine. Nomba, balangafwa sana mu milimo ya kwa Lesa. Nga ndefwaya ukuya mu kusambilisha abantu Baibolo mu mishi, balantwala na motoka yabo, kabili balandolela pa nse mpaka napwisha.”
Baibolo Ilawamya Icupo
Nga ca kuti abena mwenu balasambilila Baibolo ne Nte sha kwa Yehova, mwilasakamana ukuti icupo cenu cikapwa. Mu fyalo ifingi, abaupa na baupwa balimona ukuti Baibolo ilawamya icupo.
Umwaume umo uushili Nte ya kwa Yehova atile: “Nangu ca kutila pa kubala nshaumfwile bwino ilyo umukashi wandi atampile ukupepa ku Nte sha kwa Yehova, ifyafumamo fisuma nga nshi.” Na umbi alandile aya mashiwi pa mukashi wakwe ukuti: “Pa mulandu wa kuti umukashi wandi wa cishinka, alishipa, kabili alikosa ku fya kwa Lesa, calenga ndekumbwa ifyo Inte sha kwa Yehova baaba. Icupo cesu caliwama nga nshi pa mulandu wa fyo asambilila muli Baibolo. Tulalangulukilana kabili tumona icupo cesu ukuti cikabelelela.”
[Akabokoshi ne Cikope pe bula 13]
Bushe Inte sha kwa Yehova Bamona Shani Icupo?
Inte sha kwa Yehova baishiba ukuti Baibolo Cebo ca kwa Lesa. Kanshi balicindamika sana ifyo ilanda pa cupo. Moneni ifyo Baibolo yalanda pa mepusho yakonkapo:
▪ Bushe Inte sha kwa Yehova baleba abo bapepa nabo ukupaatukana no muntu baupana nankwe nga ca kuti ena te Nte? Awe. Umutumwa Paulo alembele ati: “Ngo wa bwananyina ali no mukashi uushatetekela, kabili umukashi asumina ukwikala nankwe, tafwile ukumusha; kabili umwanakashi uuli no mulume uushatetekela, no mulume asumina ukwikala nankwe, tafwile ukusha umulume wakwe.” (1 Abena Korinti 7:12, 13) Inte sha kwa Yehova balakonka ili ifunde.
▪ Bushe Inte sha kwa Yehova baleba Nte waupwa ukusuula umulume wakwe uushili Nte? Awe. Umutumwa Petro alembele ukuti: “Mwe bakashi, mulenakila abalume benu, pa kutila na balya abakaana ukumfwila icebo ca kwa Lesa, banashiwe apabula ishiwi nangu limo ilyo balemona imibele isuma iya bakashi babo, pantu abene bakulaimwena imyendele yenu iisuma e lyo ne fyo mwabakwatila akatiina.”—1 Petro 3:1, 2.
▪ Bushe Inte sha kwa Yehova basambilisha ukuti umukashi afwile fye ukukonka fyonse ifyo umulume alanda? Awe. Umutumwa Paulo atile: “Ndefwaya mwishibe ukuti umutwe wa mwaume onse ni Kristu; no mutwe wa mwanakashi mwaume; no mutwe wa kwa Kristu ni Lesa.” (1 Abena Korinti 11:3) Umukashi umwina Kristu afwile ukucindika umulume wakwe pantu e mutwe wa lupwa. Lelo umukashi tafwile ukukonka fye fyonse ifyo umulume alanda. Umulume akalubulula kuli Lesa na Kristu. Kanshi umulume nga aeba umukashi ukucita ifingamulenga ukutoba ifunde lya kwa Lesa, umukashi umwina Kristu afwile “kunakila Lesa ukucilo kunakila abantu.”—Imilimo 5:29.
▪ Bushe Inte sha kwa Yehova basambilisha ukuti icupo tacifwile ukupwa? Awe. Yesu Kristu atile: “Ndemweba nati, onse uwaleka umukashi wakwe, apashili umulandu wa bulalelale, aupa na umbi, ninshi acita ubucende.” (Mateo 19:9) Kanshi filya fine Yesu alandile ukuti ubucende kuti bwapwisha icupo, e fyo ne Nte sha kwa Yehova baishiba. Lelo balishiba no kuti ifyupo tafilingile kupwila pa milandu fye iinono. Bakoselesha abo bapepa nabo ukulakonka amashiwi Yesu alandile aya kuti: ‘Umwaume akasha wishi na nyina no kulambatila ku mukashi wakwe, kabili aba babili bakaba umubili umo. . . . Kanshi, ico Lesa alundenye, umuntu e cilekanya.’—Mateo 19:5, 6.