Babombele Lesa no “Mutima Umo”

ABAYUDA na bena fyalo basangwike abaYuda balongana ukushinguluka abasambi ba kwa Yesu Kristu. Ni nshita ya Mutebeto wa Pentekoste, kabili abalendo ukufuma ukutali sana pamo nga ku Roma, na ku Partia balishile ku Yerusalemu. Abali mwi bumba balelanda indimi shalekanalekana. Lelo abasambi ba kwa Yesu abalelanshanya na ba balendo bena Galili. Abalendo bamo bapapa sana kabili baipusha abati: “Caba shani ukuti ifwe bonse umo umo tulebomfwila mu lulimi lwesu?”—Imil. 2:8.

Umutumwa Petro aima no kulondolola icilengele ici cisungusho ukucitika. Apo pene fye, ibumba lyasumina ifyo alondolola. Abapya abengi babatishiwa! (Imil. 2:41) Nangu ca kutila icilonganino cakula mu kwangufyanya, abantu balimo bali abaikatana. Luka uwalembeleko Baibolo atila: “Abengi abasumine bali no mutima umo.”—Imil. 4:32.

Abengi ababatishiwe pa bushiku bwa Pentekoste wa mu 33 C.E. balefwaya ukwikala mu Yerusalemu pa nshita iitaliko pa kuti basambilile na fimbi pa cisumino cabo icipya. Lelo ilyo baimine, tabaipekenye ukwisaikala inshiku ishingi. E ico kwali ukusangula indalama shalekabilwa pali ilya ine nshita. Abasumina bamo bali-itemenwe ukushitisha ifyo bakwete no kupeela indalama basangilemo ku batumwa pa kuti bakanye abalekabila. (Imil. 2:42-47) Balangile imibele iisuma sana, ne yi mibele, kutemwa na bukapekape!

Ukutula fye ku kale, Abena Kristu ba cine balitemwana kabili ni bakapekape. Pali lelo Abena Kristu balitwalilila ukwikatana ilyo balebombela Yehova no “mutima umo.” Umwina Kristu umo na umo alaitemenwa ukubomfya inshita yakwe, amaka, ne ndalama, ku mulimo wa kushimikila imbila nsuma no kutungilila fyonse ifyakuma Ubufumu bwa kwa Lesa.—Moneni umukululo uleti “Ifyo Bamo Basangula.”

[Akabokoshi pe bula 6, 7]

IFYO BAMO BASANGULA

IMISANGULO YA MULIMO WA MWI SONDE LYONSE

Abengi balapaatwilako libela, nelyo ukupekanishisha libela indalama isho babika mu tubokoshi twa misangulo utwalembwapo ati “Umulimo wa mwi Sonde Lyonse.”

Cila mweshi, ifilonganino filatuma ishi ndalama ku maofeshi ya Nte sha kwa Yehova aya mu calo cabo. Imisangulo ya kuitemenwa iya ndalama na yo kuti yatumwa mu kulungatika ku Watch Tower Bible and Tract Society of Pennsylvania, Akabokoshi 33459, Lusaka 10101. Umuntu nga atuma cheke kuli iyi adresi, alingile ukulemba ukuti abakapoka indalama ni ba “Watch Tower.” Abalefwaya kuti basangula ne fibeekobeeko nelyo ifipe fimbi ifya mutengo. Uulepeela ifya musango uyu, afwile ukutumina pamo na kalata iyalinga fye no kulondolola ukuti ubo bupe atumine ku maofeshi ya Nte sha kwa Yehova.

UKUPEKANYA UKUPEELA MU KUITEMENWA

Ukulunda pa kupeela indalama fye ishine, kwaliba inshila na shimbi isha kupeelelamo ku kwafwilisha umulimo wa Bufumu mwi sonde lyonse. Inshila shimo shimo ni shi:

Inshuwalansi: Umuntu kuti alembesha ba Watch Tower Society ukuti e bakapoka indalama sha cipangano ca inshuwalansi nelyo isha penshoni.

Indalama sha ku Banki: Umuntu kuti alemba icipangano ca kuti indalama sha ku banki, ifipepala ifilanga ukuti umuntu alibikishako indalama ku banki nelyo indalama sha penshoni, fyaseekeshiwa kuli ba Watch Tower Society. Nangu kuti alembesha ukuti ba Watch Tower Society e bakapoka indalama ilyo umwine akafwa. Kuti acite fyo ukukonka na mafunde ye banki abikishako indalama.

Nsonsela: Bamo abakwata indalama ishingi mu twampani kuti batila nsosela wabo aleya ku Watch Tower Society nge ndalama sha bupe. E lyo bambi na bo, kuti baumana akapi no kubika pamo indalama shabo no kushitwala ku banki, e lyo batila nsonsela wabo aleya ku Watch Tower.

Impanga ne Fikuulwa: Impanga ne fikuulwa ifyo bengashitisha kuti fyasangulwa ngo bupe, nangu nga ni ng’anda, kuti balemba fye icipangano ca kuti ba Watch Tower Society e bakaba abene ba ng’anda ilyo umwine akafwa. Ipusheni ku maofeshi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo ba Watch Tower Society impanga nelyo ifikuulwa.

Ifya Cishale no Kuseekesha: Umuntu kuti alemba no kusuminishanya na ba Watch Tower Society ukuti nga afwa ifipe fyakwe nelyo indalama fikabe fyabo, nelyo kuti aseekesha ifipe atemwa indalama kuli ba Watch Tower Society. Limo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nge fyo amashiwi ya kuti “ukupekanya ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabela.

Nga mulefwaya ukupeela mu kuitemenwa, mulingile ukulembela ku maofeshi ya Nte sha kwa Yehova no kwipusha nelyo ukubatumina lamya ukubomfya inambala ili pe samba.

Treasurer’s Office

Watch Tower Bible and Tract Society of Pennsylvania

Box 33459, Lusaka 10101

Lamya: (021) 1 272062