Bushe Lesa Alikwata Ishina?
Abengi basuka ati:
◼ “Ishina lyakwe ni Lesa.”
◼ “Takwata ishina.”
Cinshi Yesu asambilishe?
◼ “E ico imwe mufwile ukupepa ifi, amuti: ‘Shifwe wa ku muulu, ishina lyenu libe ilya mushilo.’” (Mateo 6:9) Yesu alishibe ukuti Lesa alikwata ishina.
◼ “Nalenga beshibe ishina lyenu kabili nkalenga likeshibikwe, pa kuti babe no kutemwa uko mwantemenweko, na ine mbe muli bena.” (Yohane 17:26) Yesu alengele bambi ukwishiba ishina lya kwa Lesa.
◼ “Tamwakamone ine nakalya mpaka mukatile, ‘Alipaalwa uuleishila mwi shina lya kwa Yehova.’” (Luka 13:35; Amalumbo 118:26) Yesu pa kulanda pali Lesa alemulumbula ne shina.
LESA umwine alitweba ishina lyakwe. Baibolo itila, umwine atile: “Nine Yehova. Ilyo e shina lyandi.”a (Esaya 42:8) Ishina lya kuti Yehova e fyo ishina Lesa aipeela umwine lifwile ukuba mu Cibemba nga kukonka ifyo lyali mu ciHebere. Nalimo kuti mwapapa nga mwasanga ukuti ili shina lyaibela ilya ciHebere lilasangwa imiku iingi nga nshi mu ma Baibolo ya kale. Na kuba, e shina ilisangwa sana mu Baibolo ukucila amashina yambi.
Abantu bamo nga mwabepusha ati, “Bushe Lesa nani ishina?” kuti batila, “ni Lesa.” Kwena ukwasuka ifi, cimo nga bakwipusha ati, “Nani uwacimfishe ilyo balesala kateka?” e lyo wayasuka ati, “muntu.” Ifi te fyasuko fyalungama, pantu “Lesa” no “muntu” te mashina iyo.
Cinshi Lesa atwebela ishina lyakwe? Pantu afwaya tumwishibe bwino. Umuntu kuti balemwita ati Tata, Shikulu, Kanabesa, nelyo Umulashi. Aya mashiwi yalatwebako fimo pa muntu balelandapo. Lelo ishina lya muntu kuti lyatwibukishako fyonse ifyo twaishiba pali ena. Na mashiwi ya kuti Shikulu, Uwa Maka Yonse, Shifwe, na Kabumba yalenga twatontonkanya pa fintu fyalekanalekana ifyo Lesa acita. Lelo ishina lyakwe, Yehova, e litwibukisha fye pali fyonse ifyo acita. Bushe batini kuti mwaishiba shani Lesa ukwabula ukwishiba ishina lyakwe?
Tatufwile fye ukwishiba ili ishina lelo tufwile no kulalibomfya. Mulandu nshi? Pantu Baibolo itweba ati: “Onse uwalilila kwi shina lya kwa Yehova akapusuka.”—Abena Roma 10:13; Yoele 2:32.
[Futunoti]
a Nga mulefwaya ukwishiba umwalola ishina lya kwa Lesa, no mulandu lishisangilwa mu ma Baibolo yamo, kuti mwabelenga pa mabuula 195-197 mu citabo icitila Bushe Cinshi Baibolo Isambilisha? icalembwa ne Nte sha kwa Yehova.
[Amashiwi pe bula 6]
Umuntu kuti balemwita ati Tata, Shikulu, Kanabesa, nelyo Umulashi. Lelo ishina lya muntu kuti lyatwibukishako fyonse ifyo twaishiba pali ena