4 Mwilatwishika
“We wa citetekelo cinono, nga cinshi wacitwishikila?”—Mateo 14:31.
CINSHI ABANTU BATWISHIKILA? Nangu fye basambi ba kwa Yesu na bo inshita shimo baletwishika. (Mateo 14:30; Luka 24:36-39; Yohane 20:24, 25) Na kuba, Baibolo ilondolola ukuti ukukanaba ne citetekelo “lubembu ulutwikata bwangu.” (AbaHebere 12:1) Umutumwa Paulo alembele ati: “Te bantu bonse ababa ne citetekelo.” (2 Abena Tesalonika 3:2) Te kutila abantu bamo te kuti bakwate icitetekelo. Lelo abengi tababombesha pa kuti bakwate icitetekelo. Lesa akaafwa ababombesha pa kufwaya ukukwata icitetekelo.
KUTI MWACITA SHANI PA KUTI MUKWATE ICITETEKELO? Ishibeni ifimulenga ukutwishika. Ku ca kumwenako, umusambi Toma aletwishika ukuti Yesu alibuukile, nangu ca kuti abasambi bambi balilandile ukuti balimumwene. Toma alefwaya ukushininkisha. Cinshi cacitike? Yesu alimupeele ubushininkisho alekabila pa kuti akwate icitetekelo cakosa.—Yohane 20:24-29.
Mu Baibolo, Yehova Lesa alitupeela ifyasuko tukabila pa kuti tuleke ukutwishika. Ku ca kumwenako, abantu abengi balaleka ukutetekela Lesa pa mulandu wa kuti batila e uleta inkondo, ubunkalwe, na macushi ifiponena abantunse. Bushe cinshi Baibolo ilandapo pali ifi?
Lesa tatekela mu mabuteko ya bantunse. Yesu alandile pali Satana ukuti e “kateka wa ici calo.” (Yohane 14:30) Satana aebele Yesu ukuti ali no kumupeela amaka ya kuteka amabufumu yonse aya pano calo nga ca kuti Yesu amupepako fye umuku umo, amwebele ati: “Ndekupeela amaka pa mabufumu yonse aya no bucindami bwa yako, pantu balimpeela, na ine mpeelako uo ntemenwe.” Yesu takeene ukutila Satana alikwete ayo amaka. Lelo amwebele ati: “Calilembwa ati, ‘Yehova Lesa obe e o ulepepa, kabili eka fye e o ulebombela.’” (Luka 4:5-8) Ni Satana na mabuteko ya bantunse e balenga ukuti pabe ukucula pano calo, te Lesa iyo.—Ukusokolola 12:9, 12.
Nomba line fye Yehova Lesa akafumyapo fyonse ifilenga tulecula. Kale kale Lesa alipekanya Ubufumu, nelyo ubuteko, ubukalatungululwa no Mwana wakwe, Kristu Yesu, ukuti e bo bukaleteka abantunse. (Mateo 6:9, 10; 1 Abeba Korinti 15:20-28) Nga filya Baibolo yasobele, imbila nsuma iya pa Bufumu ilebilwa nomba mwi sonde lyonse. (Mateo 24:14) Nomba line ubu Bufumu bukafumyapo abashibufwaya no kufumyapo fyonse ifilenga tulecula.—Daniele 2:44; Mateo 25:31-33, 46; Ukusokolola 21:3, 4.
BUSUMA NSHI BWABA MU KUKANATWISHIKA? Abatwishika baba kwati mabimbi ayatwalwa uku no ku “ku mwela onse uwe sambilisho ku bucenjeshi bwa bantu.” (Abena Efese 4:14; 2 Petro 2:1) Lelo, abasanga ifyasuko ku mepusho yabo baleminina “ndi mu citetekelo.”—1 Abena Korinti16:13.
Inte sha kwa Yehova, abalemba ino magazini, kuti batemwa ukumwafwa ukusanga ifyasuko ku fipusho ifimulenga ukulatwishika. Balemulomba ukuti mulesambilila na bo no kuimwena mwe bene ifyo basambilisha. Nga mwacita ifi, icitetekelo cenu muli Lesa cikakoselako.
Nga mulefwaya ukwishibilapo na fimbi, belengeni icipandwa 8 icitila, “Ubufumu bwa kwa Lesa Cinshi” e lyo ne cipandwa 11 icitila, “Cinshi Lesa Asuminishisha Ukucula?” mu citabo citila Bushe Cinshi Baibolo Isambilisha?a
[Futunoti]
a Inte sha kwa Yehova e balemba ici citabo.
[Icikope pe bula 9]
Abasanga ifyasuko ku mepusho yabo balakwata icitetekelo cakosa