Amepusho Ukufuma ku Babelenga

Bushe ni lilali Satana bamupoosele pano isonde?—Ukus. 12:1-9.

Nangu ca kutila ibuuku lya mu Baibolo ilya Ukusokolola talilanda inshita ine ine iyo Satana bamupoosele, lilalandapo fimo ifyacitike ifingatwafwa ukwishiba ilyo ici cacitike. Ica kubalilapo pali fi, kufyalwa kwa Bufumu bwa kwa Mesia. Pa numa ya ifyo, “kwabuukile inkondo mu muulu,” kabili Satana balimucimfishe na kwi pele pele balimupoosele pano isonde.

Baibolo yalilondolola bwino bwino ifilanga ukuti mu mwaka wa 1914 e mo “inshita ya bena fyalo” yapwile kabili e mwaka Ubufumu bwatampile ukuteka.a (Luka 21:24) Papitile inshita iyalepa shani pa kuti inkondo iyalengele ukuti Satana bamupoose pano calo ibuuke?

Ilembo lya Ukusokolola 12:4 litila, “Icing’wena [Satana] caiminine pa ntanshi ya mwanakashi uwali mupepi no kupaapa, pa kuti nga apaapa fye, cilye umwana wakwe.” Ici cilelanga ukuti Satana alefwaya ukonaula Ubufumu bwangu bwangu, lilya line fye bwafyelwe nga cingacitika. Nangu ca kuti Yehova alicilime no kulesha Satana ukucita ifyo alefwaya, Satana ena akoselepo fye kabili talekele ukwesha ukonaula ubu Bufumu bwafyelwe. E ico, “Mikaele na bamalaika bakwe” balibombelepo bwangu bwangu ukufumya “icing’wena na bamalaika ba ciko” mu muulu pa kuti Ubufumu bwionaulwa. Ici cilanga ukuti Satana bamucimfishe no kumupoosa pe sonde bwangu bwangu fye pa numa ya kufyalwa kwa Bufumu mu 1914.

Cimbi icitwafwa ukwishiba ilyo Satana bamupoosele pano calo, kubuuka kwa Bena Kristu basubwa, uko ubushininkisho bwa mu Malembo bulanga ukuti kwatampile pa numa fye ya kufyalwa kwa Bufumu.b (Ukus. 20:6) Apo Baibolo tayalandapo ukuti bamunyina ba kwa Kristu abasubwa balilwileko ilya nkondo iyo Yesu alwile ne cing’wena na bamalaika ba ciko, cilelangilila ukuti ilyo bamunyina ba kwa Kristu batampile ukubuuka, ninshi ilya nkondo mu muulu yalipwa kale.

Kwena, Baibolo taisokolola inshita ine ine iyo Satana ne fibanda fyakwe babatamfishe mu muulu. Lelo, ubushininkisho bulanga ukuti ico cacitike bwangu bwangu fye pa numa Yesu Kristu bamubikile pa Bufumu mu muulu mu 1914.

[Amafutunoti]