Ifyo Mwingacita pa Kumfwikisha Ifyaba mu Baibolo

1. Lombeni Lesa Ukuti Amwafwe

Ba Ninfa, abekala ku Italy batile, “Kwali inshita imo ilyo nalebelenga Baibolo ilyo nshilaya mu kusendama. Ico nalebelengela Baibolo mulandu wa kuti nalishibe ukutila Cebo ca kwa Lesa, kabili nangu ca kutila nshaleipakisha ukuibelenga, nalefwaya ukwishiba ifyo Lesa alemba mu Baibolo. Nalefwaya ukubelenga Baibolo yonse fye. Ilyo natendeke, naleumfwa fyonse ifyo nalebelenga, lelo naishilefika pa malyashi ayo nshaleumfwa umo yalolele, e calengele ukuti ndeke ukuibelenga.”

BUSHE ici cacitikile ba Ninfa calimucitikilapo na imwe? Ici e cacitikila abantu abengi. Nomba nga filya icipandwa cafumako cilandile, Yehova Lesa, uwatupeele Baibolo afwaya ukuti mwishibe ifyaba mu Cebo cakwe. Nomba kuti mwacita shani pa kuti mumfwikishe ifyaba muli Baibolo? Ica kubalilapo ico mufwile ukucita, kulomba Lesa ukuti amwafwe.

Abatumwa ba kwa Yesu balebamona ukuti bantu “abashasambilila kabili abantu yaweyawe” pantu tabaile ku masukulu yakalamba aya baYuda uko balesambilisha ifya mapepo. (Imilimo 4:13) Nangu bashaile kuli aya masukulu, Yesu abebele ukuti na bo bene kuti baumfwikisha ifyaba mu Cebo ca kwa Lesa. Bali no kufyumfwikisha shani? Yesu alondolwele ukuti: “Kaafwa, umupashi wa mushilo, uo Tata akatumina mwi shina lyandi, akamusambilisha fyonse.” (Yohane 14:26) Lesa abomfeshe uyu wine umupashi wa mushilo, nelyo amaka yabomba, ukupanga isonde na fyonse ifya mweo ifyaba pe sonde. (Ukutendeka 1:2) Na kabili alibomfeshe umupashi ilyo alengele abaume 40 ukulemba ifyebo fyakwe muli Baibolo. (2 Petro 1:20, 21) Uyu wine umupashi kuti wayafwa bonse abalefwaya ukwishiba ifyaba muli Baibolo.

Kuti mwacita shani pa kuti Lesa amupeele umupashi wakwe uwa mushilo? Mufwile ukuba ne citetekelo pa kumulomba. Na kuba, mufwile ukutwalilila fye ukulamulomba. Yesu atile, “Mulelomba, kabili bakamupeela . . . E ico imwe nga mwalishiba ukupeela abana benu ifya bupe ifisuma nangu ca kutila muli babifi, ninshi Shinwe wa mu muulu ena akacishapo ukupeela umupashi wa mushilo ku bamulomba!” (Luka 11:9, 13) Yehova alafwaya sana ukupeela umupashi wa mushilo ku bamulomba ukufuma pa nshi ya mutima. Aya maka yabomba kuti yamwafwa ukumfwikisha ifyebo fya mushilo ifyafuma kuli Lesa ifyalembelwe mu Baibolo imyaka iingi iyapita. Na kabili umupashi wa kwa Lesa kuti wamwafwa ukwishiba ifyo mwingacita pa kuti mulekonka ifyebo fyaba mu Baibolo.—AbaHebere 4:12; Yakobo 1:5, 6.

Kanshi, lyonse ilyo mulefwaya ukubelenga Baibolo, mulepepa kuli Lesa, mulemulomba ukuti amupeele umupashi wa mushilo pa kuti umwafwe ukumfwikisha Icebo cakwe.