Ababelenga Ino Magazini Balepusha Ukuti

Bushe Satana Muntu wa Cine Cine?

Baibolo isambilisha ukuti Satana Kaseebanya muntu wa cine cine. Nomba abalengulula ifyo Baibolo ilanda balasuusha sana ifi Baibolo isambilisha ukuti Satana muntu wa cine cine. Batila Satana te muntu, lelo matontonkanyo yabipa ayo abantunse bakwata.

Bushe tulingile ukupapa ifi abengi mu calo bashaishiba bwino Satana? Awe nakalya. Natulangilile: Icipondo kuti cafwala ica kufimba pa menso pa kuti becishiba kabili kuti catwalilila fye ukulacita ifyabipa ukwabula ukuti abantu bacishibe. E fyaba na Satana, mubi icine cine, e ulenga ifyabipa ifyalekanalekana mu calo ukulacitika kabili abantu balafilwa ukwiluka ukuti e ulenga. Yesu alilondolwele bwino ukuti Satana e ulenga ifintu mu calo ukubipa nga nshi. Yesu atile Satana e “kateka wa pano calo.”—Yohane 12:31.

Nomba ni kwi Satana afumine? Pa kubala ali ni malaika uwapwililika uo Lesa apangile mu muulu, nomba aishilepondoka no kusanguka Satana pantu atendeke ukukumbwa filya abantu balepepa Lesa, alefwaya ukuti e o balepepa. Muli Baibolo mwaba ilyashi lilanda pa fyo Satana alelanda na Yesu kabili ifyo alandile fyalangile ifyo aitemwa ne fyo afwaisha. Satana alefwaya ukuti Yesu ‘afukame no kumupepa.’—Mateo 4:8, 9.

Nangu fye ni mwi buuku lya kwa Yobo, mwaliba ilyashi lilanda pa fyo Lesa alelanshanya na Satana, kabili na mo mwine Satana alilangile ifyo afwaisha. Kuti acita icili conse pa kuti fye alenge abantu ukuleka ukupepa Lesa.—Yobo 1:13-19; 2:7, 8.

Nomba tontonkanyeni: Ifi Satana alelanda na Yehova Lesa e lyo na Yesu Kristu, bushe kuti twatila Satana te muntu lelo matontonkanyo fye yabipa ayo abantunse bakwata? Pantu na kuba Lesa no Mwana wakwe tabakwata amatontonkanyo yabipa nakalya! Kanshi twamona ukuti Satana muntu wa cine cine, ni malaika wabipa sana uushacindika Yehova na Yesu.

Ifi icalo caonaika, cilenga twashininkisha ukuti Satana wa cine cine. Ifyalo fimo filaleka ifya kulya fileibolela fye ilyo abantu babo balefwa ku nsala. Ifyalo filakwata ifyanso fya maka ifingonaula abantu abengi pa muku fye umo. Abantu balakowesha ne sonde. Nomba abantu abengi tabaishiba uulenga ukuti ifintu fya musango yu filecitika. Cinshi bashaishibila?

Baibolo ilanda ukuti Satana ‘alipofwisha amatontonkanyo ya bashatetekela.’ (2 Abena Korinti 4:4) Pa kusembeleka abantu ukuti bamukonke, Satana abomfya bamalaika bakwe. Satana e “kateka wa fibanda.” (Mateo 12:24) Nga filya fine umukalamba wa fipondo engakwata abantu abengi aba kumubombela ica kuti bamo te kuti bamwishibe no kumwishiba, e fyo na Satana abomfya ifibanda fyakwe ifyabipa nga nshi ku kulufya iminshipendwa ya bantu pano calo ica kuti tabeshiba no kuti e o balebombela.

E ico tufwile ukutasha sana ifi Baibolo yalondolola Satana Kaseebanya ica kuti twamwishiba bwino kabili twaishiba ne fyo abomba! Kanshi kuti twaishiba ne fya kucita pa kuti Satana Kaseebanya tatulufishe. Baibolo itukoselesha ukuti: “Nakileni Lesa; lelo kaaneni Satana Kaseebanya, na o akafulumuka kuli imwe.”—Yakobo 4:7.