Fundeni Abana Benu

Yeremia Talekele Ukubomba Umulimo

BUSHE limo mulafuupuka ica kuti mwafwaya no kuleka umulimo wenu?—a Abengi balafuupuka. Nangu fye mulumendo Yeremia na o wine alifuupwike. Na lyo line, talekele ukubomba umulimo pa mulandu wa fyo bambi balelanda ne fyo balecita. Lekeni tulande pa calengele Yeremia abe umuntu uwacindama kuli Lesa, nangu ca kutila inshita imo alefwaya ukuleka ukubombela Lesa.

Ilyo Yeremia talafyalwa, Lesa wa cine Yehova, alimusalile ukuba kasesema pa kuti akasoke abantu ukuti ifyo balecita fyalefulwisha Lesa. Bushe nawishiba ifyo Yeremia aishileasuka Yehova ilyo bamupeele umulimo?—“Ine nshaishiba ukulanda, pantu ndi mwaice.”

Bushe uletontonkanya ukuti Yehova ayaswike shani Yeremia?—Cikuuku cikuuku, Lesa amwebele fye ukuti: “Witila ‘Ndi mwaice.’ Lelo ukaye kuli bonse abo nkakutumako; kabili ukacite fyonse ifyo nkakweba. Wikabatiina.” Mulandu nshi ashali na kutiinina? Yehova amwebele ukuti: “Ine ndi na iwe pa kuti nkupokolole.”—Yeremia 1:4-8.

Nomba, nga fintu tumwene, Yeremia alishilefuupuka. Ne calengele ca kuti abantu balemupumya pantu alebombela Lesa. Atile, ‘Bonse balenseka akasuba konse kabili balempumya.’ E ico alefwaya ukuleka ukubomba umulimo. Atile: “Nshakamulumbule [Yehova], nshakasosele na kabili mwi shina lyakwe.” Bushe ca cine alilekele ukusesema?

Yeremia atile, ‘Mu mutima wandi icebo ca kwa Yehova caba kwati mulilo uulepya, uwacilikilwa mu mafupa yandi; kabili nalinakile ukucisunga mu nda.’ (Yeremia 20:7-9) Nangu ca kutila limo Yeremia aleumfwa umwenso, talekele ukubomba umulimo pantu alitemenwe Yehova. Natumone ifyo Yeremia acingililwe pa mulandu wa kuti tafuupwike.

Yehova aebele Yeremia ukusoka abantu ukuti Yerusalemu yali no konaulwa nga ca kutila tabalekele imibele yabo iyabipa. Ilyo Yeremia asokele abantu, balifulilwe kabili batile: “Uyu muntu alingile ukupingulwa ukufwa.” Lelo Yeremia alibapapeete ukuti ‘bomfwile ishiwi lya kwa Yehova.’ Lyena abebele ukuti: ‘Mwishibe ukuti nga mwanjipaya, ninshi muntu wa kaele muleipaya, pantu ni Lesa e wantumine ukulanda ifi fyonse kuli imwe.’ Bushe nawishiba icacitike?—

Baibolo itila: “Bacilolo bonse na bantu bonse batile kuli bashimapepo na bakasesema: ‘Uyu muntu talingile ukupingulwa ukufwa, pantu ni mwi shina lya kwa Yehova Lesa wesu e mo alandiile kuli ifwe.’” Nangu ca kutila Yeremia aletiina, tanenwike, ne ci calengele ukuti Yehova amucingilile. Nomba leka tumone icacitikile Uriya, kasesema umbi uwa kwa Yehova. Ifyo ena acitile fyalipusene ne fyacitile Yeremia.

Baibolo itila: ‘Uriya alesesema pali Yerusalemu ukulingana na mashiwi yonse aya kwa Yeremia.’ Nomba bushe nawishiba ifyo Uriya acitile ilyo Imfumu Yehoyakimu yafulilwe pa fyo alesesema?—Alitiinine kabili alilekele ukucita ukufwaya kwa kwa Lesa no kufulumukila ku Egupti. Lelo imfumu yatumine aba kuyamusenda no kumuleta. Ilyo bamubweseshe, bushe nawishiba ifyo iyi mfumu yabipa yacitile?—Yalimwipeye ku lupanga!—Yeremia 26:8-24.

Kuti watila cinshi calengele ukuti Yehova acingilile Yeremia lelo Uriya ena tamucingilile?—Kwena, Yeremia limo aletiina nga filya fine Uriya aletiina, lelo Yeremia talekele ukubombela Yehova kabili tafulumukile ku ncende imbi. Talekele ukubomba umulimo. Bushe lisambililo nshi twingasambilila ku fyo Yeremia acitile?—Isambililo limo lya kutila, limo kuti cayafya ukucita ifyo Lesa atweba, lelo lyonse tufwile ukumucetekela no kumumfwila.

[Futunoti]

Amepusho:

○ Mulimo nshi Lesa apeele Yeremia?

○ Mulandu nshi Yeremia alefwaila ukuleka ukubomba umulimo?

○ Cinshi calengele ukuti Lesa acingilile Yeremia, lelo cinshi ashacingilile Uriya?

○ Finshi wasambilila ku fyo Yeremia acitile?