Fundeni Abana Benu

Yesu Alisambilile Ukuba ne Cumfwila

BUSHE limo cilakukosela ukuba ne cumfwila?—a Te kuti tupape nga watila cilakukosela. Umuntu fye onse limo limo cilamukosela ukuba ne cumfwila. Bushe walishiba ukuti nangu fye ni Yesu alisambilile ukuba ne cumfwila?—

Bushe nawishiba abo abaice bonse balingile ukulaumfwila?—Ni batata na bamayo. Baibolo itila: “Muleumfwila abafyashi benu ukulingana ne fyo Shikulu afwaya.” (Abena Efese 6:1) Bushe wishi wa kwa Yesu nani?—Ni Yehova Lesa, kabili na ifwe bene ni Shifwe. (Mateo 6:9, 10) Nga wacasuka ukuti abafyashi ba kwa Yesu ni Yosefe na Maria, na lyo line ninshi wacilungika. Bushe walishiba icacitike pa kuti babe abafyashi bakwe?—

Malaika Gabriele aebele Maria icali no kucita pa kuti akwate umwana nangu ca kuti takumenepo no mwaume. Yehova acitile icipesha amano pa kuti Maria emite. Malaika Gabriele aebele Maria ukuti: “Amaka ya Wapulamo yakakufimba. E mulandu wine uukafyalwa aketilwa uwa mushilo, Umwana wa kwa Lesa.”—Luka 1:30-35.

Lesa abuulile ubumi bwa Mwana wakwe uwali mu muulu no kububika mwi fumo lya kwa Maria. E fyo Yesu atendeke ukukula nga filya fine abana bonse bakula mwi fumo lya banyinabo. Pa numa ya myeshi 9, Yesu alifyelwe. Pa nshita Yesu afyelwe, ninshi Yosefe alyupa Maria, kanshi abantu abengi balemona fye kwati Yosefe e wali wishi wa kwa Yesu. Lelo ali fye ni wishi uwamukushishe. Kanshi kuti twatila Yesu akwete bawishi babili!

Ilyo Yesu ali fye ne myaka 12, alicitile icintu cimo icalangile ifyo atemenwe sana Wishi wa ku muulu Yehova. Pali ilya nshita, ulupwa lwa kwa Yesu lwaile ku Yerusalemu ukutali ku kusangwa ku Ca Kucilila kabili ifi e fyo balecita cila mwaka. Nomba ilyo balebwelelamo ku Nasarete, Yosefe na Maria tabaishibe ukuti Yesu alishele ku numa. Bushe nawishiba icalengele ukuti beishiba ukuti nashala?—

Pali ilya nshita, ninshi Yosefe na Maria balikwete abana na bambi. (Mateo 13:55, 56) E lyo bafwile bali na balupwa bambi abo bale-endela pamo nabo, pamo nga Yakobo, Yohane, na shibo Sebede, e lyo na nyinabo Salome uwali nalimo nkashi mbiye wa kwa Maria. E co Maria nalimo aletontonkanya ukuti Yesu ali pamo na balupwa.—Mateo 27:56; Marko 15:40; Yohane 19:25.

Ilyo Yosefe na Maria baishibe ukuti Yesu taali nabo, balibwelelemo ku Yerusalemu, kabili balimufwaile icine cine. Pa bushiku bwalenga shitatu, e lyo bamusangile mwi tempele. Maria amwebele ati: “We mwana, cinshi ico watucushisha ifi? Mona, bawiso na ine natucula ukukufwaya.” Yesu na o amwaswike ati: “Ico mulemfwaila cinshi? Bushe tamwaishiba ukuti mfwile ukuba mu ng’anda ya kwa Tata?”—Luka 2:45-50.

Bushe uletontonkanya ukuti Yesu alibifishe pa kwasuka banyina muli ulya musango?—Kwena abafyashi bakwe balishibe ukuti Yesu alitemenwe ukupepa pa ng’anda ya kwa Lesa. (Amalumbo 122:1) Bushe Yesu alilubile pa kutontonkanya ukuti pa kumufwaya balingile ukubalila pe tempele lya kwa Lesa?—Pa numa, Maria atwalilile ukutontonkanya pa mashiwi Yesu alandile.

Bushe Yesu ali ne cumfwila kuli Yosefe na Maria?—Baibolo itila: “[Yesu] aile na bo no kufika ku Nasarete, kabili alebanakila.” (Luka 2:51, 52) Cinshi twingasambililako ku fyo Yesu acitile?—Na ifwe tulingile ukulaumfwila abafyashi besu.

Nomba te lyonse caleangukila Yesu ukuba ne cumfwila, nangu fye ni kuli Wishi wa ku muulu.

Inshita ya bushiku ilyo talafwa, Yesu aipwishe Yehova nga kuti ayalula ifyo alefwaya ukuti Yesu apitemo. (Luka 22:42) Lelo Yesu ali ne cumfwila kuli Lesa nangu ca kuti calyafishe. Baibolo itila “asambilile icumfwila ku fintu aculileko.” (AbaHebere 5:8) Bushe ulemona ukuti na ifwe bene kuti twasambilila icumfwila?—

[Futunoti]

AMEPUSHO:

▪ Cali shani pa kuti Maria abe nyina wa kwa Yesu, kabili cali shani pa kuti Yesu akwate bawishi babili?

▪ Cinshi calengele ukuti abafyashi ba kwa Yesu beishiba ukuti Yesu alishele?

▪ Ni kwi Yesu ale-enekela abafyashi bakwe ukumusanga?

▪ Cinshi wingasambilila ku fyo Yesu acitile?

[Icikope pe bula 31]

Cinshi uletontonkanishisha ukuti Yosefe na Maria balingile ukubalilapo ukuya kwi tempele pa kufwaya Yesu?