Ifipusho Ukufuma ku Babelenga

Bushe ifipendo fiba muli lipoti ya mwaka iya mulimo fyalola mwi?

Cila mwaka tulafwaisha ukumona lipoti iiba mu citabo ca Yearbook na mu Ubutumikishi Bwesu Ubwa Bufumu. Tulatemwa ukwishiba ifyo abantu ba kwa Yehova babombele umulimo wa kushimikila pa Bufumu no kusambilisha uwa mwi sonde lyonse. Lelo pa kuti tulenonkelamo sana muli iyi lipoti, tufwile ukwishiba bwino bwino umo ifipendo fyalola. Moneni fimo ifya kumwenako.

Umwaka wa mulimo. Uyu umwaka utendeka mu September ukuyafika mu August umwaka wakonkapo. Muli Yearbook muba lipoti ya mwaka wafumineko. E ico muli Yearbook ya mwaka wa 2011, mwaba lipoti ya mwaka wa mulimo uwa 2010. Uyu mwaka watendeke pa September 1, 2009 ukuyafika ku August 31, 2010.

Icipimo ca pa muulu ica bakasabankanya. “Bakasabankanya” ni baNte ababatishiwa e lyo na bashabatishiwa abasuminishiwa ukulashimikila pa Bufumu. “Icipimo ca pa muulu ica bakasabankanya” cifuma mu mweshi uuli onse mu mwaka wa mulimo umuba impendwa iikalamba sana iya bakasabankanya abacitile lipoti. Pali iyi mpendwa limo palaba na malipoti ya mweshi wafumineko ayo bashapendeleko pa mulandu wa kuti yalicelelwe. Ici cilenga bakasabankanya bamo ukupendwa libili. Nomba pali iyi mpendwa tababikapo bakasabankanya ababombele lelo abashatumine bwangu lipoti. E mulandu wine cawamina ukulemba bwangu lipoti. “Avareji ya bakasabankanya” ni mpendwa ya bakasabankanya abacita lipoti inshita babomba mu mulimo wa kushimikila cila mweshi.

Ama-awala yonse. Ukulingana ne citabo ca 2011 Yearbook, Inte sha kwa Yehova babombele ama-awala 1.6 billion mu mulimo wa kushimikila. Lelo aya te ma-awala yonse ayo tubomfya mu kupepa, pantu tatupendelapo ayabomfiwa mu bucemi, mu kulongana, ku kuisambilisha Baibolo, e lyo no kwetetula.

Indalama shibomfiwa. Mu mwaka wa mulimo uwa 2010, Inte sha kwa Yehova babomfeshe indalama ukucila pali $155 milioni ku kusakamana bapainiya baibela, bamishonari, na bakangalila benda mu milimo babomba. Ici cipendo tachisanshamo indalama shibomfiwa pa kupulinta impapulo shesu, nelyo ishibomfiwa ku kusakamana ababomba umulimo wa kuitemenwa pa Bethel abacila 20,000 pano calo.

Abalileko pa Cibukisho. Iyi ni mpendwa ya bantu ababatishiwa abalyako ifimpashanya pa Cibukisho isonde lyonse. Bushe impendwa ya balyako e mpendwa ya basubwa ababa pano calo? Iyo. Kulaba ifingi ifilenga abantu ukulyako. Bambi ni fintu basuminemo uko balepepa kale, e lyo bambi malwele ya ku muntontonkanya yalenga batendeke ukulya nangu line tabaitwa ukuyaikala ku muulu. Kanshi tatwingeshiba impendwa ya cine iya basubwa pano isonde; kabili tatufwile no kuishiba. Ibumba Litungulula talisunga amashina ya bantu bonse abalyako umukate no kunwako umwangashi.a

Ico twaishiba ca kutila, pano isonde pakaba “abasha ba kwa Lesa wesu” ilyo imyela ya konaula pa bushiku bukalamba tabalailekelako. (Ukus. 7:1-3) Ilyo iyo inshita tailafika, abasubwa bakatwalilila ukututungulula mu kubomba umulimo uulembwa bwino bwino muli Lipoti ya mwaka onse uwa mulimo. No yu, mulimo wa kushimikila no kusambilisha uulebombwa sana pali lelo.

[Futunoti]