Sambilileni Icebo ca kwa Lesa
Kuti Twasala Shani Ifibusa Ifisuma?
Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe ayo masuko.
1. Mulandu nshi tulingile ukusalila bwino ifibusa?
Abantu abengi balafwaya ukutemwikwa ku bantu. Ici cine e cilenga ukuti ilingi tulepashanya abantu tuba nabo. Kanshi abanensu kuti balenga twaba ne mibele iyo bakwata. E ico imibele iyo tukakwata ku ntanshi ishintilila sana pa bantu abo twasala ukuba ifibusa fyesu.—Belengeni Amapinda 4:23; 13:20.
Davidi uwalembeleko Baibolo alisalile bwino ifibusa fyakwe. Aleangala na bantu abalemwafwa ukutwalilila uwa kaele kuli Lesa. (Amalumbo 26:4, 5, 11, 12) Ku ca kumwenako, Davidi aleumfwa bwino ukwangala na Yonatani pantu alemukoselesha ukutetekela sana Yehova.—Belengeni 1 Samwele 23:16-18.
2. Kuti mwacita shani pa kuti mube cibusa wa kwa Lesa?
Nangu ca kuti Yehova alikwatisha amaka, kuti twaba ifibusa fyakwe. Ku ca kumwenako, Abrahamu ali ni cibusa wa kwa Lesa. Abrahamu alitetekele Yehova kabili alemumfwila, e ico Yehova alemumona ukuti ni cibusa wakwe. (Ukutendeka 22:2, 9-12; Yakobo 2:21-23) Na ifwe nga twacetekela Yehova no kulacita ifyo afwaya, kuti twaba ifibusa fyakwe.—Belengeni Amalumbo 15:1, 2.
3. Busuma nshi bwaba mu kukwata ifibusa ifisuma?
Ifibusa fya cine cine fyaliba ne cishinka kabili kuti fyamwafwa ukulacita icalungama. (Amapinda 17:17; 18:24) Ku ca kumwenako, nangu ca kuti Yonatani alicilile Davidi imyaka nalimo 30, kabili e wali no kupyana wishi pa bufumu mu Israele, ali uwa cishinka kuli Davidi uo Lesa asalile ukuba imfumu. Na kabili ifibusa fya cine cine tafitiina ukumulungika nga ca kuti mwalufyanya. (Amalumbo 141:5) Ifibusa ifyatemwa Lesa fikamwafwa ukuba ne mibele iisuma.—Belengeni 1 Abena Korinti 15:33.
Pa Ng’anda ya Bufumu iya Nte sha kwa Yehova e po mwingasanga abantu abatemwa ukucita icalungama nga imwe. Palya, e po mukasanga ifibusa abakamukoselesha ukulacita ifyo Lesa atemwa.—Belengeni AbaHebere 10:24, 25.
Lelo kwena, limo na banenu abatemwa Lesa kuti bacita fimo ifyo mushingatemwa. Mwilafulwa bwangu nga ca kutila balufyanya. (Lukala Milandu 7:9, 20-22) Muleibukisha ukuti takwaba icibusa icapwililika, e lyo kabili ifibusa ifyatemwa Lesa fyalicindama nga nshi kuli ifwe. Icebo ca kwa Lesa citufunda ukulasuula ku filubo fya Bena Kristu banensu.—Belengeni Abena Kolose 3:13.
4. Kuti mwacita shani nga ca kuti abo mumona ati fibusa fyenu balemukaanya ukusambilila Baibolo?
Abantu abengi basanga ukuti nga batendeka ukusambilila Baibolo, ifibusa fyabo fimo filabalesha. Nalimo ifibusa fya musango yu tafyaishiba ubusuma bwaba mu kusambilila Baibolo nelyo tafyaishiba ifyo Baibolo yalaya abantunse ifyo mwasambililapo. Nalimo kuti mwabasambilishako ubusuma bwaba mu kusambilila Baibolo.—Belengeni Abena Kolose 4:6.
Limo abo mumona kwati banenu kuti balasuusha imbila nsuma iyaba mu Cebo ca kwa Lesa. (2 Petro 3:3, 4) Bamo kuti balemupumya ilyo mulefwaisha ukucita icalungama. (1 Petro 4:4) Ifya musango yu nga fyamucitikila, ninshi mufwile ukusalapo cimo, pa kuba cibusa wa kwa Lesa nelyo uwa bantu ba musango yu. Nga mwasalapo ukuba cibusa wa kwa Lesa, ninshi mwasala cibusa umusuma nga nshi.—Belengeni Yakobo 4:4, 8.
Nga mulefwaya ukwishibilapo na fimbi, belengeni icipandwa 12 na 19 mu citabo ca Bushe Cinshi Baibolo Isambilisha? icalembwa ne Nte sha kwa Yehova.