Ifyo Twingacita Pa Kuti Tulenonkelamo Sana Ilyo Tulebelenga Baibolo
Kuti twacita shani pa kuti tuleumfwa bwino ilyo tulebelenga Baibolo? Kuti twacita shani pa kuti tulenonkelamo sana mu fyo tulebelenga? Natulande pa fintu fitatu ifingatwafwa ukunonkelamo sana.
1 UKUPEPA: Ica kubalilapo ico tulingile ukucita, kupepa. (Amalu. 42:8) Mulandu nshi? Tulingile ukwishiba ukuti, ukubelenga Icebo ca kwa Lesa na ko kwine kupepa. Kanshi tulingile ukupepa kuli Yehova pa kuti engatwafwa ukuba abashikatala pa kubelenga na pa kuti engatupeela umupashi wa mushilo. (Luka 11:13) Ba Barbara ababomba bumishonari imyaka iingi batile: “Ilyo nshilatampa ukubelenga nangu ukusambilila Baibolo, lyonse ndapepa kuli Yehova. Nga napwisha ukupepa, ndomfwa ukuti Yehova alangafwa ukumfwikisha ifyo ndebelenga kabili alatemwa.” Ukupepa ilyo tatulatampa ukusambilila kulalenga twaumfwikisha ifyo tulebelenga.
2 UKUTONTONKANYAPO: Pa mulandu wa kukanakwata inshita, bamo bapelela fye mu kubelenga Icebo ca kwa Lesa ukwabula ukutontonkanyapo. Eco tabanonkelamo nga filya benganonkelamo nga balebelenga Baibolo no kutontonkanyapo. Ba Carlos ababombela Yehova pa myaka 50 baliluka ubusuma bwaba mu kusanga inshita ya kutontonkanya pa fyo umo alebelenga pa kuti engalanonkelamo. Batile: “Nomba mbelenga fye amabula yabili mu Baibolo cila bushiku. Lyena kuti nakwata inshita iikalamba iya kutontonkanya pa fyo nabelenga pa kuti ningasambililamo ifishinka ifyacindama.” (Amalu. 77:12) Nga tulekwata inshita ya kutontonkanya pa fyo tulebelenga, kuti tuleishibilapo na fimbi kabili kuti twalaumfwikisha ifyo Lesa afwaya.—Kol. 1:9-11.
3 UKUKONKA IFYO MULESAMBILILA: Nga twaishiba ubucindami bwa mulimo umo, tulanonkelamo sana. E fyo caba na ku kusambilila Baibolo. Gabriel, munyinefwe uubelenga lyonse Baibolo atile: “Ukubelenga Baibolo kulangafwa lyonse ukupwisha amafya, kabili kulanenga no kwafwako bambi.” Na kabili atile: “Ndesha ukukonka fyonse ifyo ndesambilila.” (Amala. 11:18; Yosh. 1:8) Kanshi kuti twaishiba sana ifingi pali Lesa nga tulebelenga Baibolo no kukonka ifyo tulesambilila.—Amapi. 2:1-5.
UKUPITULUKAMO: Ala lishuko sana ukulasambilila Icebo ca kwa Yehova Uwakwatisha amano! (Rom. 11:33) Eco umuku ukakonkapo ilyo mukalasambilila, mukashininkishe ukuti mwabalilapo ukupepa kuli Yehova no kumulomba ukuti akamwafwe ukumfwikisha ifyo mulebelenga kabili mulingile no kulomba umupashi wa mushilo. Lyena pa kubelenga mufwile ukulatuushako pa kuti mwatontonkanya pa fyo mulebelenga. E lyo kabili mulingile ukupitulukamo no kulakonka ifyo mulesambilila cila bushiku. Nga mulekonka ishi inshila shacindama, mukamona ukuti ukusambilila Baibolo kukawama sana kabili mukalanonkelamo.