Palameni Kuli Lesa
‘Mukakontamina Pali Ine’
UKUICEFYA kusuma. Ilingi tulatemwa ukuba na bantu abaicefya. Lelo ica bulanda ca kuti muno nshiku abantu abengi tabaicefya, maka maka ababa mu bulashi, nelyo abakwata amaka ya kutungulula. Inga Yehova Lesa, uwakwatisha amaka, bushe aliicefya? Natulande pa mashiwi kasesema Yeremia alembele ayaba pa Inyimbo sha Bulanda 3:20, 21.—Belengeni.
Yeremia alembele ibuuku lya Inyimbo sha Bulanda ninshi ifintu fyalibipa mu Israele. E lyo fye umusumba wa Yerusalemu, uo atemenwe sana, baonawile ku bena Babiloni kabili ici calengele omfwe sana ububi. Uyu kasesema uwaumfwile sana ububi alishibe ukuti Lesa talufyenye pa kupingula abena Israele, pantu balibembukile Lesa. Lelo bushe Yeremia takwete isubilo? Bushe aletontonkanya ukuti Lesa aali sana ukutali nelyo ukuti tapoosele amano ku bantu ica kuti te kuti amone abalapiile no kubafumya mu bucushi? Umfweni ifyo Yeremia asosele, kabili cali kwati alelandilako abantu bakwe.
Nangu ca kutila abantu abengi bali no bulanda, Yeremia ali ne subilo. Alilile kuli Yehova ukuti: “Cine cine [mwe Yehova] mukebukisha no kukontamina pali ine.” (Icikomo 20) Yeremia taletwishika, alishibe ukuti Yehova taali no kumulaba, nelyo ukulaba abantu Bakwe abalapiile. Lelo bushe cinshi Lesa wa maka yonse ali no kucitapo?—Ukusokolola 15:3.
Yeremia alishininkishe ukuti Yehova aali no “kukontamina” bonse abalapiile icine cine. Muli Baibolo imo, ici icikomo bacipilibula ukuti: “Njibukisheni, kabili inameni ukufika pali ine.” Aya mashiwi yalenga twaishiba ukuti Lesa wa cikuuku. Yehova, ‘uwapulamo pano isonde ponse,’ akenama pa nshi, mu nshila ya mampalanya, pa kuti afumye abamupepa mu bucushi no kubapaala na kabili. (Amalumbo 83:18) Ukwishiba ifi, kwalengele Yeremia uwali no bulanda ukusansamuka. Uyu kasesema wa cishinka apampamine pa kulolela ukuti Yehova akapusushe abantu bakwe abalapiile pa nshita umwine alefwaya.—Icikomo 21.
Amashiwi Yeremia alembele yatusambilisha ifintu fibili pali Yehova. Ica kubalilapo ca kuti aliicefya. (Amalumbo 18:35) Nangu ca kutila Yehova “alisumbuka pa mulandu wa maka yakwe,” alaitemenwa ukwinama pa kuti atwafwe ilyo tulecula. (Yobo 37:23; Amalumbo 113:5-7) Ala ukwishiba ukuti Yehova aliicefya kulatusansamusha! Ica bubili ca kuti Yehova wa luse; ‘ali-iteyanya ukwelela’ ababembu abalapila kabili alabatemwa na kabili. (Amalumbo 86:5) Iyi mibele ibili, ukuicefya no luse, yendela pamo.
Ala caliwama nga nshi ifi Yehova ashaba nga bakateka abantunse, abafwaya fye ukucita ifyo abene balefwaya kabili abashibika amano ku bantu pa mulandu wa cilumba bakwata! Bushe te kuti mutemwe ukusambilila na fimbi pali Lesa uwaicefya kabili uitemenwa ‘ukwinama’ pa kuti asansamushe abamupepa no kubapeela isubilo?
Amalembo ya kubelenga mu June:
[Amashiwi pe bula 14]
Yehova alaitemenwa ukwinama pa kuti atwafwe ilyo tulecula