Sambilileni Icebo Ca Kwa Lesa
Bushe Lesa Akabikako Ubuteko Ubukateka Icalo Conse?
Ici cipande cilelanda pa mepusho ayo nalimo mutontonkanyapo kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.
1. Mulandu nshi abantunse balekabila ubuteko bumo fye ubwa kuteka icalo conse?
Muno nshiku amafya yaba fye mpanga yonse. Mu fyalo fimo abantu abengi bapiina kabili balabacusha. E lyo mu fyalo fimbi abantu abengi balikwata ifintu ifingi ukucila na pa fyo bakabila. Kanshi ubuteko bumo nga e buleteka icalo conse e lyo kwingaba ukwakanya bwino icuma ca calo ukwabula umucishacinani.—Belengeni Lukala Milandu 4:1; 8:9.
2. Nani engateka bwino abantu mu calo conse?
Abantu abengi balakaana ukutila kuti kwaba kateka wa calo conse pantu takwaba umuntu nangu umo, umwaume atemwa umwanakashi uwingateka abantu bwino. Takwaba umuntunse nangu umo uo abantu bonse mu calo bengatemwa ukutila alebateka. Na kuba, abantu bonse nga bapeelwa amaka ilingi line balatendeka ukuyabomfya bubi bubi. Abengi balatiina ukukwata kateka umunkalwe.—Belengeni Amapinda 29:2; Yeremia 10:23.
Yehova Lesa alisala Umwana wakwe Yesu, ukulateka abantu umuyayaya. (Luka 1:32, 33) Yesu alikelepo pano calo, e co alishiba bwino ifyo abantu bakabila. Ilyo ali pano calo aliposeshe abalwele, alisambilishe abafuuka e lyo kabili alesangako inshita ya kuba na baice. (Marko 1:40-42; 6:34; 10:13-16) E co kanshi Yesu e Kateka walinga.—Belengeni Yohane 1:14.
3. Bushe ubuteko bumo kuti bwateka bwino icalo conse?
Lesa alisala Umwana wakwe ukuteka icalo ukufuma ku muulu. (Daniele 7:13, 14) Nga filya fine kateka umuntunse takabila ukuba mu misumba yonse iyo ateka, Yesu na o wine takabila ukuba pa calo pa kutila ateke abantunse.—Belengeni Mateo 8:5-9, 13.
Bushe abantu bonse bakatemwa Yesu ukuba Kateka wabo? Awe nakalya. Bantu fye abatemwa ubusuma e bakasumina ukuti akabe kateka wabo. Yehova akawamya icalo ilyo akakanda abantu bonse abakaana Kateka wakwata ukutemwa kabili uwalungama uo asala.—Belengeni Mateo 25:31-33, 46.
4. Finshi Kateka wa calo conse akacita?
Nga filya fine kacema alonganya impaanga shakwe pamo, Yesu na o alitendeka kale ukulonganya abantu abafuuka aba mu fyalo fyonse kabili alebasambilisha inshila sha kwa Lesa isha kutemwa. (Yohane 10:16; 13:34) Aba bantu balatungilila sana Yesu e lyo no kuteka kwakwe. (Amalumbo 72:8; Mateo 4:19, 20) Mu calo conse fye abatekwa ba cishinka aba kwa Yesu baliba abaikatana mu kubilisha ukuti Yesu ni Mfumu.—Belengeni Mateo 24:14.
Nomba line Yesu ali no kubomfya amaka yakwe ukufumyapo imitekele yabipa iicusha abantunse. Alisala abakonshi bakwe bamo aba cishinka ukuteka nankwe mu muulu. (Daniele 2:44; 7:27) Ubufumu bwa kwa Yesu bukalenga abantu isonde lyonse ukwishiba Yehova kabili bukaleta na paradaise nga ilya iyaliko pa kutendeka kwa bantunse.—Belengeni Esaya 11:3, 9; Mateo 19:28.
Nga mulefwaya ukwishibilapo na fimbi, belengeni icipandwa 8 muli ici citabo Bushe Cinshi Baibolo Isambilisha?, icalembwa ne Nte sha kwa Yehova.