Palameni Kuli Lesa
Bushe Mwaliba mwi ‘Buuku lya Cibukisho’ Ilya kwa Lesa?
BUSHE Yehova alamona ifyo ababomfi bakwe baibikilishako ukucita ifyo afwaya? Ee alamona! Tamona fye ifyo bamulumbanya e lyo ne fisuma ifyo bacita, lelo alamona ne fisuma ifyo batontonkanya pali ena. Na kuba, Yehova takalabe abantu bakwe ne fyo bacita. Nomba kuti twacetekela shani ukuti takalabe? Icasuko cisangwa mu mashiwi yalembelwe na kasesema Malaki.—Belengeni Malaki 3:16.
Muli ba 400 B.C.E., ilyo Malaki alesesema, imibele ya bena Israele e lyo na bucibusa bwabo na Lesa fyalibipile. Bashimapepo tabalebomba bwino imilimo yabo kabili abantu abengi batendeke ifibelesho ifyalesaalula Lesa pamo nga ubuloshi, ubucende e lyo no bucenjeshi. (Malaki 2:8; 3:5) Nangu ca kuti abena Israele abengi balecita ifyabipa, kwali bambi abali aba cishinka. Finshi balecita?
Malaki alondolwele ukuti, “abaaletiina Yehova baalelanshanya, umuntu no munankwe.” Kanshi pali ili ilembo, Malaki alandile pa bena Israele balecindika Lesa no kutiina ukucita ifyali no kumukalifya. Ilembo lyalanda ukuti abantu abaletiina Lesa “baalelanshanya, umuntu no munankwe,” kanshi ukwabula no kutwishika bafwile balekumana pamo ku kulanda ifisuma pali Yehova e lyo no kukoseleshanya. Ifi fyalengele ukuti befuupulwa nelyo ukutendeka ukulacita ifyabipa ifyo bambi balecita. Kanshi ukutiina Lesa mibele iisuma.
Abena Israele abaali aba cishinka balangile ukuti baletiina Yehova, mu nshila na imbi iyacindama. Balangile ifyo, ilyo “baaletontonkanya pe shina lyakwe.” Baibolo imo ilanda ukuti, “balecindika ishina lyakwe.” Abena Israele abaletiina Yehova, balemucindika na mu fyo baletontonkanya. Ukufuma pa nshi ya mitima yabo baletontonkanya pali Yehova na pe shina lyakwe ilya lulumbi. Bushe Yehova alemona ifyo balecita?
Malaki alembele ati: “Yehova alebikako amano no kukutika.” Nangu ca kuti ekala ku muulu, alibikileko amano ukumfwa amashiwi yonse aya kumulumbanya ayo ababomfi bakwe balelanshanya. Na kabili alibikileko amano ku fyo baletontonkanya mu mitima yabo. (Amalumbo 94:11) Taleumfwa fye ifisuma ifyo balelanshanya no kumona ifyo baletontonkanya, lelo alicitilepo cimo.
Malaki atile: ‘Ibuuku lya cibukisho lyatendeke ukulembwa pa ntanshi yakwe.’ Ili ibuuku, e mwalembwa bonse ababombela Yehova mu cishinka. Litwa ukuti ‘ibuuku lya cibukisho.’a Ici cipilibula ukuti Yehova takatale alaba ababomfi bakwe aba cishinka na fyonse ifyo bacita ku kumulumbanya. Lelo kwaliba ico Lesa abebukishisha. Lesa alaya ukupeela umweo wa muyayaya bonse abakatwalilila ukuba mwi buuku lyakwe ilya cibukisho.b—Amalumbo 37:29.
Ala cilatuletela insansa ukwishiba ukuti Yehova alatasha fyonse ifyo tucita pa kutila tulemupepa ukulingana ne fyo afwaya! Amashiwi ayaba pali Malaki 3:16, yafwile ukutulenga ukutontonkanya sana pali bucibusa bwesu na Yehova. Kuti cawama ukuyipusha atuti, “Bushe ishina lyandi e mo lyaba mwi ‘buuku lya cibukisho’ ilya kwa Lesa?” Kuti lyabamo nga ca kuti cila bushiku tulecita, ukulanda no kutontonkanya pa fisuma ifyo Yehova e ngafwaya ukutwibukishishapo.
Amalembo ya Kubelenga mu December:
[Amafutunoti]
a Ishiwi lya ciHebere ilya kuti ‘icibukisho’ talipilibula fye ukwibukisha ifintu. Kuti lyapilibula no kucitapo cimo pa fyo umo aibukisha.
b Nga mulefwaya ukwishibilapo na fimbi pa fyo Lesa alaya ukutupeela umweo wa muyayaya, belengeni icipandwa 3 mu citabo citila Bushe Cinshi Baibolo Isambilisha? icalembwa ne Nte sha kwa Yehova.