Mose Ali No Kutemwa

BUSHE ISHIWI LYA KUTI UKUTEMWA LYALOLA MWI? Ukutemwa kusanshamo icitemwishi ku bantu bonse. Umuntu uwaba no kutemwa, alalanga ifyo atemwa abantu mu fyo alanda na mu fyo acita, nangu ca kuti ukucita ifi kwalyafya.

BUSHE MOSE ALANGILE SHANI UKUTI ALI NO KUTEMWA? Mose alitemenwe Lesa. Amutemenwe shani? Ibukisheni amashiwi yaba pali 1 Yohane 5:3 ayatila: “Pantu uku e kutemwa Lesa, ukuti tulekonka amafunde yakwe.” Mose alikonkele uku kufunda. Alicitile fyonse ifyo Lesa amwebele ukucita, pamo nga umulimo uwali uwa-afya uwa kulanda ne mfumu yalulumbi Farao e lyo no mulimo uwalemoneka kwati tawayafishe uwakuuma inkonto pali Bemba wa Kashika. Mose alicitile fyonse ifyo Lesa amwebele, te mulandu fyali ifya-afya nelyo ifyakosa ukucita. “Filya fine fye e fyo acitile.”—Ukufuma 40:16.

Mose alilangile ukutemwa na ku bena Israele banankwe. Abena Israele balishibe ukuti Yehova alebomfya Mose ukutungulula abantu bakwe, kanshi e o baleeba amafya yonse ayo balekwata. Baibolo itila: “Abantu baleisa kuli Mose ukufuma ulucelo ukufika icungulo.” (Ukufuma 18:13-16) Elenganyeni ifyo Mose alenaka ukukutika ku mafya ya bena Israele pa nshita iitali! Lelo apo Mose alitemenwe abantu, ali uwa nsansa ukubafwa.

Mose alekutika ku fyo abena Israele banankwe balelanda e lyo no kubapepelako. Alepepelako na balemucita ifyabipa! Ku ca kumwenako, ilyo Miriamu ailishenye pa lwa kwa Mose, Yehova alimukandile, alwala ifibashi. Mose tatemenwe pa fyacitikiile nkashi yakwe, e calengele ukuti apo pene amulandileko no kumupepelako ati: “Mwe Lesa, shi muundapeni!” (Impendwa 12:13) Ukwabula no kutwishika ukutemwa e kwalengele ukuti Mose apepe ipepo ilya kufuma pa nshi ya mutima.

FINSHI TWINGASAMBILILAKO? Kuti twapashanya Mose nga ca kuti na ifwe twatemwa Lesa no mutima wesu onse. Ukutemwa kwa musango uyu, kukatulenga ukulakonka amafunde yakwe “ukufuma ku mutima.” (Abena Roma 6:17) Nga tuleumfwila Yehova no kumubombela no mutima wesu onse, tukalenga umutima wakwe ukusekelela. (Amapinda 27:11) E lyo na ifwe bene tulanonkelamo mu kucita ifisuma pantu filatulenga ukusekelela!—Amalumbo 100:2.

Na kabili kuti twapashanya Mose nga natutemwa abantu banensu ukufuma ku mutima. Abanensu nelyo balupwa lwesu nga batwebako ifilebasakamika, ukutemwa kukalenga (1) tukalebikako sana amano ku fyo balelanda, (2) ukubomfwilako ubulanda, e lyo na (3) ukubalanga ukuti tulabasakamana.

Nga fintu Mose alecita, na ifwe kuti tulepepelako abo twatemwa. Limo kuti twafilwa no mwakulosha ilyo baletweba ifilebasakamika. Limbi kuti twasosa no kuti, “Cabipa, lelo ico ningacita fye ku mupepelako.” Lelo mufwile ukulaibukisha ukuti: “Ilyo umulungami apepa ipepo lya kupapaata, ipepo lyakwe lilaba na maka ayengi pantu lilasukwa.” (Yakobo 5:16) Ipepo lyesu kuti lyalenga Yehova ukwafwa umuntu uo tulepepelako. Kanshi icisuma ico twingacitila abatemwikwa besu, kubapepelako!a

Bushe tamulesumina ukutila kuti twasambilila ifingi sana kuli Mose? Nangu ca kuti ali muntu fye nga ifwe, tulasambililako ukuba ne citetekelo, ukuba abaicefya, e lyo no kuba no kutemwa. Nga twapashanya Mose, tukanonkelamo e lyo na bantu bambi na bo bakanonkelamo.—Abena Roma 15:4.

[Futunoti]