Amepusho ya mu Baibolo Ya-Asukwa

Bushe kuti twaumfwikisha ifyaba mu Baibolo?

Baibolo Cebo ca kwa Lesa. Yaba kwati ni kalata ukufuma kuli wishi uwatemwa abana bakwe. (2 Timote 3:16) Muli Baibolo e mo Lesa alondolola ifyo tufwile ukucita pa kumusekesha, umulandu asuminishisha ukucula, e lyo ne fyo akacitila abantunse ku ntanshi. Lelo intungulushi sha fya mapepo tashilondolola bwino ifyaba mu Baibolo ica kuti abantu abengi balifulunganishiwa kabili bamona fye kwati tabakatale abomfwikisha Baibolo.—Imilimo 20:29, 30.

Yehova Lesa afwaya ukuti twishibe icine pali wene. E mulandu wine atupeelela ici icitabo ico twingomfwikisha ifyabamo.—Belengeni 1 Timote 2:3, 4.

Kuti mwacita shani pa kuti mumfwikishe ifyaba mu Baibolo?

Yehova tatupeela fye Baibolo, lelo alatwafwa no kumfwikisha ifyabamo. Atumine Yesu ukwisa mu kutusambilisha. (Luka 4:16-21) Yesu alyafwile abantu ukumfwikisha Amalembo, pantu aleyalondolola bwino sana.—Belengeni Luka 24:27, 32, 45.

Yesu alipangile icilonganino ca Bwina Kristu pa kuti nga aya, umulimo atendeke ukatwalilile. (Mateo 28:19, 20) Muno nshiku, abasambi ba kwa Yesu aba cishinka balafwa abantu ukumfwikisha ifyo Baibolo isambilisha pali Lesa. Nga ca kuti mulafwaisha ukumfwikisha ifyaba mu Baibolo, Inte sha kwa Yehova kuti shamwafwa.—Belengeni Imilimo 8:30, 31.

Nga mulefwaya ukwishibilapo na fimbi, belengeni icipandwa 2 muli ici citabo, Bushe cinshi Baibolo Isambilisha?, icalembwa ne Nte sha kwa Yehova