Muleumfwila Bakacema Abo Yehova Asonta
“Umfwileni abalemutungulula no kubanakila, pantu balinda imyeo yenu.”—HEB. 13:17.
KUTI MWAYASUKA SHANI?
Bushe baeluda bacema shani impaanga sha kwa Lesa?
Mulandu nshi impaanga shilingile ukumfwila baeluda?
Mulandu nshi tushilingile ukulekela ifilubo fya baeluda ukuba akabepekesho ka kukanaumfwila ifyo baletufunda ukubomfya Baibolo?
1, 2. Mulandu nshi Yehova aipashanishisha kuli kacema?
YEHOVA aipashanya kuli kacema. (Esek. 34:11-14) Ukwishiba ifi kwalicindama pantu kulatwafwa ukwishiba ifyo Yehova aba. Kacema alasakamana impaanga shakwe. Alashitwala ku mulemfwe na ku menshi (Amalu. 23:1, 2); alashilonda akasuba no bushiku (Luka 2:8); alashicingilila ku filwani (1 Sam. 17:34, 35); alasenda utwana (Esa. 40:11); alafwaya ishilubile, no kusakamana ishi-icenene.—Esek. 34:16.
2 Apo abantu ba kwa Yehova abengi baali ni bakacema kabili abalimi, balishibe umulandu Yehova Lesa aipashanishishe kuli kacema. Balishibe ukuti pa kuti impaanga shikule bwino, balingile ukushisakamana. E fyaba na bantu, bakabila Yehova ukubasakamana no kulabatungulula. (Marko 6:34) Nga ca kutila Yehova talebasakamana nelyo ukubatungulula, abantu balaba na mafya ayengi. Tabeshiba icisuma ne cibi kabili tabakwata no wa kubacingilila, baba kwati ni “mpaanga ishabula kacema.” (1 Isha. 22:17) Lelo Yehova alapeela abantu bakwe fyonse ifyo bakabila.
3. Finshi twalasambilila muli cino cipande?
3 Na muno nshiku mwine, twalishiba umulandu Yehova aipashanishisha kuli kacema. Yehova alasakamana abantu bakwe ababa kwati ni mpaanga. Natumone ifyo abatungulula ne fyo abasakamana. Twalasambilila ne fyo tufwile ukucita ilyo Yehova aletutungulula no kutusakamana.
KACEMA MUSUMA ASONTA BAKACEMA ABA KUMWAFWA
4. Bushe Yesu asakamana shani impaanga sha kwa Yehova?
4 Yehova alisonta Yesu ukuba umutwe wa cilonganino. (Efes. 1:22, 23) Yesu “kacema musuma,” alapashanya Wishi. Alitemwa impaanga kabili alashisakamana ica kuti ‘alishituuliile no mweo wakwe.’ (Yoh. 10:11, 15) Ala mwandini icilubula ca kwa Kristu bupe ubwacindama nga nshi! (Mat. 20:28) Na kuba, Yehova afwaya ukuti ‘onse uutetekela Yesu ekonaika lelo akabe no mweo wa muyayaya!’—Yoh. 3:16.
5, 6. (a) Ni bani abo Yesu asonta ukulasakamana impaanga shakwe, kabili finshi impaanga shifwile ukucita pa kuti shilenonkelamo? (b) Mulandu nshi uukalamba uo tulingile ukulaumfwila baeluda?
5 Bushe impaanga shicita shani pa kulanga ukuti Yesu Kristu ni Kacema Musuma? Yesu atile: “Impaanga shandi shilomfwa ishiwi lyandi, na ine nalishiishiba, na sho shilankonka.” (Yoh. 10:27) Ukumfwa kwi shiwi lya kwa Kacema Musuma cipilibula ukulacita fyonse ifyo aletweba ilyo aletutungulula. Pali ifi paba no kulaumfwila baeluda abo asonta. Yesu atile abatumwa na basambi bakwe baali no kutwalilila ukubomba umulimo atendeke. Baali no ‘kulasambilisha’ no ‘kulaliisha utwana twa mpaanga utwa kwa Yesu.’ (Mat. 28:20; belengeni Yohane 21:15-17.) Ilyo imbila nsuma yalesalangana na basambi balefulilako, Yesu apekenye ukuti abaume abafikapo baletungulula ifilonganino.—Efes. 4:11, 12.
6 Ilyo umutumwa Paulo alembele kalata kuli bakangalila ba ku cilonganino ca ku Efese, atile umupashi wa mushilo e wabasontele ukuba bakangalila ba “kucema icilonganino ca kwa Lesa.” (Imil. 20:28) Bakangalila muno nshiku nabo pa kubasonta balafikapo pa fifwaikwa fya mu Malembo ayalembelwe ukubomfya umupashi wa mushilo. Kanshi nga tuleumfwila bakangalila ninshi tulelanga ukuti twalicindika Yehova na Yesu, Bakacema bakalamba. (Luka 10:16) Ukwabula no kutwishika, uyu e mulandu uukalamba tulingile ukulanakila baeluda. Lelo kwaliba imilandu na imbi iilenga ukuti tulebanakila.
7. Bushe baeluda bamwafwa shani ukutwalilila ukuba ifibusa fya kwa Yehova?
7 Pa kukoselesha aba bwananyina nelyo ukubafunda, baeluda babomfya Amalembo nelyo ifishinte fya mu Malembo. Ilyo baeluda balefunda aba bwananyina tababeba ifya kucita. (2 Kor. 1:24) Lelo bafwaya ukwafwa Abena Kristu banabo ukuti balebomfya Amalembo pa kupingula pa fintu pa kuti mu cilonganino mwilaba ifimfulunganya lelo muleba umutende. (1 Kor. 14:33, 40) Baeluda ‘balinda imyeo yesu’ pantu bafwaya ukwafwa bonse aba mu cilonganino pa kuti batwalilile ukuba ifibusa fya kwa Yehova. E ico balangufyanya ukwafwa munyinefwe nelyo nkashi uuli mupepi no kulufyanya nelyo ‘uulufyenye.’ (Gal. 6:1, 2; Yuda 22) Bushe ifi tafifwile ukutulenga ukuti ‘tuleumfwila abaletutungulula’?—Belengeni AbaHebere 13:17.
8. Bushe baeluda bacingilila shani umukuni wa kwa Lesa?
8 Umutumwa Paulo, na o uwali kacema, alembeele abena Kolose ukuti: “Cenjeleni: epali umuntu amuteka ubusha ku mano ya buntunse no bucenjeshi ukulingana ne ntambi sha bantu, ukulingana ne fintu fya fye ifya muli ici calo kabili te kulingana na Kristu.” (Kol. 2:8) Ifi Paulo asokele filetulanga umulandu na umbi uo tufwile ukulaumfwila ifyo baeluda batufunda. Balacingilila umukuni ku balwani abengafwaya ukonaula icitetekelo cabo. Umutumwa Petro asokele pali “bakasesema ba bufi” na “bakasambilisha ba bufi” abali no ‘kubeleleka abashashangila’ pa kuti balufyanye. (2 Pet. 2:1, 14) Na muno nshiku mwine, baeluda balatusoka nga nacilinga. Aba baume balishiba ifingi. Na kabili, ilyo bashilabasonta ukuba baeluda, balilangile ukuti balishiba bwino Amalembo kabili balifikapo ukusambilisha icine. (1 Tim. 3:2; Tito 1:9) Icilenga ukuti baletungulula bwino umukuni mulandu wa kuti balifikapo, tabapampamina fye pa cintu cimo, kabili balakonka ifyebo fya mano ifyaba muli Baibolo.
KACEMA MUSUMA ALALIISHA NO KUCINGILILA IMPAANGA
9. Muno nshiku, bushe Yesu atungulula shani no kuliisha icilonganino ca Bwina Kristu?
9 Yehova abomfya icilonganino cakwe alapekanishisha ba bwananyina ba mwi sonde lyonse ifya kulya fya ku mupashi. Mu mpapulo shesu e muba ifyebo ifingi ifya mu Baibolo ifya kutufunda. Na kabili limo ukuteyanya kwa kwa Lesa kuleba baeluda ifya kucita, ukupitila mu makalata babalembela nelyo ukubomfya bakangalila ba muputule. Ishi nshila Yehova abomfya shilenga impaanga ukwishiba bwino ifya kukonka.
10. Mulimo nshi baeluda bakwata nga ca kuti uwa mu cilonganino aleka ukubombela Lesa?
10 Baeluda balikwata umulimo wa kucingilila, ukwafwa no kusakamana aba mu cilonganino, maka maka abanaka nelyo ababembwike. (Belengeni Yakobo 5:14, 15.) Bamo nalimo balileka ukulongana kabili balileka no kubombela Lesa. Ilyo ifya musango uyu fyacitika, eluda uwabika amano ku mukuni alesha na maka ukufwaya impaanga iyaluba no kuikoselesha ukuti ibwelele mwi cinka, e kutila mu cilonganino! Yesu atile: “Tata uwaba mu muulu tafwaya ukuti umo pali aba abanono alobe.”—Mat. 18:12-14.
BUSHE TUFWILE UKULAMONA SHANI IFILUBO FYA BAELUDA?
11. Mulandu nshi bamo bakaanina ukumfwila ubutungulushi bwa baeluda?
11 Yehova na Yesu ni bakacema abapwililika. Lelo baeluda abo bapeela umulimo wa kusakamana ifilonganino bena tabapwililika. Ici nalimo kuti calenga bamo ukukanalaumfwila ubutungulushi bwa baeluda. Nalimo kuti batontonkanya abati: ‘Baeluda baba fye nga ifwe, tabapwililika. Ba nshi twingalaumfwila?’ Ca cine ukuti baeluda tabapwililika. Na lyo line, tatufwile ukubika fye amano ku filubo fyabo nelyo ku fyo bashicita bwino.
12, 13. (a) Filubo nshi ifyo ababomfi ba kwa Yehova bamo abo apeele imilimo bacitile? (b) Mulandu nshi abalelemba Baibolo balembeele ne filubo fya bantu abo Lesa apeele imilimo?
12 Amalembo yalilanda pa filubo fya bantu ba ku kale abo Yehova alebomfya ukutungulula abantu bakwe. Ku ca kumwenako, Davidi balimusubile ukuba imfumu kabili intungulushi mu Israele. Lelo alicitile ubucende kabili alipeye no muntu. (2 Sam. 12:7-9) Natulande na pa mutumwa Petro. Nangu ca kuti alipeelwe imilimo iingi mu cilonganino ca mu nshita ya batumwa, alicitile ifilubo ifikalamba. (Mat. 16:18, 19; Yoh. 13:38; 18:27; Gal. 2:11-14) Ukutula pali Adamu na Efa, pano calo tapaba umuntu uwapwililika, kano fye Yesu.
13 Mulandu nshi Yehova alekeele abalelemba Baibolo ukuti balembe ne filubo fya bantu abo apeele imilimo? Umulandu umo wa kuti Lesa afwaya twishibe ukutila kuti abomfya abantunse abashapwililika ukutungulula abantu bakwe. Na kuba ifi fine e fyo acita. Kanshi tatufwile ukuleka ifilubo fya batutungulula ukuba akabepekesho ka kukanabomfwila nelyo ukuilishanya. Yehova afwaya ukuti tulecindika aba baume no kulabomfwila.—Belengeni Ukufuma 16:2, 8.
14, 15. Finshi twingasambilila ku fyo Yehova alecita pa kweba abantu bakwe ifya kucita?
14 Ukumfwila abaletutungulula kwalicindama nga nshi. Moneni ifyo Yehova alecita pa kweba abantu bakwe aba ku kale ifya kucita ifintu nga fyayafya. Ilyo abena Israele bafumine mu Egupti, Lesa ale-eba Mose na Aarone ifyo alefwaya ukuti balecita. Na pa kuti bapusuke icinkunka calenga 10, abena Israele balingile ukucita ifyo babebele, e kutila ukulya ifya kulya ifyo babebele ukulya cilya cungulo no kusansa umulopa wa mpaanga pa nceshi sha pa mwinshi na pa mwalo wa mayanda yabo. Yehova talandile na bena Israele mu kulungatika. Lelo balingile ukumfwila abakalamba ba mu Israele. Aba baume nabo bale-eba abantu ifyo Mose alebeba. (Ukufu. 12:1-7, 21-23, 29) Pali ilya nshita, Yehova alebomfya Mose na bakalamba ukweba abantu bakwe ifya kucita. Muno nshiku, Yehova abomfya baeluda pa kweba abantu bakwe ifya kucita.
15 Nalimo kuti mwatontonkanya pa malyashi na yambi ayalembwa mu Baibolo ayalanda pa fyo Yehova abomfeshe abantu nelyo bamalaika pa kweba abantu bakwe ifya kucita pa kuti bapusuke. Lesa alimwene ukuti cali fye bwino ukupeelako bambi uyu mulimo. Abo Yehova alebomfya balelandila mwi shina lyakwe kabili bale-eba abantu bakwe ifyo balingile ukucita pa kuti bapusuke. Kanshi kuti twaenekela ukuti Yehova akacita cimo cine na pa Armagedone. E co baeluda abapeelwa umulimo wa kulandilako Yehova ne cilonganino cakwe bafwile ukucenjela sana pa kuti tabalebomfya bubi bubi amaka babapeela.
“UMUKUNI UMO, NA KACEMA UMO”
16. ‘Lishiwi’ nshi ilyo tufwile ukulaumfwila?
16 Abantu ba kwa Yehova baba “umukuni umo” kabili batungululwa na “kacema umo,” Yesu Kristu. (Yoh. 10:16) Yesu alandile ukuti ali no kuba na basambi bakwe “inshiku shonse mpaka na ku mpela ya calo.” (Mat. 28:20) Apo nomba ni Mfumu mu muulu, e wakwata amaka pali fyonse ifikacitika ilyo ashilaonaula icalo ca kwa Satana. Pa kuti tube abaikatana kabili abacingililwa mu mukuni wa kwa Lesa, tufwile ukulaumfwa kwi ‘shiwi ku numa yesu’ ililetweba ukwa kuya. Muli ili ‘shiwi’ mwaba ne fyebo umupashi wa mushilo uwa kwa Lesa utweba ukupitila muli Baibolo na mu fyo Yehova na Yesu balanda ukupitila muli baeluda abo basonta.—Belengeni Esaya 30:21; Ukusokolola 3:22.
17, 18. (a) Finshi Satana afwaya ukucita ku bantu ba kwa Lesa, lelo finshi twingacetekela? (b) Finshi tukasambilila mu cipande cikonkelepo?
17 Baibolo itila Satana ale-endauka “nge nkalamo iilebuluma, iilefwaya untu ingalya.” (1 Pet. 5:8) Nga filya ficita inama mbi iili ne nsala, Satana alabendelela umukuni, alolela inshita iyalinga pa kuti ekate impaanga iinakile nelyo iifumine pa shinankwe. E mulandu wine cibelele icacindama ukuti tulepalama kuli bamunyinefwe na ku “mucemi kabili kangalila wa myeo [yesu].” (1 Pet. 2:25) Ukusokolola 7:17 kulanda pa bakapusuka ubucushi bukalamba ukuti: “Umwana wa mpaanga [Yesu], . . . akabacema, kabili akabatungulula ku tumfukumfuku twa menshi ya mweo. Kabili Lesa akafuuta ifilamba fyonse ku menso yabo.” Ala mwandini ubu bulayo busuma nga nshi!
18 Pa numa ya kusambilila pa mulimo wacindama uo baeluda babomba, tufwile ukuyipusha ukuti, Bushe aba baume abo Lesa asonta kuti bacita shani pa kuti balesunga bwino impaanga sha kwa Yesu? Tukasuka ici cipusho mu cipande cikonkelepo.
[Icikope pe bula 23]
Nga filya kacema acingilila umukuni wakwe, baeluda nabo balacingilila impaanga isho babapeela ukusakamana (Moneni paragrafu 8)
[Icikipe pe bula 25]
Baeluda balacingilila ababa mu ndupwa umwaba fye umufyashi umo (Moneni paragrafu 17 na 18)