Saleni Bwino Ifya Kucita Ilyo Mucili Abaice

1. Milimo nshi iyo Abena Kristu abacaice abengi balebombako?

TULEIKALA mu nshita umulecitika ifintu ifisuma sana. Abantu abengi nga nshi ukufuma mu nko shonse baleisa mu kupepa kwa cine. (Ukus. 7:9, 10) Abacaice abengi abalebomba umulimo wa kusambilisha abantu Baibolo pa kuti bakabe no mweo, baleipakisha ifintu ifisuma ifingi. (Ukus. 22:17) Abacaice bamo balatungulula amasambililo ya Baibolo kabili balafwa abantu ukuba ne mibele isuma. Bambi bashimikila mu ncende umo balanda indimi sha ku fyalo fimbi. (Amalu. 110:3; Esa. 52:7) Finshi mufwile ukucita pa kuti mubombeko uyu mulimo uuleta insansa?

2. Bushe ifyacitikile Timote filanga shani ukuti Yehova alaitemenwa ukupeela abacaice imilimo? (Moneni icikope cili pa ntendekelo ya cino cipande.)

² Mwe bacaice, kuti mwasalapo ukucita ifingalenga mwaisabombako imilimo iyalekanalekana iya kwa Lesa. Ku ca kumwenako, Timote alisalile bwino ifya kucita ica kuti ilyo ali ne myaka mupepi na 20 nelyo ukucilapo panono, aishileba mishonari. (Imil. 16:1-3) Aba bwananyina balebacusha nga nshi mu Tesalonika ne ci calengele ukuti umutumwa Paulo ashe icilonganino icali fye icipya. Nalimo ilyo papitile fye imyeshi iinono ukutula apo Paulo afumineko, aebele Timote ukuti abwelele ku Tesalonika no kuyakoselesha aba bwananyina. (Imil. 17:5-15; 1 Tes. 3:1, 2, 6) Timote afwile alitemenwe sana ilyo bamupeele uyu mulimo!

ICACINDAMA SANA ICO MUFWILE UKUSALAPO UKUCITA

3. Cinshi icacindama sana ico mufwile ukusalapo ukucita, kabili ni lilali mufwile ukucita ifyo?

³ Ilyo umo acili umwaice, e lyo afwile ukusalapo ukucita ifyacindama. Cinshi icacindama sana ico mulingile ukusalapo ukucita? Kubombela Yehova. Ni lilali mulingile ukusalapo ukubombela Yehova? Yehova atila: “Ibukisha Kabumba obe Lesa Mukulu mu nshiku sha bulumendo bobe.” (Luk. Mil. 12:1) Inshila fye iyo ‘mwingebukishishamo’ Yehova, kumubombela no mutima wenu onse. (Amala. 10:12) Ukubombela Lesa no mutima wenu onse e cacindama sana ico mufwile ukusalapo ukucita. Ukusalapo ukubombela Lesa, kukakuma imikalile yenu iya ku ntanshi.—Amalu. 71:5.

4. Finshi fimbi ifyacindama ifyo mwingasalapo ukucita ifikakuma ifyo mukalabombela Lesa?

⁴ Kwena, ukupingulapo ukubombela Yehova te kweka fye ukukakuma ifyo ifintu fikaba ku ntanshi. Ku ca kumwenako, nalimo mulingile ukupingulapo nampo nga mukoopa nelyo ukuupwa, uo mukopana nankwe, ne ncito mukalabomba. Ifi fintu fyalicindama, lelo ico mufwile ukubalilapo ukupingulapo ukucita, kubombela Yehova no mutima wenu onse. (Amala. 30:19, 20) Mulandu nshi? Pantu ifyo mwasalapo ukucita kuti fyakuma ifyo mufwaya ukucita ku ntanshi. Ifyo mwapingulapo pa kuupa nelyo ukuupwa nelyo incito mwasala fikakuma ifyo mukalabombela Lesa. (Linganyeniko Luka 14:16-20.) Lelo nga mwasalapo ukubombela Lesa, cikamwafwa ukupingulapo bwino pa kuupa nelyo ukuupwa nelyo incito mukasala ukulabomba. Kanshi balilenipo ukusalapo ukucita ifintu ifyacilapo ukucindama.—Fil. 1:10.

FINSHI MUKASALAPO UKUCITA ILYO MUCILI ABAICE?

5, 6. Londololeni icacitike icilelangilila ukuti mu kusala bwino ifya kucita mulafuma ifisuma. (Moneni ne cipande cileti “Ifyo Nasalilepo Ukucita Ilyo Nali Umwaice” icili muli ino magazini.)

⁵ Nga mwasalapo ukubombela Lesa, kuti mwaishiba ifyo afwaya ukuti mulecita, kabili kuti mwapingulapo ifya kumubombela. Munyinefwe umwina Japan atile: “Ilyo nali ne myaka 14, naile mu kushimikila na eluda, kabili alimwene ukuti nshali ne nsansa ilyo twaleshimikila. Cikuuku cikuuku, anjebele ati: ‘Yuichiro, kabiye ku ng’anda. Uyeikala pa nshi no kutontonkanya sana pa fyo Yehova akucitila.’ Nalicitile ifyo anjebele. Na kuba, pa nshiku shakonkelepo, nalitwalilile ukutontonkanyapo no kupepa. Mu kuya kwa nshita, nalyalwike. Tapakokwele, nalitendeke ukumfwa bwino ukubombela Yehova. Nalitemenwe ukubelenga amalyashi ayalelanda pali bamishonari kabili natendeke ukutontonkanya pa kubombela Lesa no mutima wandi onse.”

⁶ Yuichiro atile: “Napingwilepo ukulacita ifintu ifyali no kungafwa ukuyabombela Yehova ku calo cimbi. Ku ca kumwenako, natendeke ukusambilila iciNgeleshi. Ilyo napwishishe isukulu, napingwilepo ukulabomba incito ya kufunda iciNgeleshi pa ma-awala ayanono pa kuti ndebomba bupainiya. Ilyo nali ne myaka 20, natendeke ukusambilila iciMongolian kabili nalitandalileko ne bumba lya balelanda iciMongolian. Pa numa ya myaka ibili, mu 2007, naile ku Mongolia mu kutandala. Ilyo twaile mu kushimikila na bapainiya no kumona ifyo abantu abengi balefwaya ukusambilila icine, napingwilepo ukuti mfwile ukukuukila ku Mongolia. Nalibwelelemo ku Japan pa kuti njeipekanya bwino. Nalibomba bupainiya ku Mongolia ukutula mu April 2008. Imikalile yalyafya kuno. Lelo abantu balitemwa imbila nsuma, kabili ndabafwa ukupalama kuli Yehova. Imona ukuti ico nasalilepo ukucita e cacindama sana.”

7. Finshi ifyo tufwile ukupingulapo ukucita fwe bene, kabili finshi Mose acitile ifyo twingamupashanya?

⁷ Cila muntu afwile ukupingulapo umwine ifyo akalabombela Yehova. (Yosh. 24:15) Te kuti tumwebe mwe bacaice nampo nga mufwile ukuupa nelyo ukuupwa, uo mufwile ukuupana nankwe, nelyo incito mufwile ukulabomba. Bushe mukasalapo ukubomba incito iyo mwingasambilila mu nshita fye iinono? Bamo mwikala mu mishi umwaba abantu abapiina; bambi mwikala mu matauni umwaba abakankaala. Mwe bacaice, mwalipusanapusana ifyo mwaba, ifyo mwacenjelamo, ifyo mwaishiba, ifyo mwatemwa, ne fyo mufwaya ukucita mu mulimo wa kwa Lesa. Nalimo mwaba nga filya abaHebere bacaice abali mu Egupti bapuseneko ne fyo Mose aali. Mose aleipakisha ifisuma kwi sano lya mfumu, lelo abaHebere bambi abacaice bali basha. (Ukufu. 1:13, 14; Imil. 7:21, 22) Nabo bene baleikala pa nshita ilyo kwalecitika ifintu ifyacindama sana. (Ukufu. 19:4-6) Cila muntu aalingile ukusalapo ifyo aali no kucita mu bumi bwakwe. Mose alisalilepo ukucita icintu icacindama.—Belengeni AbaHebere 11:24-27.

8. Ni bani bengafwa abacaice ukupingulapo bwino ifya kucita?

⁸ Yehova alamwafwa ukusala bwino ifya kucita ilyo mucili abaice. Alamusambilisha ifishinte fya mu Baibolo ifyo mwingabomfya ilyo mulefwaya ukupingula pa fintu ifyalekanalekana. (Amalu. 32:8) Na kabili, abafyashi benu Abena Kristu na baeluda kuti bamwafwa pa fyo mwingabomfya ifi fishinte fya mafunde. (Amapi. 1:8, 9) Natulande pa fishinte fya mu Baibolo fitatu ifingamwafwa ukupingulapo bwino ifya kucita.

IFISHINTE FYA MU BAIBOLO FITATU IFINGAMWAFWA

9. (a) Bushe Yehova atucindamika shani pa kutupeela ubuntungwa bwa kuisalila ifyo tulefwaya ukucita? (b) Bushe ‘ukufwaya Ubufumu intanshi’ kukalenga mukakwate ishuko nshi?

⁹ Intanshi mulefwaya Ubufumu bwa kwa Lesa no bulungami bwakwe. (Belengeni Mateo 6:19-21, 24-26, 31-34.) Yehova alitucindamika pa kutupeela ubuntungwa bwa kuisalila ifyo tulefwaya ukucita. Talanda ukuti mwe bacaice mufwile ukulashimikila fye inshita yonse. Lelo Yesu alitweba ukuti calicindama ukufwaya Ubufumu intanshi. Nga mulefwaya Ubufumu intanshi, mukaba ne shuko lya kubombako imilimo iyalekanalekana. Ku ca kumwenako, mukalabomba imilimo iikalalanga ukuti mwalitemwa Lesa, mwalibika amano ku bantu bambi, kabili mulatasha na pe subilo mwakwata ilya mweo wa muyayaya. Ilyo muletontonkanya pa kuupa nelyo ukuupwa nelyo pa ncito, tontonkanyeni nga ca kutila ifyo mukapingulapo ukucita fikalenga mukalesakamikwa sana pa fyo mukabila, nelyo fikalenga mukabe abacincila ukufwaya Ubufumu bwa kwa Lesa no bulungami bwakwe.

10. Cinshi calengele ukuti Yesu abe ne nsansa, kabili finshi na imwe mwingacita pa kuti mube ne nsansa?

¹⁰ Mukaba ne nsansa nga mulebombela bambi. (Belengeni Imilimo 20:20, 21, 24, 35.) Yesu alitusambilishe ici cishinka icacindama. Yesu aali sana ne nsansa pantu alecita ukufwaya kwa kwa Wishi, te kufwaya kwakwe iyo. Aletemwa ukumona uko abafuuka balekutika ku mbila nsuma. (Luka 10:21; Yoh. 4:34) Nalimo na imwe mwaliba ne nsansa pa fyo mwayafwa bamo. Nga ca kutila ilyo mulepingula pa fintu ifyacindama mulekonka ukufunda kwa kwa Yesu, mukaba ne nsansa kabili mukalenga Yehova ukusekelela.—Amapi. 27:11.

11. Cinshi calengele ukuti Baruki aleke ukuba ne nsansa, kabili finshi Yehova amwebele?

¹¹ Ukubombela Yehova e kulenga twaba ne nsansa sha cine cine. (Amapi. 16:20) Baruki, kalemba wa kwa Yeremia, nalimo alilabile ici cishinka. Inshita imo, alilekele ukubombela Yehova ne nsansa. Yehova amwebele ukuti: “Ulefwaya ifintu ifikalamba. Leka ukufifwaya. Pantu, mona, ndeleta ubucushi pa bantu bonse,  . . . kabili nkakupeela umweo obe e o ukapususha.” (Yer. 45:3, 5) Bushe muletontonkanya ukuti cinshi cali no kulenga Baruki ukuba ne nsansa? Bushe kufwaya ifintu ifikalamba, nelyo ukupusuka ubonaushi bwa Yerusalemu pa mulandu wa kuba umubomfi wa kwa Lesa uwa cishinka?—Yako. 1:12.

12. Cinshi ba Ramiro basalilepo ukucita icalengele ukuti babe ne nsansa?

¹² Munyinefwe umo uwaba ne nsansa pa mulandu wa kubombela bambi ni Ramiro. Atile: “Nafyalilwe mu lupwa ulupiina kabili twaleikala mu mushi uwali mu mpili sha Andes. Kanshi ilyo abakalamba bandi banjebele ukuti bakandipilila indalama sha ku yuniversiti, namwene ukuti lyali lishuko nga nshi. Lelo e lyo fye nabatishiwe no kuba Inte ya kwa Yehova, kabili kwali painiya uwalefwaya ukuti tukaye nankwe mu kushimikila mwi tauni ilinono. Naliile na painiya, nayasambilila no kubeya umushishi, kabili nalitendeke ukubeya abantu umushishi pa kuti ndesanga indalama sha kubomfya. Abantu abengi balefwaya sana ukusambilila Baibolo. Mu kuya kwa nshita, natendeke ukulongana mu cilonganino icipya icalebomfya ululimi ulo balanda muli ili itauni. Napapita imyaka 10 ukutula apo natendekele bupainiya. Takwaba incito nangu imo iingandetela insansa isho nakwata pa kwafwa abantu ukusambilila Baibolo mu lulimi lwabo.”

13. Mulandu nshi mufwile ukubombela Yehova ilyo mucili abaice?

¹³ Bombeleni Yehova ilyo mucili abaice. (Belengeni Lukala Milandu 12:1.) Tamufwile ukutontonkanya ukuti intanshi mufwile ukwingila incito iisuma, e lyo mwingatendeka ukubombela Yehova. Ilyo mucili abaice, e nshita iisuma iya kutendeka ukubombela Yehova no mutima onse. Abacaice abengi tabakwata imilimo ya kusakamana ulupwa kabili balikwata ubumi ubusuma na maka ya kubomba imilimo iyakosa. Finshi mwingatemwa ukucita mu mulimo wa kwa Yehova ilyo mucili abaice? Nalimo kuti mwatemwa ukuba bapainiya. Nelyo kuti mwatemwa ukubombela mu cifulo umo balanda ululimi lwa ku calo cimbi. Nangu kuti mwafwaya ukubombesha mu cilonganino mwaba. Te mulandu ne fyo mwingasalapo ukucita, mufwile ukulacitako fimo pa kuti mulekwata indalama sha kubomfya. Ni nshita nshi mukapoosapo pa kusambilila iyo ncito? Finshi mukasala ukulacita?

MULEKONKA IFISHINTE FYA MU BAIBOLO PA KUTI MULESALA BWINO IFYA KUCITA

14. Finshi umuntu afwile ukucenjelako ilyo aletontonkanya pa kusala incito akalabomba?

¹⁴ Ifi fishinte fya mu Baibolo fitatu ifyo twalandapo kuti fyamwafwa ukusala incito mwingatemwa ukubomba. Ilingi bampanda mano ba pa sukulu baleshiba incito ishingasangwa ku ncende mwaba. Ababomfi ba buteko nabo kuti bamweba incito mwingasanga ku ncende mwabela nelyo ku cifulo cimbi uko mwingatemwa ukuyabombela. Aba bantu kuti bamwafwa, lelo mufwile ukucenjela. Abantu abashatemwa Yehova kuti bafwaya ukuti mutemwe ifya mu calo. (1 Yoh. 2:15-17) Ifintu ifyaba mu calo kuti fyalenga umutima wenu ukumubepa.—Belengeni Amapinda 14:15; Yer. 17:9.

15, 16. Ni bani bengamupandako amano ayasuma ilyo mulefwaya ukusala incito ya kwingila?

¹⁵ Ilyo mwaishiba incito ishingasangwa, mulekabila aba kumupandako amano. (Amapi. 1:5) Ni bani bengamwafwa ukubomfya ifishinte fya mu Baibolo ilyo mulesala incito ya kwingila? Mufwile ukukutika ku bantu abatemwa Yehova, abamutemwa, kabili abamwishiba bwino. Bakamwafwa ukutontonkanya pa ncito mulefwaya ukubomba nga kuti mwakwanisha e lyo ne co mulefwaila iyo ncito. Nalimo ifyo bengamweba kuti fyalenga mwatontonkanyapo na kabili pa fyo mwingafwaya ukucita mu bumi. Nga ca kuti abafyashi benu balitemwa Yehova, ala ninshi mwalipaalwa icine cine! Na kabili, baeluda ababa mu cilonganino nabo kuti bamupandako amano ayasuma. Kuti mwaipushako bapainiya na bakangalila benda umulandu basalilepo ukulabomba umulimo wa nshita yonse. Bushe bacitile shani pa kuti batendeke bupainiya kabili finshi bacita pa kuti baleisakamana? Busuma nshi basanga mu kubomba uyu mulimo?—Amapi. 15:22.

¹⁶ Abamwishiba bwino kuti bamupandako amano ayasuma. Tutile mulefwaya ukuleka isukulu pantu mulefwaya ukutendeka bupainiya. E lyo ne co mulefwaila ukulekela mulandu wa kuti tamufwaya ukubombesha ku sukulu. Abantu abamutemwa bakeluka ico mulefwaila ukulekela isukulu kabili bakamweba ukuti isukulu kuti lyalenga mwasambilila imibele ya kushipikisha. Iyi mibele ilafwaikwa sana nga ca kuti mulefwaya ukubombela Yehova no mweo onse.—Amalu. 141:5; Amapi. 6:6-10.

17. Bushe ni ncito nshi isho tushifwile ukwingila?

¹⁷ Bonse ababombela Yehova balaba na mafya ayengalenga bafuma kuli Yehova. (1 Kor. 15:33; Kol. 2:8) Lelo kwaliba incito shimo ishingalenga bucibusa bwenu na Yehova ukonaika. Nalimo mwalishibako bamo uko mwikala ‘ababunsha icitetekelo cabo’ pa mulandu wa ncito basalilepo ukubomba. (1 Tim. 1:19) Nga mwakaana ukwingila incito iingalenga mwaonaula bucibusa bwenu na Yehova, ninshi mwapingulapo bwino.—Amapi. 22:3.

MULEBOMBELA YEHOVA ILYO MUCILI ABAICE

18, 19. Nga ca kuti tamulapingulapo ukubombela Yehova, finshi mufwile ukucita?

¹⁸ Nga ca kutila mwalitemwa ukubombela Yehova, mulebomba imilimo ya kwa Lesa iyo mwingabomba ilyo mucili abaice. Saleni ifya kucita ifingamwafwa ukulabombela Yehova pali ino ine nshita.—Amalu. 148:12, 13.

¹⁹ Lelo, finshi mufwile ukucita nga ca kuti tamulapingulapo ukubombela Yehova? Twalilileni ukukosha icitetekelo cenu muli Yehova. Ilyo umutumwa Paulo alandile pa fyo acitile ifyalengele ukuti Lesa amupaale, atile: “Nga umutima wenu walemenena kuli fimbi, Lesa akamusokolwela iyi ine mibele. Awe, ukulingana ne fyo twalunduluka, natutwalilile ukulaenda bwino muli uyu wine musango.” (Fil. 3:15, 16) Twalilileni ukutontonkanya pa kutemwa kwa kwa Lesa na pa fyo amufunda. Yehova fye, e wingamwafwa ukusalapo ukucita ifisuma ilyo mucili abaice.