AMASUKO KU MEPUSHO YA MU BAIBOLO
Mulandu nshi icalo cabelako?
Icalo bacipangile ukuti muleikala abantu aba nsansa
Pa maplaneti yonse, ni pano calo fye e bapa ifimenwa ne fya mweo. Paliba amenshi ayengi ayo ifimenwa ne fya mweo fikabila. Filya icalo cabeyama, ifyo cishinguluka, ne nshila cipitamo ilyo cishinguluka akasuba filalenga ukuti amenshi ayaba muli fibemba yelabilauka nelyo ukutalala ica kuti yaba na aisi. Kabili ulwelele na maka ayashinguluka icalo (magnetic field) filacingilila icalo ku myengelele iikali. Icipesha amano na cimbi ni filya ifya mweo ne fimenwa ifya pano calo fi-itungilila. Fyonse ifi fyalenga abantu abengi ukulatontonkanya ukuti kwaliba umulandu icalo bacipangile.—Belengeni Esaya 45:18.
Nomba nalimo kuti mwaipusha amuti: ‘Bushe Lesa alefwaya no kuti kube ulufyengo no kucula?’—Belengeni Amalango 32:4, 5.
Bushe icalo cikaba nga filya Lesa afwaile ukuti cibe?
Kabumba apangile icalo ukuti muleikala abantu aba nsansa, abamutiina, kabili abamutemwa. Kanshi abantu balicindama ukucila inama ne fimenwa. Ifwe twalishiba Kabumba wesu kabili kuti twapashanya ne mibele yakwe iya kutemwa no mulinganya.—Belengeni Lukala Milandu 12:13; Mika 6:8.
Kabumba wesu kuti afikilisha ukufwaya kwakwe. E ico, tatulingile ukutwishika ukuti akafumyapo ukucula no lufyengo kabili akawamya icalo pa kuti abantu aba nsansa bakaleikalamo.—Belengeni Amalumbo 37:11, 29; Esaya 55:11.