“Ulewamya Umwenda Amakasa Yobe” pa Kuti Ulelunduluka

ILYO abantu ba kwa Lesa balefuma mu Babiloni mu 537 B.C.E., Yehova alefwaya ukuti bapite mu nshila iisuma. E ico abebele ukuti: “Wamyeni inshila ya bantu. Pangeni umusebo, pangeni umusebo. Fumyenimo amabwe.” (Esa. 62:10) Elenganyeni ifyo abaYuda bamo babombele uyu mulimo. Abatangile pali ulu lwendo bafwile balipangile umusebo, ukushiika ifilindi no kuwamya umushali bwino. Ifi babombele fyali no kwafwa bamunyinabo abalebakonka pa numa ilyo balebwelelamo ku mwabo.

Kuti twapashanya inshila abaYuda bali no kupitamo ku nshila ya mampalanya iyo Umwina Kristu afwile ukwendamo pa kuti akabombe imilimo aapanga ukubombako mu cilonganino ca kwa Lesa. Yehova afwaya ababomfi bakwe bonse ukwenda muli iyi nshila ukwabula ifya kubapumfyanya. Icebo cakwe citweba ukuti: “Ulewamya umwenda amakasa yobe, kabili leka imibele yobe yonse ipampamikwe.” (Amapi. 4:26) Kuti mwasambililako fimo kuli uku kufunda nampo nga muli baice nelyo iyo.

SALENI BWINO IFYO MUKACITA

Abacaice baliba no bumi ubusuma, balicenjela, kabili balafwaya ukufika apatali mu bumi. Na Baibolo ilanda ukuti: “Ubusuma bwa balumendo maka yabo.” (Amapi. 20:29) Uwacaice nga alebomfya maka yakwe ne fyo acenjelamo ku kubombela Yehova, kuti asuka afikilisha ifyo apanga ukucita mu cilonganino ca kwa Lesa, kabili kuti aba ne nsansa.

Nge fyo twaishiba, mu calo namo balafwaya sana abacaice abacenjela. Umwana we sukulu Nte nga alecita bwino ku sukulu, bakafundisha nelyo abanankwe kuti balemukoselesha ukusambilila sana pa kuti akekale bwino ku ntanshi. Na kabili, munyinefwe nelyo nkashi uwaishibisha icangalo cimo, aba fyangalo kuti balemukoselesha ukuti akafike apatali. Bushe ica musango yu calimucitikilapo? Nelyo bushe mwalishibako bamo abo bakoselesha ukuti bakafike apatali mu masambililo nelyo mu fyangalo? Cinshi cingafwa Abena Kristu ukusala bwino ifyo bakacita ku ntanshi?

Ifyo Baibolo ifunda kuti fya-afwa umuntu ukusala bwino ifyo akacita ku ntanshi. Lukala Milandu 12:1 itila: “Ibukisha Kabumba obe Lesa Mukulu mu nshiku sha bulumendo bobe.” Finshi iwe na banobe mwingacita pa kuti ‘muleibukisha Kabumba wenu’?

Umfweni ifyo Erica uwa ku West Africa acitile. Eric alitemenwe sana ukuteya umupila. Ilyo ali ne myaka 15 ninshi alitendeka kale ukuteya mwi bumba lya mupila ilya calo cabo. Ici calolele mu kuti bali no kumusenda mu kuteya umupila ku Bulaya kabili ali no kulumbuka sana. Bushe Eric ali no ‘kwibukisha shani Kabumba wakwe’? Kabili finshi iwe na banobe mwingasambililako?

Ilyo Eric ali ku sukulu atendeke ukusambilila Baibolo ne Nte sha kwa Yehova. Asambilile ukuti Kabumba wakwe e ukapwisha amafya yonse pano calo. Eric asambilile ukuti icacindama sana kubomfya inshita na maka yakwe ku kubombela Lesa. Ici calengele ukuti aleke ukuteya umupila. Alibatishiwe kabili atendeke ukubomba bwino mu cilonganino. Mu kupita kwa nshita ali umubomfi atumikila kabili aile kwi Sukulu lya Bamunyinefwe Abashimbe.

Eric atwalilila ukuteya umupila nga alilumbwike no kuba ne cuma. Lelo alyumfwikishe amashiwi ya mu Baibolo ayatila: “Ifyuma fya mukankaala fyaba ngo musumba uwakosa, kabili afimona nge linga ilyasansuka.” (Amapi. 18:11) Ca cine, ifyuma tafingacingilila umuntu nge fyo abantu abengi batontonkanya. Na kuba, abafwaisha ifyuma ‘balailasaula abene na macushi ayengi.’—1 Tim. 6:9, 10.

Icawama ca kutila, abacaice abengi balisanga insansa sha cine cine mu kubombako umulimo wa nshita yonse. Eric atile: “Naba mwi ‘bumba’ lya babomfi ba kwa Yehova abamubombela inshita yonse. Ili e bumba ilyacindama sana ilyo mfwile ukubamo, kabili ndatasha Yehova pa kunanga inshila yacindama sana iya kusangilamo insansa sha cine cine.”

Inga imwe mutontonkanyapo shani? Ukucila ukukonkelela ifintu fya muli cino calo, kuti cawama nga mwabikile Yehova pa ntanshi, pa kulabombako bupainiya bwa nshita yonse.—Belengeni akabokoshi kaletila “Amapaalo Ayacila pa Masambililo ya ku Yuniversiti.”

MWILEKA ICILI CONSE UKUMUPUMBULA

Ilyo abaupana bamo batandalile Bethel ya ku United States, balipapile nga nshi ukumona ifyo abantu ba kwa Yehova ababomba pa Bethel baba ne nsansa. Nkashi alembele ukuti: “Twalifusha imitabotabo mu mikalile yesu.” Aba abaupana basalilepo ukutendeka ukulabomfya inshita iikalamba na maka mu mulimo wa kwa Lesa.

Pa kubala, aba abaupana balemona kwati te kuti bakumemo ukucita ifyo bapingwilepo. Lelo bushiku bumo batontonkenye sana pa mashiwi yali mwi lembo lya bushiku. Ili ilembo lyali ni Yohane 8:31, apaba amashiwi ya kwa Yesu ayatila: “Nga mwaikalilila mu fyo nsosa, ninshi ca cine muli basambi bandi.” Aya mashiwi yalengele basondwelele ukuti: “Natucita fye bwino sana ifi tucefesheko imitabotabo mu mikalile.” Bashitishe ing’anda yabo iikalamba, ne fintu fimbi ifyo bashalekabila, kabili bakuukile ku cilonganino ukwalefwaikwa bakasabankanya na bambi. Ino nshita ni bapainiya, e lyo balafwilishako na mu makuule ya Mayanda ya Bufumu, kabili balaipeelesha ukubombako imilimo pa kulongana kwa citungu. Bushe bomfwa shani? Batile: “Twaliba sana ne nsansa ifi twayangusha imikalile pa kuti tulebomba imilimo iyo ukuteyanya kwa kwa Yehova kutukoselesha ukubombako.”

TWALILILENI UKULABOMBESHA MU MILIMO YA KWA LESA

Solomone alembele ukuti: “Leka amenso yobe yaloleshe fye ku ntanshi, kabili yatontomeshe fye ku ntanshi.” (Amapi. 4:25) Nga filya uule-ensha motoka abiika amano ku kulolesha uko aleya, na ifwe bene tatufwile ukupumbulwa ku fintu fya muno calo ifingalenga twafilwa ukubombako imilimo ya kwa Lesa iyo tufwaisha ukubombako.

1. Inte sha kwa Yehova balebombako imilimo ya kwa Lesa mu bwaice bwabo; 2. Inshila umushaba ifya kupumfyanya

Milimo nshi iya kwa Lesa iyo mwingapangila libeela ukuti mukabombeko ku ntanshi? Kuti mwabombako umulimo wa nshita yonse. Cimbi ico mwingacita kukuukila mu cilonganino cabela mupepi umo bafwaya sana bakasabankanya abacenjela mu kushimikila pa kuti mubafweko ukushimikila mu cifulo icikalamba ico bapeelwa. E lyo nalimo icilonganino kuti calikwata bakasabankanya abengi kabili abacincila, lelo tamwaba baeluda na babomfi batumikila abengi. Bushe te kuti ciwame nga mwalicitilepo cimo pali ifi twalandapo? Landeni na kangalila wenu uwa muputule pa kuti mumone ifyo mwingabombako. Nga mwingatemwa ukuya mu kubombela ku cilonganino icaba ukutali, kuti mwaipusha ukwabela ifi filonganino ifilekabila abakubomba.b

Natubwelele ku lyashi twacitendekelapo ukulanda ilyaba pali Esaya 62:10. AbaYuda bamo bafwile balibombeshe pa kuti bawamye inshila iyo abantu ba kwa Lesa bali no kupitamo pa kubwelela ku mwabo. Nga ca kuti na imwe mulebombesha pa kuti mufikilishe ifyo mwapanga ukucita mu cilonganino ca kwa Lesa, mwibwelela inuma, Lesa akamwafwa. Twalilileni ukulapepa kuli Yehova pa kuti amupeele amano ya kucimfya ifingalenga mwafilwa ukubombako uyu mulimo. Mu kupita kwa nshita, Yehova akamwafwa ‘ukuwamya umwenda amakasa yenu.’—Amapi. 4:26.

a Te shina lyakwe.

b Moneni Abaiteyanya Ukucita Ukufwaya kwa kwa Yehova, amabula 111-112.

Amapaalo Ayacila pa Masambililo ya ku Yuniversiti

ILYO ba Flavia bali abaice, banakulwibo abali ni Nte ya kwa Yehova balibasambilisheko fimo ifyo Baibolo ilanda. Lelo ba wishi bali ni bakafundisha, kabili bena balefwaisha ukuti ba Flavia bakasambilile sana. Abantu bambi nabo balebeba ukuti, “Inkulo yobe kuti yawamya sana ifintu pano calo.” Pa mulandu wa kuti bawishi balefwaya sana ukuti ba Flavia basambilile, basukile baya ku yuniversiti iyacindama sana, uko baile mu kusambilila ifya kupanga amafuta aya muli bamashini ayabulamo ifiko.

Tapakokwele, ba Flavia bamwene ukuti abana besukulu banabo abengi tababikile amano ku kucita ‘ifya kuwamya icalo.’ E lyo kabili pa kuti imilimo imo iyali pa yuniversiti ile-enda bwino, kwali utubungwe twa makwebo tumo utwaleafwilishako. Kanshi abana besukulu pa yuniversiti balicindike sana utu utubungwe ica kuti mu nshita ya kubika amano ku ‘fya kuwamya icalo,’ babikile amano kuli utu twine tubungwe. Ici calengele ba Flavia ukulaumfwa sana ububi. Ilyo Inte sha kwa Yehova baile pa ng’anda mu ku bashimikila, balitemenwe icine cine pa kwishiba ifyo Baibolo yalanda pali Lesa ne fyo akacita ku ntanshi, kabili balefwaya ukwishibilapo na fimbi.

Ba Flavia batendeke ukusambilila Baibolo kabili pa numa balibatishiwe. Lelo pa mulandu wa kutila amasambililo balesambilila ya kukwata digiri iya pa muulu, tabalekwata sana inshita ya kuya mu kushimikila. Bushiku bumo, bakutike kwi lyashi lya kwa kangalila enda uwalondolwele bwino Yakobo 4:17, iitila: “E ico, umuntu nga alishiba ukucita icalungama lelo tacita, ninshi alebembuka.” Ici calengele ukuti ba Flavia batontonkanye sana pa fyo balecita. Batile: “Nalefwaya ukuti Yehova alempaala, lelo pa nshita imo ine, nalefwaya no kusambilila sana ifya sayansi. Lelo nalingile ukusalapo fye cimo.”

Ba Flavia basalilepo ukuleka amasambililo balesambilila pa yuniversiti. Bushe ifyo basalilepo ukucita fyalelenga balelanguluka ukuti tabapingwilepo bwino? Ba Flavia batile:

“Mu kubombela Yehova, nalisanga amapaalo ayacila pa masambililo ya ku yuniversiti. Kabili nalimona ukuti Yehova alintemwa icine cine. Alinsambilisha ukuba uwa cikuuku, ukuba no kutemwa, e lyo ne fya kusambilisha abantu ifyaba mu Baibolo. Nalyupwa bwino, kabili nalikwata ne subilo lya fintu ifisuma ifikacitika ku ntanshi. Ili isubilo lyalicila pa fyo nalesubila ilyo nalesambilila ifya sayansi. Ni Yehova fye epela, e wingawamya isonde, kabili nkatwalilila ukumumfwila.” Ino nshita ba Flavia na bena mwabo babomba pa maofeshi yakalamba aya Nte sha kwa Yehova mu New York.