AMASUKO KU MEPUSHO YA MU BAIBOLO
Bushe bamalaika kuti batwafwa?
Muno nshiku, bamalaika balafwa abantu ukukutika ku mbila nsuma nga filya fine ba-afwile Daniele umubomfi wa kwa Lesa uwa cishinka
Ilyo Yehova Lesa ashilapanga abantu, atalile apanga bamalaika abengi nga nshi. (Yobo 38:4, 7) Aba bamalaika fibumbwa fya mupashi ificita ukufwaya kwa kwa Lesa. Limo limo Yehova alabatuma ku kutungulula no kucingilila ababomfi bakwe pano calo. (Amalumbo 91:10, 11) Muno nshiku, bamalaika baleafwa abantu ukukutika ku mbila nsuma iyo abasambi ba kwa Yesu balebilisha.—Belengeni Ukusokolola 14:6, 7.
Bushe tufwile ukupepa kuli bamalaika nga tulefwaya ubwafwilisho? Iyo. Tufwile fye ukupepa kuli Lesa. (Ukusokolola 19:10) Apo bamalaika babomfi ba kwa Lesa, bakonka ifyo Lesa abeba ukucita, tabacita ifyo abantu balefwaya ukuti bacite. Kanshi tufwile fye ukulapepa kuli Lesa eka ukupitila muli Yesu.—Belengeni Amalumbo 103:20, 21; Mateo 26:53.
Bushe Kwaliba Bamalaika Ababipa?
Nga filya na ifwe twaba, bamalaika nabo balikwata ubuntungwa bwa kuisalila ifya kucita kabili kuti basalapo ukucita ifisuma nelyo ifyabipa. Ku ca bulanda, bamalaika abengi balipondokele Lesa. (2 Petro 2:4) Uwabalilepo ukumupondokela ni Satana; e lyo bambi balimukonkele kabili baishileba ifibanda. Mu myaka ya nomba line, Satana ne fibanda fyakwe balibatamfishe mu muulu no kubapoosa pano isonde.—Belengeni Ukusokolola 12:7-9.
Ububifi no bunkalwe fyalifula sana ukutula mu 1914. Ici cilanga ukuti nomba line Lesa ali no konaula Satana ne fibanda fyakwe. Lyena Lesa akalenga icalo ukuba icisuma nga filya fine cali pa kubala.—Belengeni Ukusokolola 12:12; 21:3, 4.