AMASUKO KU MEPUSHO YA MU BAIBOLO
Bushe ca cine Yesu alebuusha abafwa?
Yesu alibuushishe Lasaro, uwafwile pa nshiku shine
Baibolo ilanda ukuti Yesu alebuusha abafwa. Aya malyashi te ya bufi, pantu Yesu alebushisha abantu ku ncende ne nshita ishaishibikwa. Ku ca kumwenako, mu lusuba, mu 31 C.E., abantu abengi balefuma na Yesu ku Kapernahumu baleya ku Naini. Ilyo bafikile kulya, basangile ibumba na limbi ilikalamba. Kuti mwacetekela ukuti ili lyashi ililanda pa muntu abuushishe mu Naini lya cine pantu lyaba mu Cebo ca kwa Lesa, Baibolo, kabili amabumba aya yabili yalimweneko.—Belengeni Luka 7:11-15.
Yesu alibuushishe no munankwe Lasaro, uwafwile pa nshiku shine. Kuti mwacetekela ukuti ili lyashi nalyo lya cine pantu abantu abengi balimweneko ilyo Yesu amubuushishe.—Belengeni Yohane 11:39-45.
Cinshi Yesu alebuushisha abafwa?
Yesu alebuusha abafwa pantu aleumfwa uluse. Cimbi ico alebuushisha abafwa ca kuti alefwaya abantu beshibe ukuti Wishi, Kabumba, alimupeele amaka aya kubuusha abafwa.—Belengeni Yohane 5:21, 28, 29.
Filya Yesu alebuusha abafwa fyalenga twacetekela mu malayo yakwe ayalanda pa nshita ya ku ntanshi. Akabuusha abafwa abengi nga nshi, ukubikako na bashalungama abashaishibe icine pali Lesa. Nabo bakabapeela ishuko lya kwishiba no kutemwa Yehova Lesa.—Belengeni Imilimo 24:15.