ICIPANDE ICIKALAMBA | KUTI MWAPALAMA KULI LESA
Bushe Nimwe Cibusa wa kwa Lesa?
“Ukuba cibusa wa kwa Lesa kulandetela insansa kabili takuba nangu cimo icinsakamika. Ng’umfwa kwati Lesa alentungulula pa kuti ifintu fileenda bwino.”—CHRISTOPHER, UMULUMENDO UWA KU GHANA.
“Lesa alansansamusha ilyo ndi na mafya, alintemwa kabili alimbikako sana amano.”—HANNAH UWA MYAKA 13, UWIKALA KU ALASKA, MU U.S.A.
“Ukuba cibusa wa kwa Lesa kulenga nilasakamikwa!”—GINA, UMWANAKASHI UMWINA JAMAICA UWACILA IMYAKA 40.
Te Christopher fye, Hannah na Gina abomfwa ifi. Abantu abengi mu calo conse balishininkisha ukuti Lesa abamona ukuti ni cibusa wabo. Inga imwe, bushe mulomfwa ukuti mwalipalama kuli Lesa? Nelyo bushe kuti mwatemwa ukupalama kuli ena? Nalimo mulaipusha amuti, ‘Bushe umuntu-untu fye kuti aba cibusa wa kwa Lesa Uwa Maka Yonse? Nga kuti cacitika, finshi afwile ukucita pa kuba cibusa wa kwa Lesa?’
KUTI MWAPALAMA KULI LESA
Baibolo itila fwe bantu kuti twapalama kuli Lesa, kuti twaba ifibusa fyakwe. Itila Lesa aleita Abrahamu, icikolwe ca baHebere, ati “cibusa wandi.” (Esaya 41:8) Moneni ne fyo atweba pali Yakobo 4:8, patila: “Palameni kuli Lesa, na o akapalama kuli imwe.” Kanshi fwe bantu kuti twaba ifibusa fya kwa Lesa. Nomba apo Lesa tamoneka, bushe kuti ‘twapalama’ shani kuli ena no kuba ifibusa fyakwe?
Pa kwasuka ici cipusho, natulande pa fyo ciba pa kupanga bucibusa no muntu. Icibalilapo, kwishibana amashina. Nga baishibana, balatendeka ukulanshanya lyonse, kabili ilyo balelanda pa fyo baletontonkanya ne fyo baleumfwa, icibusa cabo cilakoselako. Kabili nga balepelana ifintu, nelyo ukwafwana mu fintu, bucibusa bulacilapo ukukosa. E fi fine e fyo ciba na pa kuba cibusa wa kwa Lesa. Natulande pa fyo twingacita pa kuba cibusa wa kwa Lesa.