AMASUKO KU MEPUSHO YA MU BAIBOLO
Finshi filenga umuntu aba umufyashi umusuma?
Bushe mulasambilisha abana benu ukutemwa Lesa?
Abana balakula bwino sana nga ca kuti abafyashi babo balitemwana kabili balicindikana. (Abena Kolose 3:14, 19) Abafyashi abasuma balitemwa abana babo kabili balabatasha nga bacita ifisuma, filya fine na Yehova Lesa atashishe Umwana wakwe.—Belengeni Mateo 3:17.
Shifwe wa ku muulu alomfwa nga twapepa kabili alitubikako amano. Abafyashi balingile ukusambilila ku fyo Yehova aaba kabili balingile ukulaumfwikisha ilyo abana babo balelanda. (Yakobo 1:19) Bafwile ukwishiba ifyo abana babo baaba kabili bafwile no kwishiba nga ca kuti balailishanya pa fintu fimo.—Belengeni Impendwa 11:11, 15.
Finshi abafyashi balingile ukucita pa kuti balekusha bwino abana?
Abafyashi balikwata insambu sha kupanga amafunde ya mu ng’anda. (Abena Efese 6:1) Abafyashi balingile ukusambilila kuli Lesa. Lesa alitemwa sana abana bakwe kabili alibapeela na mafunde ayo balingile ukukonka pa kuti baleba ne nsansa, kabili alabeba ne fingabacitikila nga tabalekonka amafunde. (Ukutendeka 3:3) Na kuba, Lesa tapatikisha abantu ukuti balingile fye ukumumfwila, lelo alabasambilisha ukuti nga balecita ifyo afwaya, e lyo bengaba ne nsansa.—Belengeni Esaya 48:18, 19.
Muleesha na maka sana ukulasambilisha abana benu ukutemwa Lesa. Abana benu nga batemwa Lesa, bakulacita ifisuma na lintu bali beka. Mulecita ifyo mulesambilisha abana benu nga filya fine Yehova acita. Muletemwa sana Lesa pa kuti na bana benu bakatemwe Lesa.—Belengeni Amalango 6:5-7; Abena Efese 4:32; 5:1.